૨૦૧૭માં ગમ-ગવારમાં રોકાણકારોને ધૂમ રિટર્ન - Sandesh
NIFTY 10,378.40 -73.90  |  SENSEX 33,774.66 +-236.10  |  USD 64.2100 +0.00
1.6M
1M
1.7M
APPS

૨૦૧૭માં ગમ-ગવારમાં રોકાણકારોને ધૂમ રિટર્ન

 | 4:47 am IST

કોમોડિટી વોચઃ મિનિતા દવે

૨૦૧૭નું વર્ષ એગ્રિ કોમોડિટીમાં રોકાણકર્તા તેમજ સટ્ટો કરતા ખેલાડીઓ માટે ધારણા મુજબ ઉત્સાહજનક સાબિત થયું નથી. કેન્દ્ર સરકાર દ્વારા કોમોડિટી પર સતત નિયંત્રણો ઉપરાંત વૈશ્વિક બજારોની મોટી મૂવમેન્ટ અને અધૂરામાં ડોલર સામે રૂપિયો મજબૂત બનતા કોમોડિટી માર્કેટમાં મંદીનો માહોલ જોવા મળ્યો હતો. જેના કારણે એગ્રિ કોમોડિટીમાં રોકાણકર્તાને મોટી કમાણી નથી. જ્યારે બેઝમેટલ્સમાં રોકાણકારોને સારું રિટર્ન મળ્યું છે. જોકે, બૂલિયનમાં સોના-ચાંદીએ ફરી એક વખત રોકાણકારોને નિરાશ કર્યા છે. ૨૦૧૮નું વર્ષ શરૂ થઇ ચૂકયું છે ત્યારે એગ્રિ કોમોડિટીમાં રોકાણકારો માટે લાભદાયી બની રહેશે તેવું અંદાજાઇ રહ્યું છે. સરકારના આયાત પરના નિયંત્રણોને કારણે આયાત અટકશે અને કોમોડિટી માર્કેટમાં નવી તેજીનો પ્રારંભ થશે તે નક્કી છે, એટલું જ નહીં જો કરન્સી માર્કેટમાં રૂપિયા સામે ડોલર મજબૂત બને તો નિકાસ માટે પણ ઊજળી તકો રહેલી છે અને જેની સીધી અસર હાજર-વાયદા બજાર પર જોવા મળશે.

૨૦૧૭નું વર્ષ પૂરું થતાની સાથે જ એગ્રિ કોમોડિટીમાં રોકાણકારો ધારણા મુજબ હરખાયા નથી. રોકાણકારોને સરેરાશ ૫ ટકાથી ૬૦ ટકા સુધીનું આકર્ષક રિટર્ન મળ્યું છે. સૌથી વધુ રિટર્ન મેન્થાતેલમાં ૬૦ ટકા મળ્યું છે પરંતુ આ કોમોડિટીમાં રોકાણકારોની સંખ્યા કેટલી…જ્યારે હોટ કોમોડિટી ગણાતા એવા ગમ-ગવારમાં સરેરાશ ૨૭-૪૫ ટકા સુધીનું રિટર્ન મળ્યું છે. ગમ-ગવારમાં છેલ્લા ચાર-પાંચ મહિનામાં રોકાણકારો કમાયા છે. ક્રૂડની તેજીના કારણે ગમ-ગવારને સપોર્ટ મળ્યો છે. જ્યારે ઘાણા, જવ, એલચી, ઘઉં તથા રાયડામાં સરેરાશ ૮-૨૫ ટકા સુધીનું નેગેટિવ રિટર્ન મળ્યું છે. કોટન-કપાસમાં ૫-૯ ટકા જેટલું નજીવું રિટર્ન રહ્યું છે. કપાસ આગામી વર્ષે પણ હોટ કોમોડિટી બની રહેશે તે નક્કી છે કેમકે અત્યારે રૂના પાકનો અંદાજ ૩૭૫ લાખ ગાંસડી મુકાઇ રહ્યો છે પરંતુ જે ગતિએ આવકો થઇ રહી છે તેને ધ્યાનમાં લેતા ૩૫૦ લાખ ગાંસડીથી વધુના ઉત્પાદનની શકયતા નથી. મિલોની મોટા પાયે માગ છે. નિકાસમાં પણ વધારો થઇ રહ્યો છે જેના કારણે કપાસ હાજરમાં ૧૨૫૦ અને રૂના ભાવ ૪૫૦૦૦ની સપાટી કૂદાવે તો નવાઇ નહીં. બેઝ મેટલ્સમાં ૨૪ ટકા સુધીનું રિટર્ન છૂટયું છે. બુલિયન માર્કેટની વાત કરીએ તો સોનામાં માત્ર ૫ ટકા પોઝિટિવ રિટર્ન સામે ચાંદીએ બે ટકા જેટલું નેગેટિવ રિટર્ન આપ્યું છે. આગામી સમયગાળામાં ક્રૂડ-બેઝ મેટલ્સમાં તેજીના સંકેતો સામે બુલિયનમાં રોકાણ નબળું પુરવાર થાય તેવું એનાલિસ્ટો દર્શાવે છે.

એગ્રિ કોમોડિટીમાં તેજીની સાઇકલ શરૂ થઇ ચૂકી છે ત્યારે આગામી વર્ષે પણ એગ્રિ કોમોડિટીમાં જીરું, એરંડા, રાયડો તથા કોટન હોટ કોમોડિટી સાબિત થઇ શકે તેવી પ્રબળ શકયતાઓ રહેલી છે. પરંતુ આગામી સમયગાળામાં ડોલર સામે રૂપિયાની કેવી ચાલ રહે છે તેના પર તેજી-મંદીનો મુખ્ય આધાર રહેલો છે. જો ડોલર સામે રૂપિયો વધુ મજબૂત બને તો દેશમાંથી એગ્રિ કોમોડિટીની થઇ રહેલી નિકાસ અટકી જશે ઊલટું તેની સામે આયાત વધશે તો આવા સંજોગોમાં એગ્રિ કોમોડિટીમાં તેજીની સાઈકલને બ્રેક લાગી શકે છે.કોમોડિટી વાયદાના વેપાર માટે ૨૦૧૭નું વર્ષ મોટી ઊથલપાથલભર્યું હતું. આગામી સમયગાળામાં નવા વાયદા શરૂ કરવા સાથે વાયદાને વેગ મળશે તે નક્કી છે. કઠોળની મંદીને ધ્યાનમાં લેતા અન્ય કઠોળના વાયદાને પણ મંજૂરી મળે તો નવાઇ નહીં.

રવી વાવેતર વિસ્તારમાં વધારો ધ્યાનમાં લેતા ઘઉંનું રેકોર્ડ બ્રેક ૧૦૦૦ લાખ ટન ઉત્પાદન થવાનો અંદાજ અત્યારથી મુકાવા લાગ્યો છે. મોટા પાકને ધ્યાનમાં લેતા સરકાર આયાત ડયૂટી હાલના ૧૦ ટકાથી વધારીને ૨૦ ટકા કરશે તે નક્કી છે. ઘઉંના મોટા પાકના અહેવાલોના કારણે ભાવ સપાટી તૂટી રહી છે. એટલું જ નહીં રૂપિયાની મજબૂતીના કારણે અત્યારથી મોટા ભાગની મિલો આયાતી સોદા તરફ નજર દોડાવી રહી છે.

એગ્રિ કોમોડિટીનો આધાર કરન્સી પર નિર્ભર

એગ્રિ કોમોડિટીમાં તેજીની સાયકલ આગળ વધે તેવી પૂરેપૂરી શકયતા છે પરંતુ તેમાં કરન્સીની વધઘટના કારણે બ્રેક લાગે તો નવાઇ નહીં. એગ્રિ કોમોડિટીની તેજીનો મુખ્ય આધાર નિકાસ વેપાર પર રહેલો છે. જો રૂપિયા સામે ડોલર મજબૂત બને અને દિવેલ, કોટન-યાર્ન, મસાલાની નિકાસ વધે તો સ્થાનિક બજારોમાં હાજર તેમજ વાયદામાં તેજી લંબાઇ શકે તેમ છે. ઊલટું જો ખાદ્યતેલો, ઘઉં, ખાંડ તથા અન્ય એગ્રિ કોમોડિટીમાં આયાતને વેગ મળશે તો તેજીની સામે મંદી થાય તેવી પણ શકયતાઓ રહેલી છે.

મ્યુચ્યુઅલ ફંડ, બેન્કોને બજેટમાં મંજૂરીની શકયતા

કોમોડિટી વાયદાને વેગ આપવા માટે આગામી બજેટમાં બેન્કો તથા મ્યુચ્યુઅલ ફંડોને મંજૂરી આપવામાં આવે તો નવાઇ નહીં. ઓપ્શન વાયદા શરૂ થયા છે. પરંતુ ઓપ્શન ટ્રેડિંગમાં પ્રારંભિક ધોરણે ઘારણા મુજબની સફળતા જણાતી નથી. અત્યારે માત્ર સોનામાં જ ઓપ્શન ટ્રેડિંગ શરૂ થયું છે. એગ્રિ કોમોડિટીમાં ગવારમાં ઓપ્શનને મંજૂરી મળી છે પરંતુ જાન્યુઆરી મહિનામાં કમૂર્તા બાદ શરૂ થાય તેવા સંકેતો મળી રહ્યાં છે. કોમોડિટી વાયદાના વોલ્યુમને વેગ આપવા માટે સેબી દ્વારા સતત પ્રયત્નો થઇ રહ્યાં છે પરંતુ તે કેટલા સફળ થશે તે આવનારો સમય જ બતાવશે.

 

૨૦૧૭ના વર્ષમાં રોકાણકારો ગમ-ગવાર, કોટન-કપાસ, હળદર-મેન્થામાં શ્રેષ્ઠ રિટર્ન મેળવ્યા બાદ નવા વર્ષે કોટન, ધાણા-જીરું, રાયડો, હોટ કોમોડિટી બનશે

એગ્રિ કોમોડિટીની તેજી-મંદીની ચાલ ડોલરની મજબૂતાઇ પર નિર્ભર, મસાલા પાકોમાં ધાણા-જીરુંમાં તેજીના સંકેતો

એગ્રિ કોમોડિટીને બાદ કરતા બેઝમેટલ્સમાં રોકાણકારોને ધૂમ વળતર, બુલિયનમાં ચાંદીના રોકાણકારોમાં ચમક ઘટી

ગમ-ગવાર, કપાસ-કોટન, હળદર, મેન્થાતેલ તથા જીરુંમાં રોકાણકારોને ૫ થી ૬૦ ટકા પોઝિટિવ રિટર્ન છૂટયું

ધાણા, જવ, એલચી, ઘઉં તથા રાયડામાં રોકાણકારોને ૮-૨૫ ટકા સુધી નેગેટિવ રિટર્ન

દેશમાં રવી વાવેતર વિસ્તાર વધવા સામે ઉત્પાદન પણ ઊંચું રહેશે ખાસ કરીને ઘઉં, ચણામાં રેકોર્ડ ઉત્પાદનનો આશાવાદ

કઠોળના ખેડૂતોને આફત, પૂરતા ટેકાના ભાવ ન મળી રહ્યાં હોવા છતાં રવી સિઝનમાં ચણામાં રેકોર્ડ વાવેતર થયું