દાઉદનું જબીર મોતીના નામે વિશ્વમાં ૩૦૦૦ કરોડનું રોકાણ   - Sandesh
  • Home
  • Mumbai
  • દાઉદનું જબીર મોતીના નામે વિશ્વમાં ૩૦૦૦ કરોડનું રોકાણ  

દાઉદનું જબીર મોતીના નામે વિશ્વમાં ૩૦૦૦ કરોડનું રોકાણ  

 | 3:35 am IST

। મુંબઈ ।

અંડરવર્લ્ડ ડોન દાઉદ ઇબ્રાહિમના મુખ્ય સાથી જબીર મોતીની સ્કોટલેન્ડ યાર્ડની એક્સ્ટ્રાડિશન યુનિટે બ્લેકમેલ કરવાનું કાવતરું, ગેરકાયદે ડ્રગ ઇમ્પોર્ટ અને અમેરિકામાં મની લોન્ડરિંગ કરવાના આરોપ હેઠળ ધરપકડ કરી હતી.

મુંબઈ પોલીસે જબીર મોતીની જે કુંડળી કાઢી છે, તેના પરથી એવું જાણવા મળે છે કે ડી કંપનીમાં તેની કમાણી દાઉદ ઇબ્રાહિમના ભાઇ અનીસ ઇબ્રાહિમથી પણ વધારે છે. મુંબઈના ટોચના એક પોલીસ અધિકારીના જણાવ્યા અનુસાર દાઉદે આખા વિશ્વમાં જબીરના નામે રૂ. ૩૦૦૦ કરોડનું રોકાણ કર્યું છે.

ઉલ્લેખનીય છે કે પાકિસ્તાની નાગરિક જબીર મોતીવાલાની મેટ્રોપોલિટન પોલીસે ઓગસ્ટ મહિનામાં પેડિંગટન વિસ્તારમાં આવેલી એક હોટેલમાંથી ધરપકડ કરી હતી.

મુંબઈ પોલીસમાં કાર્યરત ટોચના અધિકારીએ વધુમાં માહિતી આપતાં જણાવ્યું હતું કે એ સાચું છે કે અનીસ ડોન દાઉદ ઇબ્રાહિમનો સગો ભાઇ છે, પણ દાઉદને એ વાતની જાણ છે કે અનીસ હાલમાં દુનિયાની તમામ તપાસ એજન્સીઓના રડાર પર છે.

આ માટે જ અનીસની તમામ કમાણી તપાસના ઘેરામાં આવી શકે છે, જ્યારે જબીર મોતી સાથે એવું થવાનું નહોતું. પખવાડિયા પહેલાં જબીરની ધરપકડ થઇ તે પહેલાં ભાગ્યે જ કોઇએ તેનું નામ સાંભળ્યું હશે. એટલે જ દાઉદે જબીરના નામે રોકાણ શરૂ કર્યું હતું.   અંડરવર્લ્ડ ડોન દાઉદે મોતી મારફતે મિડલ ઇસ્ટ, યુકે, યુરોપ, આફ્રિકા અને દક્ષિણ પૂર્વ એશિયામાં કરોડો રૂપિયાની મિલકત બનાવી હતી.

મોતીએ રિયલ એસ્ટેટમાં સૌથી વધારે રોકાણ કર્યું છે. દાઉદનો ઇતિહાસ ગોલ્ડ સ્મગલિંગનો રહ્યો છે, જ્યારે જબીર મોતીએ દાઉદના કહેવા પર સ્મગલિંગ નહીં પણ સીધું ગોલ્ડમાં રોકાણ કર્યું હતું. તપાસમાં એવું પણ બહાર આવ્યું છે કે જબીરની દાઉદની પત્ની મહજબીન, દીકરી મહરીન અને જમાઇ જુનૈદ સાથે ઘણી આર્િથક લેતીદેતી થઇ છે.   દાઉદના ડાબા હાથસમા જબીર મોતીની ધરપકડ બાદ એક વાત તો ચોક્કસ છે કે ડી કંપનીના આર્િથક વ્યવહારની ઘણી કડી મુંબઈ પોલીસને મળી શકે છે. જબીરની પૂછપરછ કરી રહેલી સ્કોટલેન્ડ યાર્ડની પોલીસ સાથે મુંબઈ પોલીસ સતત સંપર્ક છે. ડ્રગ્સ અને ગોલ્ડ સ્મલિંગના કાળા કારોબારની કમાણી દાઉદે મોતી સાથે મળી રિએલ ઔએસ્ટેટ અને અન્ય ધંધામાં વાળી હોવાથી એ વિષે વધુ માહિતી મેળવવાનો પ્રયાસ મુંબઈ પોલીસ કરી રહી છે.

લંડન પોલીસ પાસેથી મેળવાઇ રહી છે જાણકારી

દાઉદ ઇબ્રાહિમની ડી કંપનીમાં જબીર મોતી ટોચના સ્થાને એટલે કે બીજા નંબરે આવે છે. મુંબઈના એક ટોચના અધિકારીના જણાવ્યા અનુસાર શકીલ અને અનીસનો આતંક અને તેઓનો ગેરકાયદે ધંધો માત્ર ભારત અને દુબઇ સુધી જ સીમિત હતો, જ્યારે જબીર મોતીએ તો એ દેશોમાં પણ ધંધો ફેલાવ્યો હતો જ્યાં તપાસ એજન્સીઓને પગેરું મેળવતાં વર્ષોનાં વર્ષ લાગી જાય. જબીરની ધરપકડ બાદ મુંબઈ પોલીસ એ જાણકારી મેળવી રહી છે કે મોતીના માધ્યમથી દાઉદે મુંબઈ કે પછી ભારતના અન્ય શહેરમાં તો પ્રોપર્ટી નથી બનાવીને. લંડન પોલીસ પાસેથી આ અંગેની જાણકારી મેળવાઇ રહી છે.