CMની જવાબદારીમાંથી મને મુક્ત કરો: આનંદીબેન પટેલે Facebookપર લખી 'મન કી બાત' - Sandesh
  • Home
  • Featured
  • CMની જવાબદારીમાંથી મને મુક્ત કરો: આનંદીબેન પટેલે Facebookપર લખી ‘મન કી બાત’

CMની જવાબદારીમાંથી મને મુક્ત કરો: આનંદીબેન પટેલે Facebookપર લખી ‘મન કી બાત’

 | 5:08 pm IST

ગુજરાતના મુખ્યમંત્રી આનંદીબહેને પટેલે આજે રાજકીય વર્તુળોને આંચકો આપતાં સમાચાર પોતાના સત્તાવાર ફેસબુક એકાઉન્ટ પર એક પત્ર દ્વારા જાહેર કર્યા. મુખ્યપ્રધાન આનંદીબહેને પક્ષના વરિષ્ઠ નેતાઓને આ પત્ર લખ્યો છે અને જણાવ્યું છે કે નવેમ્બરમાં તેમને 75 વર્ષ પૂરાં થાય એ પહેલાં મુખ્યપ્રધાન પદેથી મુક્ત કરવા વિનંતી કરી છે. પોતાને 18 વર્ષથી પક્ષમાં મહત્ત્વના હોદ્દાઓ પરથી રાજ્યના નાગરિકોની સેવા કરવાની તક મળી છે તે માટે આ પત્રમાં આભાર માન્યો છે.

આનંદીબહેને ફેસબુક પર મૂકેલા આ પત્ર બાદ ઝડપથી બનેલા ઘટનાક્રમમાં તેઓ રાજ્યપાલને મળવા પહોંચ્યાં હતાં. તો બીજીબાજુ ભાજપાના પ્રદેશ પ્રમુખ વિજય રૂપાણી તેમને મળવા આવી પહોંચ્યાં હતાં.જ્યારે ભાજપના રાષ્ટ્રીય અધ્યક્ષ અમિત શાહે આનંદીબહેને રાજીનામુ મોકલ્યું હોવાનો સ્વીકાર કરતાં જણાવ્યું હતું કે તેમના રાજીનામાં અંગે પક્ષનો સંસદીય બોર્ડ નિર્ણય લેશે.

આનંદીબેન પટેલે લખેલ પત્ર વાંચો

છેલ્લાં 30 વર્ષથી ભારતીય જનતા પાર્ટીમાં કાર્યકર્તા તરીકે કામ કરતાં કરતાં મને અનેકવિધ જવાબદારીઓ સંભાળવાની તક મળી છે. સંગઠન તેમજ સરકારમાં પક્ષે મને ખુબ જ અગત્યની જવાબદારીઓ સોંપી છે. જેને હું મારૂ સદભાગ્ય માનુ છું.

મહીલા મોરચાની જવાબદારીથી લઈ મુખ્યમંત્રી પદ સુધી પક્ષના નેતૃત્વએ મારી પર વિશ્વાસ મુક્યો તે માટે હું ઋણી છું. કુશળ સંગઠક, દીર્ધદ્રષ્ટા અને કર્મઠ આદરણીય શ્રી નરેન્દ્રભાઈ મોદીના નેતૃત્વ નીચે પહેલા સંગઠ્ઠનમાં અને પછી સરકારમાં કામ કરવાની મને તક મળી જેના કારણે સાતત્યપુર્વક મારૂ ઘડતર થતું રહ્યું. છેલ્લા 18 વર્ષથી ગુજરાત સરકારનાં ખુબ જ અગત્યનાં વિભાગોની કામગીરી કરતાં કરતાં અનેક રચનાત્મક સુધારાઓ કરી નવી પ્રજાભિમુખ યોજનાઓના સરળ અમલીકરણ દ્વારા પારદર્શિતા લાવવા પ્રામાણિકતા સાથે પરીણામલક્ષી કાર્ય કરવા સતત પ્રયત્નશીલ રહી છું. મે, 2014માં ગુજરાત રાજ્યના પ્રથમ મહીલા મુખ્યમંત્રી તરીકેની જવાબદારી શ્રી નરેન્દ્રભાઈ તથા વરીષ્ઠ નેતૃત્વએ મને સોંપી તેને હું સમગ્ર ગુજરાતની મહીલાઓનું ગૌરવ ગણું છું. શ્રી નરેન્દ્રભાઈ ગુજરાતના મુખ્યમંત્રી તરીકે 12 વર્ષથી વધુ સમય સુધી રહ્યાં અને તેમની જગ્યાએ મારી પસંદગી થઈ તે સ્વાભાવિક રીતે જ આકાશ ના તારા ગણવા જેવું કઠીન કાર્ય હતું પરંતુ, મને એ વાતનો ગર્વ છે કે તેઓએ ગુજરાતના વિકાસની કંડારેલી કેડી એ જ ઝડપથી આગળ વધારવામાં હું ક્યાંય પાછી પડી નથી.

ભારતીય જનતા પાર્ટીની વિચારધારા, સિધ્ધાંતો અને શિસ્તબધ્ધતાથી પ્રેરાઈ હું પક્ષમાં જોડાઈ હતી અને આજ સુધી તેનું પાલન કરતી રહી છું. છેલ્લા થોડાક સમયથી પક્ષમાંથી પંચોતેર વર્ષની ઉંમર પછી વરિષ્ઠ કાર્યકર્તાઓએ સ્વૈચ્છિક જવાબદારીમાંથી મુક્ત થવાનું સ્વીકારી આગવી પરંપરા ઉભી કરી છે. જે સૌ માટે ઉદાહરણીય અને અનુકરણીય છે. જેના કારણે આવનારી પેઢીને કાર્ય કરવાની તક મળે છે. મારા પણ નવેમ્બરમાં પંચોતેર વર્ષ પુરા થનાર છે. પરંતુ 2017ના અંતમાં ગુજરાતમાં વિધાનસભાની ચુંટણી આવવાની હોઈ તેમજ દર બે વર્ષે યોજાતા રાજ્ય માટે મહત્વના વાઈબ્રન્ટ ગુજરાત સમીટ પણ જાન્યુઆરી 2017માં યોજાનાર હોઈ નવનિયુક્ત થનાર મુખ્યમંત્રીને પુરતો સમય મળી રહે તે માટે મેં બે માસ અગાઉ પક્ષના વરિષ્ઠ નેતૃત્વ સમક્ષ મને આ જવાબદારીમાંથી મુક્ત કરવા માટે વિનંતી કરેલ. હું આજે ફરીથી આ પત્ર દ્વારા પક્ષના વરિષ્ઠ નેતૃત્વને મને મુખ્યમંત્રી પદની જવાબદારીમાંથી મુક્ત કરવા નમ્ર વિનંતી કરૂં છું.

cm-1

ગુજરાતની ગૌરવશાળી પ્રજાની સેવા કરવાની મને તક મળી અને છેવાડાના માનવી સુધી સેવાઓનો લાભ પહોંચાડવા માટે મેં શક્ય તમામ પ્રયત્નો કર્યા છે. રાજ્યરૂપી પરીવારનું નેતૃત્વ કરતા મને જે અપાર પ્રેમ, સ્નેહ અને કામ કરતાં રહેવાની સતત પ્રેરણા મળી છે તે માટે હું મારી હ્દયપૂર્વક કૃતજ્ઞતા વ્યક્ત કરી વંદન કરૂં છું.’