Siddhi vinayak temple of mumbai, if wish said in ear of mouse it fulfills
  • Home
  • Astrology
  • મુંબઈકરની આસ્થાનું કેન્દ્ર સિદ્ધિ વિનાયક, ઉંદરના કાનમાં ઈચ્છા કહેવાથી થાય છે પૂરી

મુંબઈકરની આસ્થાનું કેન્દ્ર સિદ્ધિ વિનાયક, ઉંદરના કાનમાં ઈચ્છા કહેવાથી થાય છે પૂરી

 | 7:13 pm IST

મુંબઈકરની આસ્થાનું પ્રતિક એવું શ્રી સિદ્ધિવિનાયક ગણપતિ મંદિર મુંબઈના પ્રભાદેવી વિસ્તારમાં આવેલું છે. સિદ્ધિવિનાયક એ ગણેશજીનું સૌથી લોકપ્રિય સ્વરૂપ છે. ગણેશજીની જે પ્રતિમાઓમાં સૂંઢ ડાબી તરફ વળેલી હોય, તે સિદ્ધપીઠ સાથે જોડાયેલ હોય છે અને તેથી જ આ ગણેશ પ્રતિમા જે મંદિરમાં છે તેને સિદ્ધિવિનાયક મંદિર કહેવાય છે.આ મંદિર વિશે એવી વાયકા છે કે જો સિદ્ધિ વિનાયક મંદિરમાં ઉંદરના કાનમાં તમારી ઈચ્છા કહેવામાં આવે તો તે ચોક્કસ પૂરી થાય છે.

સિદ્ધિવિનાયક મંદિર
ગણેશજીના ભક્તો વિશ્વના દરેક ખૂણે નિવાસ કરે છે, પરંતુ મહારાષ્ટ્ર ખાતે તેના ભક્તો સૌથી વધુ છે. સમૃદ્ધિના નગર મુંબઈના પ્રભાદેવી વિસ્તારમાં આવેલ સિદ્ધિવિનાયક મંદિર એવાં ગણેશ મંદિરો પૈકીનું એક છે, જ્યાં માત્ર હિંદુઓ જ નહીં, પણ દરેક ધર્મના લોકો દર્શન અને પૂજા-અર્ચના માટે આવે છે. અહીં ગણપતિ પૂજાનું ખાસ મહત્ત્વ છે.

આ ઉપરાંત મહારાષ્ટ્ર રાજ્યના અહમદનગર જિલ્લાના સિદ્ધ ટેકના ગણેશજી પણ સિદ્ધિવિનાયક નામથી જાણીતા છે અને તેની ગણના મહારાષ્ટ્રના અષ્ટવિનાયકના આઠ ઐતિહાસિક અને સુપ્રસિદ્ધ સ્થળોમાં કરવામાં આવે છે.

ઇતિહાસ
એક દંતકથા મુજબ, આ સિદ્ધિવિનાયક મંદિરનું નિર્માણ સંવત 1612માં થયું હતું. પરંતુ સત્તાવાર દસ્તાવેજો અનુસાર આ મંદિર 19 નવેમ્બર 1801ના રોજ પ્રથમ વાર બાંધવામાં આવ્યું હતું. સિદ્ધિવિનાયકનું આ પ્રથમ મંદિર ખૂબ જ નાનું હતું. છેલ્લા બે દાયકાઓમાં આ મંદિરમાં ઘણીવાર પુનઃનિર્માણ કરવામાં આવેલ છે. તાજેતરમાં એક દાયકા પહેલાં 1991ના સમયમાં મહારાષ્ટ્ર સરકાર તરફ્થી આ મંદિરના ભવ્ય નિર્માણ હેતુ 20 હજાર ચોરસ ફૂટ જમીન પૂરી પાડવામાં આવેલ છે.

મંદિરનું બાંધકામ
20 હજાર ચોરસ ફૂટ જમીનમાં સિદ્ધિવિનાયકનું પાંચ માળનું મંદિર બનાવવામાં આવ્યું છે, અને અહીં આ પ્રવચન ગૃહ, ગણેશ સંગ્રહાલય અને ગણેશ પીઠ ઉપરાંત બીજા માળ પર હોસ્પિટલ પણ છે, જ્યાં દર્દીઓને મફ્ત તબીબી સારવાર કરવામાં આવે છે. એ જ માળ પર રસોડું છે. અને ત્યાંથી એક લિફ્ટ સીધી ગર્ભગૃહમાં આવે છે. જેમાં પુજારી ગણપતિ માટે બનાવેલ પ્રસાદ અને લાડુ અહીંયાથી જ લાવે છે.

ગર્ભગૃહ
નવર્નિમિત મંદિરનો ‘ગભારો’ એટલે કે ગર્ભગૃહ એવી રીતે બનાવવામાં આવેલ છે કે જેથી વધુ ને વધુ ભક્તો ગણપતિના સભામંડપમાંથી દર્શન કરી શકે. પ્રથમ માળનો પ્રવેશ પણ એ રીતે બનાવેલ છે કે ભક્તો ત્યાંથી પણ સીધા દર્શન કરી શકે છે. અષ્ટકોણિય ગર્ભગૃહ 10 ફૂટ પહોળું અને 13 ફૂટ ઊંચું છે. ગર્ભગૃહના ચબૂતરા પર સોનેરી શિખરવાળો ચાંદીનો સુંદર મંડપ છે, જેમાં સિદ્ધિવિનાયક બિરાજમાન છે. ગર્ભગૃહમાં ભક્તો માટે જવા માટે ત્રણ દરવાજા છે જેના પર અષ્ટવિનાયક, અષ્ટલક્ષ્મી અને દશાવતારનાં ચિત્રો દોરવામાં આવેલ છે.

સામાન્ય રીતે આ મંદિરમાં દરેક મંગળવારના દિવસે વિશાળ સંખ્યામાં ભક્તો ગણપતિ દર્શન કરી પોતાની અભિલાષા પૂર્ણ કરે છે. અહીં મંગળવારે એટલી ભીડ હોય છે કે લાઈનમાં ચાર-પાંચ કલાક ઊભા રહ્યા પછી દર્શન કરી શકાય છે. દરેક વર્ષે ગણપતિ પૂજા મહોત્સવ અહીં ભાદરવા સુદ ચોથથી ભાદરવા સુદ ચૌદશ સુધી ભવ્ય રીતે ઉજવવામાં આવે છે.

દર્શનનો સમય
બુધવારથી સોમવાર સુધી દર્શન આરતીનો સમય

સવારે 5.30-6.30 કાકડ આરતી

6.00-12.15 શ્રી દર્શન

12.15-7.30 શ્રી દર્શન

7.30-8.00 આરતી

8.00-9.50 શ્રી દર્શન

9.50 મંદિર બારણું બંધ

મંગળવારના દિવસની ખાસ

આરતીનો સમય

3.15-4.45 શ્રી દર્શન

5.30-6.30 કાકડ આરતી

6.00-12.15 શ્રી દર્શન

12.15-12.30 નિવેદ

12.30-7.30 શ્રી દર્શન

7.30-8.00 આરતી

8.00-9.50 શ્રી દર્શન

કેવી રીતે જશો?

મહારાષ્ટ્ર રાજ્યના મુંબઇ શહેરમાં આવેલું સિદ્ધિવિનાયક મંદિર જવા માટે જે-તે સ્થળથી રેલવે, બસ કે હવાઇ મારફતે મુંબઇ પહોંચો. સિદ્ધિવિનાયક મંદિર પ્રભાદેવીમાં આવેલું છે. જે સરળતાથી મુંબઇ શહેરના કોઇપણ ભાગથી પહોંચી શકાય છે. તમે અહીં પહોંચવા માટે ટેક્સી, કાર, બસ, રિક્ષામાં જઇ શકો છો.

જો તમે ટ્રેન દ્વારા જવા ઇચ્છતા હોય તો મંદિરથી નજીકનું સ્ટેશન દાદર છે. ત્યાંથી 10 મિનિટનો રસ્તો છે, તમે ટેક્સી, રિક્ષામાં કે ચાલીને તમે મંદિર જઇ શકો છો.

આસપાસ જોવા

જેવા સ્થળ

હનુમાન મંદિર

હાજી અલી દરગાહ

મહાલક્ષ્મી મંદિર

શિવાજી પાર્ક