માન્યતા છે કે આ સમગ્ર મહિનામાં ભક્તિભાવથી કરવામાં આવેલી શિવ ઉપાસના વિશેષ ફળ આપે છે. જ્યોતિષશાસ્ત્ર મુજબ જે લોકોની કુંડળીમાં કાલસર્પ દોષ હોય તેઓ જો શ્રાવણ દરમિયાન કેટલાક વિશેષ ઉપાય કરે તો આ દોષની અશુભ અસર ઓછી થઈ શકે છે. ભગવાન શિવને સર્પોના સ્વામી માનવામાં આવે છે, તેથી તેમની આરાધનાથી કાળસર્પ દોષમાંથી રાહત મળવાની ધાર્મિક માન્યતા છે. આ વર્ષે શ્રાવણ મહિનાની શરૂઆત 30 જુલાઈથી થઈ છે અને તેનો સમાપન 28 ઓગસ્ટે થશે.
કાલસર્પ દોષ શું છે?
વૈદિક જ્યોતિષ અનુસાર જ્યારે જન્મકુંડળીના તમામ ગ્રહો રાહુ અને કેતુની વચ્ચે આવી જાય છે ત્યારે કાલસર્પ દોષ બને છે. આ સ્થિતિમાં રાહુને સર્પનું મસ્તક અને કેતુને સર્પની પૂંછડી માનવામાં આવે છે. ધાર્મિક માન્યતા મુજબ કાળસર્પ દોષના કારણે વ્યક્તિને જીવનમાં વારંવાર અવરોધો, માનસિક તણાવ, આર્થિક મુશ્કેલીઓ અને કાર્યમાં વિલંબ જેવી પરિસ્થિતિઓનો સામનો કરવો પડી શકે છે. જોકે, જ્યોતિષમાં તેના ઉપાયો પણ જણાવવામાં આવ્યા છે.
શ્રાવણમાં બિલ્વપત્રનો ઉપાય
શ્રાવણ મહિનાના દરેક સોમવારે ભગવાન શિવના મંદિરમાં જઈને શિવલિંગ પર 108 બિલ્વપત્ર અર્પણ કરવા શુભ માનવામાં આવે છે. બિલ્વપત્ર ચઢાવતી વખતે "ૐ નમઃ શિવાય" મંત્રનો જાપ કરવાથી વિશેષ પુણ્ય પ્રાપ્ત થાય છે એવી માન્યતા છે. ધાર્મિક માન્યતા મુજબ આ ઉપાયથી ભગવાન શિવ પ્રસન્ન થાય છે અને કાલસર્પ દોષની નકારાત્મક અસર ધીમે ધીમે ઓછી થવા લાગે છે. સાથે જ જીવનમાં સુખ, શાંતિ અને સકારાત્મક પરિવર્તન આવે છે.
મહામૃત્યુંજય મંત્ર મંત્રનો જાપ
શ્રાવણ દરમિયાન મહામૃત્યુંજય મંત્રનો જાપ અત્યંત ફળદાયી માનવામાં આવે છે.
"ૐ ત્ર્યંબકં યજામહે સુગંધિં પુષ્ટિવર્ધનમ્।
ઉર્વારુકમિવ બંધનાન્મૃત્યોર્મુક્ષીય મામૃતાત્॥"
આ મંત્રનો નિયમિત જાપ ઘરે અથવા શિવ મંદિરમાં કરી શકાય છે. માન્યતા છે કે આ મંત્રના જાપથી જીવનની અનેક મુશ્કેલીઓ દૂર થાય છે, માનસિક શાંતિ મળે છે અને કાળસર્પ દોષની અશુભ અસર પણ ઓછી થઈ શકે છે.
રુદ્રાભિષેક કરવાનું મહત્વ
શ્રાવણના દરેક સોમવારે રુદ્રાભિષેક કરવો પણ અત્યંત શુભ માનવામાં આવે છે. ગંગાજળ, દૂધ, દહીં, ઘી અને મધનું મિશ્રણ બનાવી શિવલિંગ પર અભિષેક કરવાથી ભગવાન શિવની વિશેષ કૃપા પ્રાપ્ત થાય છે એવી ધાર્મિક માન્યતા છે. વૈદિક મંત્રોચ્ચાર સાથે કરવામાં આવેલ રુદ્રાભિષેકને જીવનમાં સકારાત્મક ઊર્જા, સુખ-સમૃદ્ધિ અને શાંતિ લાવનાર માનવામાં આવે છે.
ધાર્મિક પરંપરાઓ અનુસાર શ્રદ્ધા, નિયમ અને ભક્તિભાવથી કરવામાં આવેલી શિવ ઉપાસના વ્યક્તિને આધ્યાત્મિક શક્તિ આપે છે અને જીવનના અનેક અવરોધો દૂર કરવામાં સહાયક બને છે. જોકે, કાલસર્પ દોષ અને તેના ઉપાયો અંગે જુદી જુદી જ્યોતિષીય માન્યતાઓ છે. વ્યક્તિગત કુંડળી અનુસાર યોગ્ય માર્ગદર્શન માટે અનુભવી જ્યોતિષીની સલાહ લેવી વધુ યોગ્ય માનવામાં આવે છે.
આ પણ વાંચો: Grah Gochar: 3 ઓગસ્ટે સૂર્યનું આશ્લેષા નક્ષત્રમાં ગોચર, આ રાશિના જાતકોને મળશે સફળતા
(Disclaimer: આ સમાચારમાં આપવામાં આવેલી માહિતી ધાર્મિક માન્યતાઓ અને સામાન્ય માહિતી પર આધારિત છે. (sandesh news) સંદેશ ન્યૂઝ આની પુષ્ટિ કરતું નથી.)
