Statement By Mallya Is Factually False : FM Arun Jaitley
  • Home
  • Featured
  • વિજય માલ્યાને નાણાં મંત્રી અરૂણ જેટલીએ આપ્યો જડબાતોડ જવાબ

વિજય માલ્યાને નાણાં મંત્રી અરૂણ જેટલીએ આપ્યો જડબાતોડ જવાબ

 | 9:10 pm IST

વિજય માલ્યાએ ભારત છોડ્યા પહેલા નાણાં મત્રી સાથે મુલાકાત કરી હોવાના અહેવાલોનું અરૂણ જેટલીએ ખંડન કર્યું હતું. આ માટે અરૂણ જેટલીએ સોશિયલ મીડિયા પર બ્લોગનો સહારો લીધો હતો.

જેટલએ પોતાના બ્લોગમાં લખ્યું હતું કે, વિજય માલ્યા કહી રહ્યા છે કે, ભારત છોડ્યા પહેલા સેટલમેંટની ઓફર માટે તે મને મળ્યાં હતાં. પણ તથ્યાત્મક રૂપે આ નિવેદન તદ્દન ખોટું છે. 2014થી લઈને અત્યાર સુધીમાં મેં ક્યારેય વિજય માલ્યા સાથે મુલાકાત કરી જ નથી. મે માલ્યાને કોઈ એપોઈમેંટ આપી જ નથી. તેવામાં અમે બંને મળ્યા હોવાનો કોઈ પ્રશ્ન જ નથી.

પોતાના બ્લોગમાં અરૂણ જેટલીએ કહ્યું છે કે, જ્યારે માલ્યા રાજ્યસભાના સભ્ય હતાં ત્યારે તેઓ ક્યારેક ક્યારેક સદનમાં આવતા હતાં. સદનની કાર્યવાહી બાદ એક વાર હું મારી ઓફીસ તરફ જઈ રહ્યો હતો. ત્યારે તો દોડતા મારી તરફ આવ્યા હતાં. તે દરમિયાન તેમણે મને કહ્યું હતું કે, સેટલમેંટ માટે હું એક ઓફર આપવા તૈયાર છું. પરંતુ મેં તેમની આ ઓફર ક્યારેય જાણવાનો પ્રયાસ જ નહોતો કર્યો.

નાણાંમંત્રી અરૂણ જેટલીએ વધુમાં ઉમેર્યું હતું કે, મેં માલ્યાને કહ્યું હતું કે, મારી સામે ઓફર રાખવાનો કોઈ મતલબ નથી. તમારે આ વાત બેંક સમક્ષ કરવી જોઈએ. જેટલીએ કહ્યું હતું કે, માલ્યાના હાથમાં જે પેપર હતાં તે તેને મેં હાથમાં પણ નહોતા લીધા.

જેટલીએ માલ્યાને જવાબ આપતા કહ્યું હતું કે, માલ્યાએ રાજ્યસભાના સભ્ય તરીકે થયેલી મારી મુલાકાતનો ખોટો લાભ લીધો. મારા તરફથી માલ્યાને મળવા માટેની એપોઈમેન્ટ આપવાનો પ્રશ્ન જ ઉભો થતો નથી.

ઉલ્લેખનીય છે કે, વિજય માલ્યાને ભારત લાવવાને લઈને બ્રિટનના લંડન સ્થિત વેસ્ટમિંસ્ટર સ્થિત કોર્ટમાં આજે સુનાવણી હાથ ધરવામાં આવી હતી. સુનાવણી બાદ વિજય માલ્યાને જ્યારે નાણાં મંત્રી સાથેની મુલાકાત વિષે પુછ્યું તો માલ્યાએ ધડાકો કરતા કહ્યું હતું કે, તેઓ આ બેઠકને લઈને વિસ્તારપૂર્વક જાણકારી આપી શકે તેમ નથી. વાતચીત દરમિયાન માલ્યાએ કહ્યું હતું કે, તેઓ કોર્ટમાં દેખાડવામાં આવેલા વીડિયોને લઈને પ્રભાવિત છે. માલ્યાએ એમ પણ કહ્યું હતું કે, મારા પરના બાકી દેવાને લઈને તેમણે બેંકોને અનેક પત્ર લખ્યા હતાં, પરંતુ બેંકોએ તેમના પત્રો પર જ સવાલ ઉભા કર્યાં હતાં.