Surat Gang War: Gang Members betrays Surya Marathi
  • Home
  • Featured
  • સૂર્યા મરાઠીએ ઘરમાં જ પાળી રાખ્યા હતા સાપ, ગેંગના જ સભ્યોએ દુશ્મનો સાથે મિલાવ્યા હતા હાથ!

સૂર્યા મરાઠીએ ઘરમાં જ પાળી રાખ્યા હતા સાપ, ગેંગના જ સભ્યોએ દુશ્મનો સાથે મિલાવ્યા હતા હાથ!

 | 10:44 am IST

સૂર્યા મરાઠી હત્યાકાંડ સમગ્ર દક્ષિણ ગુચજરાતમાં ચર્ચાનું કેન્દ્ર બન્યો છે. રાજકારણીઓથી માંડી બિલ્ડરો સુધી ઘરોબો ધરાવાતાં સૂર્યાનું કાસળ કાઢવા તેના જ અંગત અને વિશ્વાસુ સાથીદારોને ઢાલ બનાવવામાં આવ્યા. સૂર્યાને મારવામાં સૂત્રધાર તરીકે ભૂમિકા ભજવનાર હાર્દિક એક સમયે તેનો રાઈડ હેન્ડ હતો. સૂર્યા સાથે મનદુખ થયા બાદ હાર્દિકે તેની સાથે છેડો ફાડી પરંતુ ગેંગના મજબૂત માણસોનો હાથ પકડી રાખ્યો હતો. સૂર્યા જેલમાં હતો ત્યારે હાર્દિક ગેંગના માણસોને સાચવતો હતો.

જમીન મિલકતની તકરારમાં સૂર્યાએ ધૂમ પૈસા બનાવ્યા પરંતુ આ કામમાં તેની સાથે રહેનારાઓને પૂરતું વળતર મળતું ન હોય તેઓ દુખી હતા. સૂર્યા તરફનો આ કચવાટ કે અસંતોષ હાર્દિક પારખી ગયો હતો. સૂર્યાથી અલગથી હાર્દિક અડાજણમાં સલમાન અને તેના માણસો સાથે ફરવા માડ્યો હતો. સાહીલ સિંધી સાથે હાર્દિકે સટ્ટા બેટિંગ અને વ્યાજ વટાવાનો ધંધો કરવા માડ્યો હતો. અહીં તેણે અલગ ગેંગ બનાવી અને સૂર્યાની ટોળકી ધીરે ધીરે વાયા હાર્દિક-સાહીલ સલમાનની આશ્રિત બનવા માડી હતી.

આ વાતનો આધાર સૂર્યાની હત્યાનો ઘટનાક્રમ છે. સૂર્યાની હત્યા માટે હાર્દિક પહોંચ્યો ત્યારે સૂર્યાની ઓફિસની બહાર જયેશ પોલ, સફી, વિકાસ બગડે, અમોલ બધા જ હતા. આ તમામને ખબર હતી કે સૂર્યા અને હાર્દિક વચ્ચે બનતું નથી. સૂર્યાએ સત્તર વખત હાર્દિકને સીધો કરી દેવાની વાત કરી હતી. આ જોતાં તેઓએ હાર્દિકને રોકવો જોઈતો હતો. રોકી શકાય તેમ ન હોય તો તેમની સાથે ઓફિસમાં જવું હતું, પરંતુ આમ થયું ન હતું. હથિયાર સાથે માણસો આવ્યા ત્યારે તેઓ શંકાસ્પદ ઈશારા કરતાં સીસીટીવીમાં દેખાય છે. આ ટોળકી ઓફિસમાં ઘૂસ્યા બાદ તેઓ પાછા નીકળે એની રાહ જોતાં હોય એવું પણ દેખાય આવે છે.

સૂર્યાને ઘા મરાયા ત્યારે બૂમાબૂમ થઈ ત્યારે પણ તેને બચાવવા કોઈ ગયું નહીં, પોલ એન્ડ કંપની કાંઈ નહીં તો છેલ્લે શટર-જાળી બંધ કરી હુમલાખોરોને અંદર બંધ કરી શક્યા હોત. પરંતુ આવું કોઈ કામ તેમણે કર્યું ન હતું. હાર્દિક એન્ડ કંપની ભાગી ગયા બાદ લોહીલુહાણ સૂર્યાને સારવાર માટે લઈ જવાની દરકાર પણ કોઈએ કરી ન હતી. પંદરથી વીસ મિનિટ સુધી સૂર્યા ઓફિસમાં પડી રહ્યો અને લોહી વહેતું રહ્યું. ત્યારબાદ સૂર્યાને પ્રાઈવેટ કારમાં હોસ્પિટલ લઈ જવાયો હતો. જો સૂર્યાના કહેવાતા વિશ્વાસુ તેને સમયસર હોસ્પિટલ લઈ ગયા હોત તો સૂર્યાનો જીવ બચી શકત. બીજી તરફ હાર્દિકને મહોરું બનાવી સૂર્યાની ગેમ કરવા આખી ગેંગ કોણે બનાવી એ મુદ્દો પણ ચર્ચાનું કેન્દ્ર બન્યો છે.

આ વીડિયો પણ જુઓઃ સૂર્યા મરાઠીની હત્યા બાદ મનુ ડાયાના પરિવારે કરી ઉજવણી

નીચે આપેલી લીંક પર ક્લિક કરીને જોડાઓ સંદેશ ન્યૂઝ સાથે.

તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો Sandeshની નવી મોબાઇલ એપ્લિકેશન