Maharashtra Crisis Shiv Sena Shocked After Sharad Pawar Statement
  • Home
  • Featured
  • શરદ પવારના નિવેદનથી શિવસેનાને લાગ્યો આઘાત!, હવે બની રહ્યો છે પ્લાન B

શરદ પવારના નિવેદનથી શિવસેનાને લાગ્યો આઘાત!, હવે બની રહ્યો છે પ્લાન B

 | 10:54 am IST

કોંગ્રેસ અધ્યક્ષ સોનિયા ગાંધી સાથે મુલાકાત બાદ એનસીપી સુપ્રીમો શરદ પવારના નિવેદને શિવસેનાની અંદર ચિંતા વધારી દીધી છે. પવારે સોમવારના રોજ મુલાકાત બાદ કહ્યું હતું કે તેમણે સોનિયા ગાંધીની સાથે ના તો શિવસેના અને ના તો સરકાર બનાવા અંગે વાત કરી. પવારના આ નિવેદનથી શિવસેનાના નેતાની સાથો સાથ કાર્યકર્તા પણ ભ્રમની સ્થિતિમાં પહોંચી ગયા છે. બદલાતી પરિસ્થિતિમાં શિવસેનાના નેતા પડદાની પાછળથી કહેવા લાગ્યા છે કે પાર્ટી માટે એ સારું હશે કે તેઓ એનસીપી સાથે વાતચીત છોડી ભાજપની સાથે ફરીથી સરકાર બનાવે.

શિવસેનામાં અંદરખાને ઉઠવા લાગ્યો આ અવાજ

શિવસેનાના એક ધારાસભ્ય એ કહ્યું કે તેમને શરદ પવારનું નિવેદન સાંભળી આઘાત લાગ્યો છે. શિવસેનાના ધારાસભ્ય એ કહ્યું કે અમારી પાર્ટીએ રાહ જોવી જોઇએ અને એનસીપી સુપ્રીમોની સાથે જતા પહેલાં 10 વખત વિચાર કરવો જોઇએ. બીજીબાજુ શિવસેનાના એક પદાધિકારીએ પ્રશ્ન કર્યો કે આ કેવા પ્રકારનું રાજકારણ છે? શિવસેના જેવી પાર્ટી જે 80 ટકા સામાજિક સેવા અને 20 ટકા રાજનીતિ કરે છે તેના માટે એ શ્રેષ્ઠ હશે કે તેઓ એનસીપી-કોંગ્રેસથી દૂર રહે અને ભાજપની સાથે હાથ મિલાવી લે.

સંજય રાઉતે ટ્વીટ કરી દીધા રાજકીય સંકેત

બીજીબાજુ આ આખા મુદ્દાને લઇ દરરોજ ટ્વીટ કરનાર શિવસેનાના પ્રવકતા સંજય રાઉતે મંગળવારના રોજ ટ્વીટ કરી કહ્યું કે જો જિંદગીમાં કંઇ મેળવવું હોય તો રીત બદલો ઇરાદા નહીં…જય મહારાષ્ટ્ર. તેમનું ટ્વીટ એ વાતનો સંકેત આપી રહ્યું છે કે શિવસેના સરકાર બનાવા માટે દરેક પ્રકારના વિકલ્પ પર કદમ વધારવા તૈયાર છે. આની પહેલાં રાઉતે શરદ પવારના નિવેદન પર કહ્યું હતું કે સરકાર બનાવાની જવાબદારી શિવસેનાની નહોતી. આ તેમની જવાબદારી હતી, તેઓ ભાગી ગયા છે. પરંતુ મને વિશ્વાસ છે કે અમે ઝડપથી સરકાર બનાવી લઇશું. અત્યાર સુધી સરકાર બનાવાનો દાવો કરનાર સંજય રાઉતની જવાબદારીની વાત બતાવે છે કે કયાંકને કયાંક પેચ ચોક્કસ ફસાઇ ગયો છે.

પવારના કયા નિવેદનથી ઉહાપોહ વધ્યો?

આપને જણાવી દઇએ કે કોંગ્રેસ અધ્યક્ષ સોનિયા ગાંધી સાથે મુલાકાત બાદ એનસીપી ચીફ શરદ પવારે શિવસેનાની સાથે કોઇ મિનિમમ કોમન પ્રોગ્રામ પર સહમતિથી ઇન્કાર કરી દીધો હતો. એટલું જ નહીં તેમણે સરકારની રચનાને લઇ શિવસેનાને કોઇપણ પ્રકારનો વિશ્વાસ અપાવવાના પ્રશ્ન પર મૌન સેવી લીધુ હતુ. ત્યારબાદ શરદ પવારે ટ્વીટ કરી કહ્યું કે નવી દિલ્હીમાં આજે કોંગ્રેસ અધ્યક્ષ સોનિયા ગાંધીજી સાથે મુલાકાત કરી મહારાષ્ટ્રની રાજકીય પરિસ્થિતિઓ અંગે ચર્ચા કરી. આવનારા સમયમાં મહારાષ્ટ્રના રાજકારણની ગતિવિધિઓ પર અમારી નજર રહેશે. મહાગઠબંધનના મિત્ર પક્ષોને વિશ્વાસમાં લઇ અમે નિર્ણય કરીશું.

‘કોંગ્રેસ-એનસીપી સાથે ગઠબંધ નહીં કરે શિવસેના’

દક્ષિણ મુંબઇથી એક શિવસેનાના વરિષ્ઠ કાર્યકર્તાએ કહ્યું કે પાર્ટીએ કોંગ્રેસ-એનસીપીની સાથે ગઠબંધન કરવું જોઇએ નહીં અને જો ભાજપની સાથે તેના સંબંધ સહજ નથી તો તેણે એકલા ચાલવું જોઇએ. તેમણે કહ્યું કે જો ભાજપ નહીં તો શિવસેનાએ પોતાના એજન્ડાને ત્યાગ કર્યા વગર એકલા જવું જોઇએ. પાર્ટી જો સમાન વિચારધારાવાળી પાર્ટીની સાથે જવા માંગતી નથી તો તેણે એકલા લડવું જોઇએ.

આ બધાની વચ્ચે શિવસેનાના સૂત્રોએ કહ્યું કે પાર્ટી અધ્યક્ષ ઉદ્ધવ ઠાકરે એ સંજય રાઉતને પડદાની પાછળ ચાલી રહેલા રાજકારણ પર તેમને નજર રાખવાનું કહ્યું. રાઉતે સોમવારના રોજ મોડી સાંજે શરદ પવાર સાથે મુલાકાત કરી હતી. રાઉતે મુલાકાત બાદ મીડિયા સાથે વાતચીતમાં કહ્યું મેં પવારની સાથે રાજકારણના મુદ્દા પર ચર્ચા કરી નથી. અમે ખેડૂતોના મુદ્દા પર વાત કરી. તેમણે ફરીથી કહ્યું કે શિવસેનાના નેતૃત્વમાં સરકાર બનશે અને રાજ્યમાં રાષ્ટ્રપતિ શાસન માટે ભાજપ જવાબદાર છે.

આ વીડિયો પણ જુઓ – પંચમહાલના હાલોલ સહિત સમગ્ર જિલ્લામાં વરસાદ

નીચે આપેલી લીંક પર ક્લિક કરીને જોડાઓ સંદેશ ન્યૂઝ સાથે.

તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો Sandeshની નવી મોબાઇલ એપ્લિકેશન