મહેસાણાનાં મેવડમાં સદીઓથી ગરબા નહીં પરંતુ, ભવાઈના વેશ ભજવાય છે - Sandesh
  • Home
  • Mehsana
  • મહેસાણાનાં મેવડમાં સદીઓથી ગરબા નહીં પરંતુ, ભવાઈના વેશ ભજવાય છે

મહેસાણાનાં મેવડમાં સદીઓથી ગરબા નહીં પરંતુ, ભવાઈના વેશ ભજવાય છે

 | 2:56 am IST

મહેસાણા તા.૮

નવરાત્રિના કરિશ્માનો રંગ યુવાધનની રગેરગમાં વ્યાપ્યો છે અને આબાલ-વૃધ્ધોમાં શ્રધ્ધા-ભક્તિ અને સંગીત – નૃત્યનું તાદાત્મ્ય સર્જતા આ મહાપર્વની કાગડોળે રાહ જોતા હોય છે. તેવા સંજોગોમાં અહીં એક એવા ગામની વાત કરવી છે કે જ્યાં સદીઓથી નવરાત્રિ ઉજવાતી જ નથી !! મહેસાણા તાલુકાના મેવડ ગામમાં નવરાત્રી દરમિયાન સદીઓથી ભવાઈ વેશ ભજવવાની પરંપરા છે.

મહેસાણાથી અમદાવાદ તરફ જતા ધોરીમાર્ગ ઉપર આવેલા તાલુકાના મેવડ ગામની સ્થાપના થઈ ત્યારથી આજ સુધીમાં નવરાત્રિની ઉજવણી થઈ નથી. આજુબાજુનાં ગામડાં તેમજ જિલ્લાનાં નગરોમાં રાસ-ગરબાની રમઝટ મચતી હોય છે. ત્યારે આ ગામનાં આબાલ-વૃધ્ધોમાં ભવાઈ વેશ જોવાની પરંપરા છે. ગ્રામજનોનાં કુળદેવી મા ખોડિયારની નિશ્રામાં ગામની બાંધણી થઈ ત્યારથી જ નવરાત્રિમાં અહીં ભવાઈ વેશ ભજવવામાં આવે છે. બાજુમાં જ આવેલા જગુદણ ગામનાં નાયક પરિવાર માથે મેવડમાં ભવાઈ વેશ ભજવવાની પરંપરાગત જવાબદારી છે. જવાબદારી શબ્દ અહીં વસ્તુસ્થિતિ ઉપર પ્રકાશ ફેંકવા માટે વામણો છે. કારણ કે જગુદણના નાયકો માટે માત્ર જવાબદારી જ નહીં પરંતુ, માતાજીનું કરબઠું છે. મતલબ કે જગુદણમાં નાયક પરિવારોમાં ભવાઈ વેશ ભજવવા પર્યાપ્ત કલાકારો ન હોય તો તેની બહારથી વ્યવસ્થા તેમણે જ કરવી પડે છે!!

એક માતાજીનો અને બીજી ગામ સમસ્તનો, એમ બે ભવાઈ વેશ તેમણે ફરજિયાત પણે ભજવવા પડે છે અને ત્યારબાદની રાત્રિઓ દરમિયાન ગ્રામજનોની માનતાની ભવાઈઓનો વારો ચાલુ થાય છે. અન્ય ગામડાં અને નગરોમાં મા શક્તિ ઉપાસનાની રાત્રિઓ તો નવ દિવસ પૂરતી મર્યાદિત હોય છે. પરંતુ, મેવડમાં ભવાઈ વેશની રાત્રિઓ ક્યારેક પખવાડિયા સુધી પણ ઉજવાતી રહે છે.

નીચે આપેલી લીંક પર ક્લિક કરીને જોડાઓ સંદેશ ન્યૂઝ સાથે.

તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો Sandeshની નવી મોબાઇલ એપ્લિકેશન