ખેડૂતોને ખુશ કરી ચૂંટણીમાં મત લણવાનું ગણિત ! - Sandesh
NIFTY 10,397.45 +37.05  |  SENSEX 33,844.86 +141.27  |  USD 64.7550 -0.04
1.6M
1M
1.7M
APPS

ખેડૂતોને ખુશ કરી ચૂંટણીમાં મત લણવાનું ગણિત !

 | 1:14 am IST

વોટ્સએપ કોર્પોરેટઃ કલ્પેશ શેઠ

’This year‘s Budget will consolidate these gains and particularly focus on strengthening agriculture and rural economy… My Government is committed for the welfare of farmers…!‘ નાણામંત્રી અરુણ જેટલીએ સાલ-૨૦૧૮ના બજેટનું પ્રવચન શરૂ કર્યું એના પાંચમાં ફકરામાં જ ખેતી વિકાસ, કૃષિ નિકાસ તથા ખેડૂતોની આવક વધારવાના પ્રયાસોની જાહેરાત શરૂ થઈ હતી…! યાદ રહે કે આગલા ચાર ફકરામાં NDA સરકારે અગાઉ શું કર્યું તેની વાતો હતી મતલબ કે બજેટની નાણાકીય જોગવાઈઓમાં સરકારે આ વખતે સંરક્ષણ, ઈન્ડસ્ટ્રી કે રેલવે કરતા પણ વધારે અર્થાત Top Priority કૃષિ કે કિસાનોને આપવાનો મનસૂબો જાહેર કર્યાે છે. યાદ રહે કે ગુજરાતની ચૂંટણીઓમાં BJP માત્ર છ મોટા શહેરોની બેઠકોના આધારે સરકાર ટકાવી શકી છે બાકી ગામડામાં હાલત ખરાબ થઈ છે. અહીં ગામડાં એટલે ખેડૂતો ગણીએ તો આ વખતના બજેટનો તાળો મળી જાય છે કે અહીં ખેડૂતોને ખુશ કરીને ચૂંટણીમાં વોટ લણવાનો સરકારનો પ્રયાસ છે.

ચૂંટણીનું ગણિત બાજુએ મૂકીએ તો દેખાય છે કે સરકારે આ વખતે સખાવતો, જાહેરાતો અને દેવા માફી કરવાને બદલે ખેડૂતને માર્કેટિંગના ફંડા શીખવાડીને વધુ કમાણી કરવાનો માર્ગ દેખાડયો છે. દેવા માફીનો આંશિક બોજો અંતે તો સરકારી બેન્કો પર પણ પડતો હોય છે…! અને સરકાર હવે વધુ માફી જાહેર કરે તો બેન્કોનું શું થાય તે સૌ જાણે છે.

નાણાકીય જોગવાઈની સીધી જાહેરાતો જોઈએ તો બજેટમાં ૨,૦૦૦ કરોડ રૂપિયાની જોગવાઈ સાથે દેશ ભરમાં ૨૨,૦૦૦ રૂરલ હાટ તથા ૫૮૫ મંડીઓને અપગ્રેડ કરવાની જાહેરાત કરાઈ છે. આ ઉપરાંત ઓપરેશન ગ્રીન અંતર્ગત એગ્રિકલ્ચર લોજિસ્ટિક વિકસાવવા માટે ૫૦૦ કરોડની જાહેરાત કરવામાં આવી છે. આ ઉપરાંત FPOને ૧૦૦ કરોડ રૂપિયા સુધીના ટર્નઓવર પર ૧૦૦ ટકા ટેક્સ લાભ આપવાની જાહેરાત થઈ છે. આ બધી જોગવાઈઓનો વેપારીઓ, ઉદ્યોગપતિઓ તથા ફાર્મર પ્રોડયૂસ કંપનીઓ (FPO) જો ઈમાનદારીથી લાભ લે તથા સરકારી સંસ્થાઓ સાથે સમન્વય થાય અને સમયસર નાણાં ફરતા થાય તો આ સાચા અર્થમાં ખેડૂતો સુધી લાભ પહોંચી શકશે.

માથે ચૂંટણીઓ છે એટલે મસમોટા આંકડાની જાહેરાતો વિના ચાલવાનું નથી, રૂરલ ઈન્ફ્રાસ્ટ્રક્ચર વિકસાવવા માટે ૧૪,૩૪,૦૦૦ કરોડ રૂપિયાની જોગવાઈ કરવામાં આવી છે. યાદ રહે કે આગામી બજેટ ચૂંટણીઓ પહેલાનું જ હશે, જે વોટ એકાઉન્ટ બની રહેશે જેમાં સરકાર મોટી સુવિધાઓ આપી શકે નહીં. વાતો તો એવી પણ છે કે જો આગામી ચોમાસું સારું જાય અને NDA સરવે કરાવે તેમાં જો ચિત્ર ઊજળું દેખાય તો મોદીજી આગામી ડિસેમ્બરમાં કે જાન્યુઆરીમાં એટલે કે મુદત પૂરી થયા અગાઉ ચારેક મહિના પહેલાં લોકસભાની ચૂંટણીઓ જાહેર કરી દે. આવા સંજોગોમાં સરકાર પાસે કામ કરવાના માત્ર આઠ મહિના બચે છે. સમજવું મુશ્કેલ છે કે આટલા ટૂંકા ગાળામાં સરકાર ૧૪,૩૪,૦૦૦ કરોડ રૂપિયા જેટલી મોટી રકમ વાપરી કેવી રીતે શકશે ? આવી જ એક બીજી જાહેરાત છે જેમાં સરકારે એગ્રિકલ્ચર ક્રેડિટનું લક્ષ્યાંક ગત સાલના ૧૦ લાખ કરોડથી વધારીને ૧૧ લાખ કરોડ કરવાની જાહેરાત કરી છે. ગત સાલની ૧૦ લાખ કરોડની જોગવાઈમાંથી કેટલા વપરાયા અને ક્યાં વપરાયા તે જાણવું જરૂરી છે. વળી જો ખરેખર વપરાયા તો પણ ગુજરાતમાં ખેડૂતોની નારાજગી દૂર થઈ નહીં તો આ નાણાં ક્યાં ગયા ? અહીં ટેન્નટ ફાર્મિંગનો કન્સેપ્ટ પણ ધ્યાનમાં લેવાયો છે, સરકારનું તારણ એવું છે કે દેશમાં હાલમાં ૬૦ ટકા ખેતી કોન્ટ્રાક્ટ ફાર્મિંગ પર ચાલે છે. આવા સંજોગોમાં ખેતી કરતા નાના ખેડૂતોને ક્રેડિટનો લાભ મળતો નથી. તેમને પણ આ યોજનામાં આ વર્ષે સાંકળી લેવામાં આવશે. હકીકતમાં કોન્ટ્રાક્ટ ફાર્મિંગમાં નાના કિસાનને મોટી કંપનીઓ સીધું વળતર આપી દેતી હોય છે. તો હવે શું મોટી કંપનીઓ આવા નાના ખેડૂતોના નામે ક્રેડિટ લેશે..? જવાબ માટે RTI દાખલ કરવી પડે એવું છે..!

અલબત્ત FPOને લાભ, ડેરિવેટિવ્ઝ પરના ટ્રાન્ઝેક્શન ચાર્જમાં ખેડૂતો માટે વિશેષ રાહત જેવા મુદ્દાઓ ખરા અર્થમાં ખેડૂતોને ફાયદા કરાવી શકે એમ છે. માત્ર જરૂર છે અમલની અને અમલદારોની ઈમાનદારીની…!