કેટીએ ગુપ્ત રીતે છૂટાછેડાની અપીલ બદલ ટોમ ક્રૂઝની માફી માગી

મુંબઈ, 20 ઓગસ્ટ

હોલિવૂડ અભિનેત્રી કેટી હોમ્સે છૂટાછેડા માટેની અપીલ ગુપ્ત રીતે દાખલ કરવા બદલ પૂર્વ પતિ, હોલિવૂડ સ્ટાર ટોમ ક્રૂઝની માફી માગી લીધી હોવાનું જાણવા મળ્યું છે. છૂટાછેડા માટે ગુપ્ત રીતે અપીલ કરીને ટોમની માનસિક હેરાનગતિ કરવા બદલ કેટીએ માફી માગી લીધી હોવાનું સત્તાવાર સૂત્રોને ટાંકીને એક અહેવાલમાં જણાવાયું છે. કેટી હોમ્સે ટોમ ક્રુઝની માફી માગી તે પાછળના ચોક્કસ કારણો પણ આપવામાં આવ્યા છે. ૩૩ વર્ષીય કેટી હોમ્સે છૂટાછેડા માટે ગયા મહિને અપીલ દાખલ કરી હતી.

ટોમ ક્રુઝ અને કેટી હોમ્સ પાંચ વર્ષના લગ્નજીવન બાદ છૂટા પડી ગયા છે. તેમની ૬ વર્ષની પુત્રી સુરીની કસ્ટડી કેટી હોમ્સને મળી છે, જોકે ટોમ ક્રુઝને પણ સુરીને મળવાના અધિકારો આપવામાં આવ્યા છે. ટોમ ક્રૂઝ પોતાની પુત્રીને ખૂબ જ ચાહે છે અને તેને જ્યારે પણ મળે ત્યારે તેને રાજી રાખવા માટે દરેક મુલાકાત વેળાએ તેની નાની નાની ઇચ્છાઓને પણ પૂર્ણ કરે છે. ટોમ ક્રુઝ સુરીને મળવા જાય ત્યારે તેના માટે જુદી જુદી ભેટસોગાદો ખરીદવાનું પણ ચૂકતો નથી.