ભુજ, તા.૧૩
કચ્છમાં બાળફિલ્મ ઉત્સવનાં માધ્યમથી બાળકોને ફિલ્મો દ્વારા એડવાન્સ શિક્ષણ અને સંસ્કૃતિથી માહિતગાર કરી, બાળકોમાં જાગૃતિ કેળવવાનાં પ્રયાસ રૂપે બાળચિત્ર સમિતિ-મુંબઈ દ્વારા પ્રાદેશિક અને માધ્યમિક શાળાઓમાં અભ્યાસ કરતાં વિદ્યાર્થીઓને શિક્ષણ, સંસ્કૃતિને લગતી ગુજરાતી-હિન્દી ભાષાની ફિલ્મો તા.૧૪થી તા.ર૦ દરમિયાન વિનામૂલ્યે દર્શાવવામાં આવશે. જેના પ્રારંભે કચ્છનાં બાળ કલાકારો સાથે ફિલ્માંકન કરવામાં આવેલી હારૂન અરૂન ફિલ્મ દર્શાવાશે.
- જિલ્લામાં બાળ કલાકારો સાથે ફિલ્માંકન કરાયેલી હારૂન અરૂન ફિલ્મ દર્શાવાશે
બાળચિત્ર સમિતિનાં ફેસ્ટિવલ અધિકારી જી. પી. ઠેકડેએ જણાવ્યું હતું કે, તા.૧૪મીનાં ભુજનાંં સેવન સ્કાય થિયેટરમાં સવારે ૯:૩૦ કલાકે ફિલ્મ ઉત્સવનો પ્રારંભ કરવામાં આવશે. જેમાં કચ્છમાં શૂટિગ કરવામાં આવેલી તેમજ કચ્છી બાળ કલાકરોએ અભિનય કરેલો છે તેવી હારૂન અરૂન ફિલ્મ દર્શાવવામાં આવશે. આ ઉપરાંત ભુજનાં ૪, ગાંધીધામનાં ૪ અને માંડવી તેમજ અંજારમાં ૧ સિનેમાગૃહમાં બાળકોને વિનામૂલ્યે ફિલ્મો બતાવવામા આવશે. તો બીજીતરફ જ્યાં સિનેમાગૃહની સગવડ નથી તેવા વિસ્તારની હાઈસ્કૂલમાં ડીવીડી પર ફિલ્મ બતાવવાનં આયોજન તૈયાર કરવામાં આવ્યું છે. બાળફિલ્મ ઉત્સવ દરમિયાન બંદુ બોકસર, હેડાહોડા, એક અજુબા, સિકસર, અભય, રૈના, ચુટકુન કી મહાભારત, હાલો, કરામતી કોટ, કાયાપલટ સહિતની ફિલ્મ બતાવવામાં આવશે.
ઉલ્લેખનીય છે કે, જિલ્લાનાં અંદાજે વીસહજારથી વધારે વિદ્યાર્થીઓ વિનામૂલ્યે ફિલ્મોનો આનંદ માણવા ઉપરાંત જ્ઞાાનમાં અભિવૃદ્ધિ કરશે તેવું સત્તાવાર સૂત્રોએ જણાવ્યું હતું.