ગણપતિ બાપ્પા મોરયાનો પડઘો આપણા શરીરમાં એક અલગ પ્રકારની ઉર્જા લાવે છે. મહારાષ્ટ્રનો સૌથી મોટો તહેવાર ગણેશ ચતુર્થી આજથી શરૂ થઇ ચુક્યો છે. છેલ્લા કેટલાક વર્ષોથી, મહારાષ્ટ્ર સિવાય દેશના લગભગ દરેક ખૂણામાં લોકો આ તહેવાર ઉત્સાહથી ઉજવે છે. આ દિવસે લોકો ભગવાન ગણેશની મૂર્તિ ઘરે લાવીને તેમની પૂજા કરે છે. બાપ્પાને પહેલી વાર ઘરે લાવી રહેલા કેટલાક લોકો મૂંઝવણમાં છે કે તેમને કેટલા દિવસ ઘરે રાખવા જોઈએ? ચાલો આ પ્રશ્નનો જવાબ વિગતવાર જાણીએ.

મૂર્તિનું વિસર્જન કેટલા દિવસમાં કરવું જોઈએ

લોકો આ તહેવાર 10 દિવસ માટે ઉજવે છે. 10મા દિવસે, ઘણા લોકો ભગવાન ગણેશની મૂર્તિનું વિસર્જન કરે છે. ભગવાન ગણેશની મૂર્તિની સ્થાપનાથી લઈને તેના વિસર્જન સુધીના ઘણા નિયમો છે. ઇચ્છિત પરિણામ ફક્ત આ નિયમોનું પાલન કરવાથી જ પ્રાપ્ત થાય છે. કેટલાક લોકો બાપ્પાની મૂર્તિને આખા 10 દિવસ માટે ઘરે રાખે છે, જ્યારે કેટલાક લોકો ઓછા દિવસો માટે આ કરે છે.

ભગવાન ગણેશની મૂર્તિની સ્થાપના પછી, હંમેશા કોઈને ઘરે હાજર રહેવું જરૂરી છે

ભગવાન ગણેશની મૂર્તિની સ્થાપના પછી, હંમેશા કોઈને ઘરે હાજર રહેવું જરૂરી છે. આથી કેટલાક લોકો બાપ્પાની મૂર્તિને ઓછા દિવસો માટે ઘરે રાખે છે. બીજી કોઇ અડચણ ન આવે તે માટે લોકો ઓછી સંખ્યામાં ગણેશજીને ઘરે રાખે છે ધાર્મિક માન્યતાઓ અનુસાર, ભગવાન ગણેશની મૂર્તિનું ત્રણ, પાંચ અને સાત દિવસ પછી પણ ભક્તિથી વિસર્જન કરી શકાય છે. કેટલાક લોકો દોઢ દિવસમાં પણ ભગવાન ગણેશની મૂર્તિનું વિસર્જન કરે છે.

ગણેશ ચતુર્થીની પૂજા આ રીતે કરો

ગણેશ ચતુર્થી દર વર્ષે ભાદ્રપદ મહિનાની શુક્લ પક્ષની ચતુર્થ તિથિએ ઉજવવામાં આવે છે. આ વર્ષે ગણેશ ચતુર્થી 27 ઓગસ્ટના રોજ છે અને ભગવાન ગણેશની મૂર્તિનું વિસર્જન અનંત ચતુર્દશીએ કરવામાં આવે છે. માન્યતા છે કે જો વિસર્જન અનંત ચતુર્દશીના દિવસે કરવામાં આવે તો ભગવાન ગણેશના અનંત આશીર્વાદ વરસે છે. સ્થાપન પછીની પૂજાની વાત કરીએ તો, બધી જ બાબતો વિધિપૂર્વક કરો. જેટલા દિવસો સુધી તમે ભગવાન ગણેશને રાખો છો, તેમને તેમનો મનપસંદ ભોગ ચઢાવો. દરરોજ આરતી કરો. તમે મૂર્તિને નજીકની કોઈપણ પવિત્ર નદીમાં વિસર્જન કરી શકો છો. જો આ શક્ય ન હોય, તો તમે તેને ઘરે ટબની મદદથી વિસર્જન કરી શકો છો. આ પછી, તે માટીનો ઉપયોગ કુંડામાં કરી શકાય છે.