ઊનાકાંડમાં કોઈનેય નહીં છોડાય : CM - Sandesh
  • Home
  • Ahmedabad
  • ઊનાકાંડમાં કોઈનેય નહીં છોડાય : CM

ઊનાકાંડમાં કોઈનેય નહીં છોડાય : CM

 | 3:22 am IST

ઊના રાજકોટ, તા.૨૦  

ઊનાના મોટા સમઢિયાળા ગામે દલિત યુવાનો ઉપર ગુજારવામાં આવેલા અત્યાચારના દેશવ્યાપી ઘેરા પડઘા પડી રહ્યાં છે, ત્યારે મુખ્યમંત્રી આનંદીબહેન બુધવારે સમઢિયાળા ગામે તથા રાજકોટ સિવિલ હોસ્પિટલ પહોંચ્યા હતા, જ્યાં એમણે અસરગ્રસ્ત દલિતોને ન્યાય અપાવવાની અને કોઈપણ આરોપીને નહીં છોડવાની ખાતરી આપ્યા સાથે સરકાર તરફથી તમામ પ્રકારની સહાય-સુરક્ષા-સગવડો આપવાની હૈયાધારણા આપી હતી.  

બુધવારે સવારે હવાઈ માર્ગે ઊનાના સમઢિયાળા ગામે પહોંચેલા આનંદીબહેન અત્યાચારનો ભોગ બનેલા ચાર દલિત પરિવારજનોને રૂબરૂ મળ્યા હતા. અસરગ્રસ્તો પૈકી બાલુભાઈ સરવૈયાના મકાનના ફળિયામાં મુખ્યમંત્રીએ બેઠક યોજી હતી, જ્યાં ગામના બધાં જ દલિત પરિવારો એકઠાં થયા હતા. અસરગ્રસ્ત બાલુભાઈ સરવૈયા આપવીતી વર્ણવતાં રડી પડયાં હતા, એ વખતે દલિત મહિલાઓ પણ હીબકે ચઢી હતી. એ જોઈને મુખ્યમંત્રી પણ ભાવુક બની ગયાં હતા. એમણે સમગ્ર ઘટના બાબતે સરકાર ચિંતિત હોવાનું અને આવો અત્યાચાર ગુજારનારાઓને કડકમાં કડક સજા થાય તે માટે સરકાર પ્રયત્નશીલ હોવાની ખાતરી આપી હતી. એમણે ભોગ બનેલા દલિત પરિવારોના સંતાનોનો અભ્યાસ ખર્ચ હોસ્ટેલ ખર્ચ સરકાર તરફથી ઉઠાવવાનું આશ્વાસન આપ્યું હતું. સ્થાનિક કલેક્ટરને એમણે ૨૪મી જુલાઈએ ગામમાં કેમ્પ યોજી પાકા મકાન સહિત સરકારી સહાય માટેના ફોર્મ ભરાવવા અને બે મહિનામાં આ યાદી તૈયાર રાખવા સૂચના આપીને કહ્યું હતું કે બે મહિના બાદ તેઓ પોતે ફરીથી ગામમાં આવશે.  

તમે અમારા માવતર છો, ન્યાય અપાવજો

મુખ્યમંત્રી આનંદીબહેન પટેલ તેમના કાફલા સાથે ઊનાના સમઢિયાળા ગામની મુલાકાત બાદ રાજકોટ સિવિલ હોસ્પિટલના સર્જિકલ વોર્ડમાં સારવાર લઈ રહેલા દલિત ઈજાગ્રસ્તોની મુલાકાતે લેવા પહોંચ્યા ત્યારે પીડિત વશરામભાઈ સરવૈયાએ એવી કાકલૂદી કરી હતી કે તમે અમારા માવતર છો, અમને ન્યાય અપાવજો મુખ્યમંત્રીએ આ તબક્કે વશરામભાઈના માથે હાથ મૂકી ન્યાયની ખાતરી આપી હતી.

ઘટનાના બીજા દિવસથી તંત્ર કામે લાગ્યાનો દાવો

મુખ્યમંત્રી આનંદીબહેન પટેલના નિકટવર્તી સૂત્રોએ એવો દાવો કર્યો છે કે, ઊનાના સમઢિયાળા ગામે દલિતો ઉપર પાશવી અત્યાચારનો મુદ્દો રાજ્યસભામાં બહુજન સમાજ પાર્ટીના સુપ્રીમો માયાવતી દ્વારા ઉઠાવવાના પગલે સોમવારે એ બનાવ મીડિયામાં ગાજ્યો, પણ હકીકતમાં તો ૧૧મી જુલાઈએ ઘટના ઘટી એનાં બીજા જ દિવસથી તંત્રએ પગલાં લેવાનું શરૂ કરી દીધું હતું. સરકાર તરફથી એકશનનો ઘટનાક્રમ જણાવતા આ સૂત્રોએ દાવો કર્યો હતો કે, ૧૨મીથી ૧૭મી જુલાઈ સુધીના ૬ દિવસ દરમિયાન ગીર સોમનાથનું પ્રતિનિધિત્વ કરતા રાજ્યમંત્રી જશા બારડ સહિત સંસદસભ્ય સ્થાનિક ધારાસભ્ય, કલેક્ટર, ડીએસપી દ્વારા ઘટના સ્થળે જઈ પીડિતોની મુલાકાત લેવાઈ હતી, ઊનામાં તથા જૂનાગઢમાં સરકારી હોસ્પિટલમાં સારવાર લઈ રહેલા ૭ દલિત અસરગ્રસ્તો માટે જરૂરી પ્રબંધ ગોઠવાયો હતો, તેમને પ્રત્યેકને ચાર લાખની સહાય પૈકી એક લાખ રૂપિયા વળતર પેટે ચૂકવાયા હતા, ઈજાગ્રસ્તોને પ્રતિદિન રૂ.૫૦૦ લેખે કેશડોલ્સ ચૂકવવાની શરૂઆત થઈ હતી. જોકે આ સૂત્રોએ નિખાલસપણે કબૂલ્યું હતું કે, સ્થાનિક પોલીસે આ બનાવ નિષ્કાળજી દાખવી હતી.