સુરત :
ધો. ૧૦ની પૂરક પરીક્ષામાં પણ નાપાસ થયેલી સિંગણપોરની કિશોરીએ ઝેર પી આપઘાતની કોશિશ કરી હતી.
સ્મીમેર હોસ્પિટલનાં સૂત્રો પાસેથી મળતી વિગતો પ્રમાણે સિંગણપોરમાં સહજાનંદ સોસાયટી ખાતે તળાવ ફળિયામાં રહેતી જ્યોતિ જયસિંગ સોસા (૧૭)એ આજે સવારે ઘરમાં ઝેરી દવા પી લેતા સારવારાર્થે તેણીને સ્મીમેર હોસ્પિટલમાં ખસેડાઇ છે, જ્યાં તેણીની હાલત સ્થિર હોવાનું જાણવા મળે છે.
સૂત્રોના જણાવ્યા પ્રમાણે જ્યોતિના પિતા મજૂરીકામ કરે છે. તેણીને ૩ બહેન અને ૧ ભાઇ છે. તેણી ગત માર્ચ મહિનામાં લેવાયેલી ધો. ૧૦ની પરીક્ષામાં નાપાસ થઇ હતી અને જુલાઇ માસમાં ફરી તેને ધોરણ ૧૦ની પૂરક પરીક્ષા આપી હતી. જેના તાજેતરમાં આવેલા પરિણામમાં જ્યોતિ ફેઇલ થઇ હતી. જેથી નાસીપાસ થઇ આપઘાતની કોશિશ કરી હતી. ચોકબજાર પોલીસે તપાસ આદરી છે.