મેદાન પર આવ્યું રોહિત શર્માનું વાવાઝોડું, એક ઇનિંગમાં બનાવી નાંખ્યાં બે-બે વિશ્વરેકોર્ડ - Sandesh
  • Home
  • Sports
  • Cricket
  • મેદાન પર આવ્યું રોહિત શર્માનું વાવાઝોડું, એક ઇનિંગમાં બનાવી નાંખ્યાં બે-બે વિશ્વરેકોર્ડ

મેદાન પર આવ્યું રોહિત શર્માનું વાવાઝોડું, એક ઇનિંગમાં બનાવી નાંખ્યાં બે-બે વિશ્વરેકોર્ડ

 | 1:37 pm IST

રોહિત શર્માના નામે આમ ઘણા ખરા વિશ્વ રેકોર્ડ છે, પરંતુ એક વિશ્વ રેકોર્ડ એવો પણ છે જેને તોડવો કોઇ પણ બેટ્સમેન માટે અશક્ય છે, આ વિશ્વ રોકોર્ડ રોહિતે ચાર વર્ષ પહેલા 13 નવેમ્બર 2014ના રોજ કોલકાતાના ઇડન ગાર્ડન મેદાન પર શ્રીલંકા વિરૂદ્ધ બનાવ્યો હતો. તે દિવસે રોહિતે વન-ડે ક્રિકેટમાં એક એવો સ્કોર બનાવી દીધો હતો, જે એક સમયે સંપૂર્ણ ટીમનો હોતો હતો.

રોહિતે શ્રીલંકા વિરૂદ્ધ ઇડન ગાર્ડનનાં મેદાનમાં રમાયેલ તે મેચમાં 264 રનની ઇનિંગ રમી હતી. આ ઇનિંગ દરમિયાન તેણે 173 બોલનો સામનો કરતા 33 ચોગ્ગા અને 9 સિક્સરો ફટકારતા 264 રન બનાવ્યા હતાં. રોહિતની આ ધમાકેદાર ઇનિંગના કારણે ભારતે આ મેચ 153 રનથી જીતી લીધી હતી. આ મેચમાં ટીમ ઇન્ડિયાના હિટમેને બે-બે વિશ્વરેકોર્ડ પોતાના નામે કર્યા હતાં.

પહેલો વિશ્વરેકોર્ડ તો એ કે આ કોઇ પણ બેટ્સમેન દ્વારા વન ડે ક્રિકેટનો સૌથી મોટો અંગત સ્કોર છે. બીજો એ કે આ ડબલ સેંચુરી સાથે જ રોહિત શર્મા વન ડે ક્રિકેટમાં બે ડબલ સેંચુરી ફટકારનાર દુનિયાનો પ્રથમ બેટ્સમેન બની ગયો હતો. જોકે, હવે રોહિત શર્માના નામે વન ડે ક્રિકેટમાં ત્રણ-ત્રણ ડબલ સેંચુરી છે. ખાસ વાત એ છે કે, રોહિતના આ બંન્ને વિશ્વ રેકોર્ડ આજે પણ યથાવત છે.

રોહિત શર્મા વન ડે ક્રિકેટમાં ત્રણ-ત્રણ ડબલ સેંચુરી ફટકારી ચૂક્યો છે. રોહિતે પોતાની પ્રથમ ડબલ સેંચુરી 2 નવેમ્બર 2013એ ઓસ્ટ્રેલિયા વિરૂદ્ધ બેંગ્લુરૂમાં બનાવી હતી. આ ઇનિંગમાં રોહિતે 209 રન બનાવ્યા હતાં. બીજી ડબલ સેંચુરી તેણે 13 નવેમ્બર 2014ના રોજ શ્રીલંકા વિરૂદ્ધ બનાવી હતી. આ મેચમાં હિટમેને 264 રનની ઇનિંગ રમી હતી. ત્રીજી ડબલ સેંચુરી રોહિતે શ્રીલંકા વિરૂદ્ધ ગત વર્ષે 2017માં બનાવી હતી.મોહાલીમાં રમાયેલ આ મેચમાં તેણે અણનમ 208 રનની ઇનિંગ રમી હતી. ત્રીજી ડબલ સેંચુરીમાં એેક ખાસ વાત હતી કે, તે વખતે રોહિત અણનમ રહ્યો હતો.