મૃત્યુ પછી અંતિમ સંસ્કાર કરવામાં આવે છે. હિંદુ ધર્મમાં જણાવાયેલા 16 સંસ્કારોમાં અંતિમ સંસ્કારનો પણ સમાવેશ થાય છે. મૃત્યુ બાદ મૃતકની અંતિમ યાત્રા કાઢવામાં આવે છે. હિંદુ ધર્મમાં અંતિમ યાત્રાને વિશેષ મહત્વ આપવામાં આવ્યું છે. કોઈ વ્યક્તિ લાંબું આયુષ્ય જીવીને મૃત્યુ પામ્યો હોય કે કોઈનું અકાળે અવસાન થયું હોય, બંને પરિસ્થિતિમાં અંતિમ યાત્રા કાઢવામાં આવે છે. હિંદુ માન્યતાઓ અનુસાર અંતિમ યાત્રા કાઢવાથી મૃત આત્માને શાંતિ મળે છે.
સાથે જ અંતિમ યાત્રામાં સામેલ થનારા લોકોની પણ મનકામનાઓ પૂર્ણ થાય છે. આપણે સૌએ ક્યારેક ને ક્યારેક રસ્તામાં અંતિમ યાત્રા જોઈ જ હશે. ઘણા લોકો એવું માને છે કે અંતિમ યાત્રા જોવાથી દિવસ ખરાબ જાય છે. કેટલાક લોકો તો ભૂલથી અંતિમ યાત્રામાં સામેલ વ્યક્તિને સ્પર્શ થઈ જાય તો ઘરે આવીને સ્નાન પણ કરે છે. જો તમે પણ અંતિમ યાત્રાને અશુભ માનો છો, તો તમને જણાવી દઈએ કે હિંદુ ધર્મમાં અંતિમ યાત્રા જોવી અશુભ નહીં પરંતુ શુભ માનવામાં આવે છે. ચાલો જાણીએ કે રસ્તામાં અંતિમ યાત્રા દેખાય તો તે કયા સંકેતો આપે છે.
ક્યાંક જતા સમયે રસ્તામાં અંતિમ યાત્રા દેખાવું ખૂબ જ શુભ માનવામાં આવે છે. શુકન શાસ્ત્ર મુજબ, જો તમને રસ્તામાં અંતિમ યાત્રા દેખાય તો તે એ વાતનો સંકેત માનવામાં આવે છે કે તમે જે કામ માટે જઈ રહ્યા છો તેમાં તમને સફળતા મળી શકે છે. અંતિમ યાત્રા દેખાય ત્યારે હાથ જોડીને પ્રણામ કરવા જોઈએ. જો અંતિમ યાત્રા કોઈ પોતાના અથવા ઓળખીતાની હોય તો તેને ખભો આપવો જોઈએ. આવું કરવાથી પુણ્યની પ્રાપ્તિ થાય છે.
માન્યતા છે કે મૃત્યુ પામેલો વ્યક્તિ પરમાત્માની શરણમાં જાય છે, તેથી અંતિમ યાત્રા દેખાવી ઈશ્વરના આશીર્વાદ સમાન માનવામાં આવે છે. જો તમને અંતિમ યાત્રા દેખાય તો ‘રામ નામ’ લેવું અને બે મિનિટનું મૌન રાખવું જોઈએ. શક્ય હોય તો ફૂલ અર્પણ કરવા જોઈએ. આવું કરવાથી મૃત આત્માને શાંતિ મળે છે. જ્યારે સુહાગિન સ્ત્રીની અંતિમ યાત્રા દેખાય, ત્યારે પરંપરા અનુસાર સિંદૂરનું દાન કરવું શુભ માનવામાં આવે છે.
આ પણ વાંચો: Rahu Gochar: સાવધાન! 31 મેથી રાહુનું ગોચર વધારશે મુશ્કેલી, ધન સંકટ ઘેરી લેશે
(Disclaimer: આ સમાચારમાં આપવામાં આવેલી માહિતી ધાર્મિક માન્યતાઓ અને સામાન્ય માહિતી પર આધારિત છે. (sandesh news) સંદેશ ન્યૂઝ આની પુષ્ટિ કરતું નથી.)