આજના સમયમાં, રેફ્રિજરેટર, ટીવી અને એર કંડિશનર જેવા ઇલેક્ટ્રોનિક ગેજેટ્સ દરેક ઘરમાં આવશ્યક બની ગયા છે. પરંતુ શું તમે જાણો છો કે વાસ્તુ શાસ્ત્ર અનુસાર, જો આ ઉપકરણો ખોટી દિશામાં મૂકવામાં આવે તો તે ઘરની શાંતિ અને સુખને ખલેલ પહોંચાડી શકે છે? યોગ્ય દિશામાં મૂકવામાં આવેલા ઉપકરણો ઘરમાં સકારાત્મક ઉર્જા લાવે છે સાથે સાથે તમારા સ્વાસ્થ્ય અને નાણાકીય પરિસ્થિતિ પર પણ સકારાત્મક અસર કરે છે. ત્યારે આવો જાણીએ સુખ સમૃદ્ધિ માટે ઇલેક્ટ્રોનિક્સ ઉપકરણો કઇ દિશામાં મૂકવા જોઇએ.
રેફ્રિજરેટર મૂકવાની સાચી દિશા
રેફ્રિજરેટરને રસોડામાં અથવા લિવિંગ રૂમમાં મૂકતી વખતે, દિશા પર ખાસ ધ્યાન આપવું જોઈએ. વાસ્તુ અનુસાર, રેફ્રિજરેટર અગ્નિ અને પાણીનું મિશ્રણ છે.
શુભ દિશા: રેફ્રિજરેટર મૂકવા માટે દક્ષિણપશ્ચિમ દિશા શ્રેષ્ઠ માનવામાં આવે છે. જો જગ્યા મર્યાદિત હોય, તો તમે તેને ઉત્તરપશ્ચિમ દિશામાં પણ મૂકી શકો છો.
રેફ્રિજરેટરને ક્યારેય ઉત્તરપૂર્વ (ઈશાન ખૂણા) માં ન રાખો, કારણ કે આ ઘરમાં ઝઘડો વધારી શકે છે.
એર કંડિશનર (એસી) અને કુલર કઇ દિશામાં મૂકવું
એસી અને કુલર પાણી અને હવા તત્વોથી સંબંધિત છે. ગરમીથી રાહત આપતા આ ઉપકરણો યોગ્ય રીતે મૂકવામાં આવે તો તે તમારા સંબંધોને પણ ઠંડક આપી શકે છે.
શુભ દિશા: વાયવ્ય દિશા એસી અને કુલર માટે શ્રેષ્ઠ છે. તમે તેમને પૂર્વ અથવા ઉત્તરમાં પણ સ્થાપિત કરી શકો છો.
એસી અને કુલરને દક્ષિણપશ્ચિમ દિશામાં રાખવાનું ટાળો, કારણ કે આનાથી વારંવાર ઉપકરણો ખરાબ થઈ શકે છે.
ટેલિવિઝન કઇ દિશામાં મૂકવું ?
આજકાલ, ટીવી મનોરંજનનો મુખ્ય સ્ત્રોત છે, પરંતુ તેનું સ્થાન પરિવારના સભ્યોના સ્વભાવને અસર કરે છે.
શુભ દિશા: ટીવી જોતી વખતે પૂર્વ દિશા તરફ મુખ રાખવું શુભ માનવામાં આવે છે. બેડરૂમમાં ટીવી રાખવાનું ટાળો, કારણ કે તે ઊંઘ અને માનસિક શાંતિમાં ખલેલ પહોંચાડી શકે છે.
અન્ય વિદ્યુત ઉપકરણો માટે સૂચનો
રસોડામાં વપરાતા ગરમીના ઉપકરણો, જેમ કે માઇક્રોવેવ, ઓવન અથવા ટોસ્ટર, અગ્નિ તત્વનું પ્રતિનિધિત્વ કરે છે. તેમને રસોડાના દક્ષિણપૂર્વ ખૂણામાં મૂકવા જોઈએ. ધ્યાનમાં રાખો કે સિંક જેવા પાણીના સ્ત્રોત અને ઓવન કે ગેસ જેવા અગ્નિ સ્ત્રોત એકબીજાની બાજુમાં ન હોવા જોઈએ.