Women disease Treatment by Some Plants
  • Home
  • Agro Sandesh
  • મહિલા રોગોની સારવાર તરીકે વપરાતી આ વનસ્પતિઓના આટલા બધા ફાયદા

મહિલા રોગોની સારવાર તરીકે વપરાતી આ વનસ્પતિઓના આટલા બધા ફાયદા

 | 1:00 pm IST

નિરોગી રહેવું દરેકને ગમે,પરંતુ તાસીર મુજબ, ઉંમર મુજબ તેમજ લિંગના પ્રકાર મુજબ કેટલાક રોગો થવા પામે છે. મહિલાઓમાં માસિક સંબંધિત સમસ્યા જોવા મળતી હોય છે. જેવી કે અનાર્તવ (માસિક આવવું નહિ), કષ્ટાર્તવ (માસિક પીડા સાથે આવવું), અનિયમિત માસિક, માસિક વધુ આવવું (લોહીવા-રક્તપ્રદર), યોનિમાંથી સફેદ પાણી પડવું (શ્વેત પ્રદર), માસિક ઓછુ આવવુ વગેરે ગણાવી શકાય. આ ઉપરાંત યોનિકંડુ (યોનિ  અને ભગ પ્રદેશમાં ખંજવાળ), કોઠે રતવા (વારંવાર કસુવાવડ થવી) કે વંધ્યત્વ રહેવુ, સ્તન શોથ, સ્તનમાં દુઃખાવો, ગર્ભાશયનું કેન્સર, સ્તન કેન્સર, ધાવણ ઓછું આવવું, સૂતિકા જવર (સુવા રોગ), પાંડુરોગ વગેરે ગણાવી શકાય. મહિલા રોગોની સારવારમાં કેટલીક વનસ્પતિઓ ઉપયોગી પુરવાર થયેલ છે.

અશોક

અશોકનું વૈજ્ઞાનિક નામ સરાકા ઈન્ડીકા છે. અશોક વૃક્ષની છાલમાંથી અશોકારિષ્ટ નામની આયુર્વેદિક ષધ બને છે જે રક્તપ્રદર, શ્વેતપ્રદર, કષ્ટાર્તવ, અનિયમિત માસિક વગેરેમાં અપાય છે.

અરડુસી

અરડુસીનું વૈજ્ઞાનિક નામ આધાટોડા વેસિકા છે. અરડુસીના પાનનો રસ અને ધરો (ધ્રોખડ)નો રસ કાઢી સાકર ઉમેરી રક્તપ્રદર (માસિક વધુ આવવું), કષ્ટાર્તવ વગેરેમાં અપાય છે.

ઈસબગુલ

ઈસબગુલનું વૈજ્ઞાનિક નામ પ્લાન્ટેગો ઓવેટા છે. ઈસબગુલનાં બીજને ઓથમી જીરુ કહે છે. ઈસબગુલનાં બીજમાં સાકર અને ઘી મેળવી રક્તપ્રદર, શ્વેતપ્રદર, ઉનવા વગેરેમાં અપાય છે.

ઉમેરો

ઉમરાનું વૈજ્ઞાનિક નામ ફાયક્સ ગ્લોમેરાટા છે. ઉમરાનાં કાચા ટેટાને તોડીને ટૂકડા કરી પછી છાંયે સૂક્વીને બનાવેલ ચૂર્ણ દૂધ સાથે શ્વેત પ્રદર, કોઠે રતવા વગેરેમાં મહિલાને અપાય છે.

ઉલટકંબલ

ઉલટકંબલનું વૈજ્ઞાનિક એબ્રોમા ઓગસ્ટા છે. ઉલ્ટકંબલને ઋતુમતી પણ કહે છે. ઉલટકંબલનાં મૂળનો ઉકાળો અનાર્તવ, કષ્ટાર્તવ, અલ્પાર્તવ, અનિયમિત માસિક વગેરેમાં પ્રયોજાય છે.

આવળ

આવળનું વૈજ્ઞાનિક નામ કેસીયા રીક્યુલાટા છે. આવળનાં પાન અને પુષ્પોનો ઉકાળો શ્વેતપ્રદર વગેરેમાં અપાય છે.

અજમો

અજમાનું વૈજ્ઞાનિક નામ કેરમ કોપ્ટીકમ છે. અજમો મુખવાસ તરીકે અથવા અજમાનો ઉકાળો કષ્ટાર્તવ, અલ્પાર્તવ, અનિયમિત માસિક, કટિશૂળ વગેરે ગુણકારી સાબિત થયેલ છે.

સૂંઠ

આદુનું વૈજ્ઞાનિક નામ ઝિન્ઝીબર ઓફિસિનેલ છે. આદુનાં ગાંઠામૂળી કંદની સૂકવણી કરવાથી સૂંઠ બને છે. પ્રસૂતિ પછી પ્રસૂતા મહિલાને  સૂંઠ ધરાવતા લાડવા, સુખડી કે રાબ આપવાથી સૂતિકા જવર આવે નહિ, ગર્ભાશય પૂર્વવત્ થાય તેમજ ધાવણ પણ વધુ  આવે.

કપૂર કાચલી

કપુર કાચલીનું વૈજ્ઞાનિક નામ હેડીકિયમ સ્પિકેટમ છે. કપુરકાચલીને સંસ્કૃતમાં છર્દીરિયુ કહે છે. સગર્ભાવસ્થા દરમિયાન મહિલાને ઉલ્ટી થાય ત્યારે કપુરકાચલીનાં કંદનું ચૂર્ણ અપાય છે.

કુંવારપાઠું

કુંવારપાઠુનું વૈજ્ઞાનિક નામ એલો વેરા છે. કુંવારપાઠુને સંસ્કૃતમાં કુમારી કહે છે. આયુર્વેદિક ષધ કુમારી આસવ બનાવવામાં કુંવારપાઠુનાં પાનનો ગર વપરાય છે. કુમાર આસવ કષ્ટાર્તવ, અલ્પાર્તવ, અનિયમિત માસિક, શ્વેતપ્રદર વગેરેમાં અપાય છે. કુંવારનાં પાનનું શરબત લીંબુ અને ખાંડ સાથે બનાવી કષ્ટાર્તવમાં પ્રયોજી શકાય.

ખરખોડી

ખરખોડીનું વૈજ્ઞાનિક નામ લેપ્ટાડેનિયા રેટિક્યુલાટા છે. ખરખોડીને સંસ્કૃતમાં જીવંતી કહે છે. જીવંતી ધૃત બનાવવામાં ખરખોડી વપરાય છે જે કોઠે રતવા એટલે કે વારંવાર કસુવાવડ થતી હોય ત્યારે વૈદ્યરાજ સૂચવે છે.

ગાજર

ગાજરનું વૈજ્ઞાનિક નામ ડૌકસ કેરોટા છે. ગાજરનાં બીજ માસિક વર્ધક ગુણધર્મ ધરાવે છે. જેથી અનાર્તવ, કષ્ટાર્તવ, અલ્પાર્તવ, અનિયમિત માસિક વગેરેમાં ગાજરનાં બીજનું ચૂર્ણ અપાય છે.

જટામાંસી

જટામાસીનું વૈજ્ઞાનિક નામ નાર્ડોસ્ટેકિસ જટામાંસી છે. જટામાસીનાં મૂળનું ચૂર્ણ કષ્ટાર્તવ, અલ્પાર્તવ, અનિયમિત માસિક વગેરેમાં અપાય છે.

તકમરીયા

તકમરીયાનું વૈજ્ઞાનિક નામ ઓસિમમ કેનમ છે. તકમરીયાનાં બીજને પાણીમાં પલાળી તેમાં સાકર ઉમેરી શ્વેતપ્રદર, રક્તપ્રદર, કોઠે રતવા, ઉનવા વગેરેમાં અપાય છે.

નાગકેસર

નાગકેસરનું વૈજ્ઞાનિક નામ મેસુઆ ફેરીયા છે. નાગકેસરનાં સૂકા પુષ્પોનું ચૂર્ણ સાકર સાથે શ્વેતપ્રદર, રક્તપ્રદર વગેરેમાં વૈદ્યરાજ લેવાનું સૂચવે છે.

નિરંજનફળ

નિરંજનફળનું વૈજ્ઞાનિક નામ સ્ટરક્યુલિયા સ્કેફીજેરા છે. નિરંજનફળ બેથી ત્રણ નંગ પાણીમાં પલાળી તેમાં સાકર ઉમેરી બે-ત્રણ કલાક પછી તેને ગાળીને તેનું પાણી રક્તપ્રદર, શ્વેતપ્રદર વગેરેમાં અપાય છે.

પપૈયું

પપૈયાનું વૈજ્ઞાનિક નામ કરીકા પપાયા છે. પપૈયાનાં બીજ માસિકવર્ધક ગુણધર્મ ધરાવતા હોવાથી કષ્ટાર્તવ, અલ્પાર્તવ તેમજ અનિયમિત માસિકમાં પ્રયોજાય છે.

પુત્રંજીવા

પુત્રંજીવાનું વૈજ્ઞાનિક નામ ડ્રિપેટીસ રોક્ષબર્ધાઈ છે. પુત્રજીવાનાં ફળોની માળા સગર્ભાવસ્થા દરમિયાન પહેરવાથી કસુવાવડ થતી નથી એવું મનાય છે. પુત્રંજીવાનાં બીજનું ચૂર્ણ સંતાન પ્રાપ્તિ માટે વૈદ્યરાજ સૂચવે છે.

રતવેલિયો

રતવેલિયાનું વૈજ્ઞાનિક નામ ફાયલા નોડીફ્લોરા છે. રતવેલિયાનાં પંચાંગનો સ્વરસ કે ચૂર્ણ કોઠે રતવા, શરીરે રતવા, શ્વેતપ્રદર વગેરેમાં અપાય છે.

લીંડી પીપર

લીંડી પીપરનું વૈજ્ઞાનિક નામ પાયપર લોન્ગમ છે. લીંડીપીપરનાં મૂળ ગંઠોડા (પીપરીમૂળ) કહે છે. ગંઠોડાનું ચૂર્ણને સુખડી કે રાબ સ્વરૂપે પ્રસૂતિ પછી પ્રસૂતા મહિલાને અપાય છે જેનાથી ધાવણ વધુ આવે તેમજ સૂતિકા જવર આવે નહિ.

શતાવરી

શતાવરીનું વૈજ્ઞાનિક નામ એસ્પેરેગસ રેસીમોસસ છે. શતાવરી ચૂર્ણ શ્વેતપ્રદર તેમજ ગર્ભસ્થાન માટે વૈદ્યરાજ સૂચવે છે. પ્રસૂતિ પછી પ્રસૂતા મહિલાને ગરમ દૂધમાં સાકર અને શતાવરી ચૂર્ણ ઉમેરી આપવાથી ધાવણ વધુ આવે છે.

શિવલિંગી

શિવલિંગીનું વૈજ્ઞાનિક નામ ડિપ્લોસાયકલોસ પામેટસ છે. શિવલિંગીનાં બીજનું ચૂર્ણ માસિક સ્રાવ પૂર્ણ થયા પછી દૂધમાં સાકર સાથે સંતાનપ્રાપ્તિ માટે સતત અગિયાર લેવાનું વૈદ્યરાજ સૂચવે છે.

હીરાબોળ

હીરાબોળનું વૈજ્ઞાનિક નામ કોમ્મીફેરા મીર્હા છે. હીરાબોળનો ગુંદર માસિકવર્ધક ગુણ ધરાવે છે હીરાબોળ ધરાવતું ષધ કષ્ટાર્તવ, અલ્પાર્તવ, શ્વેતપ્રદર વગેરેમાં સૂચવાય છે.

રાતો શીમળો

રાતા શીમળાનું વૈજ્ઞાનિક નામ બોમ્બેક્ષ મલબેરિકા છે. રાતા શીમળાનાં ગુંદરને મોચરસ કહે છે. મોચરસનું ચૂર્ણ દૂધમાં સાકર સાથે રક્તપ્રદરમાં અપાય છે. રાતા શીમળાનાં સૂકા પુષ્પોનું ચૂર્ણ સાકર સાથે રક્તપ્રદર, શ્વેતપ્રદર વગેરેમાં અપાય છે.

હિંગ

હિંગનું વૈજ્ઞાનિક નામ ફેરુલા અસાફીટિડા છે. હિંગનું ચૂર્ણ કષ્ટાર્તવ, અલ્પાર્તવ વગેરેમાં અપાય છે. કષ્ટાર્તવમાં માસિક વખતે હિંગના પાવડરમાં પાણી ઉમેરી બનાવેલ લેપ પેડુ ઉપર લગાડવાથી પીડામાં રાહત મળી શકે.

નીચે આપેલી લીંક પર ક્લિક કરીને જોડાઓ સંદેશ ન્યૂઝ સાથે.

તમે અમને ફેસબુક, ટ્વીટર, ઇન્સ્ટાગ્રામ અને યુ ટ્યુબ પર પણ લાઇક અને ફોલો કરી શકો છો.

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો Sandeshની નવી મોબાઇલ એપ્લિકેશન