ટાટા મોટર્સની પ્રથમ કૉમ્પેક્ટ SUV, ટાટા નેક્સૉન (Tata Nexon), ભારતીય બજારમાં એક ઐતિહાસિક સિદ્ધિ હાંસલ કરીને હવે તબાહી મચાવી રહી છે. 21 સપ્ટેમ્બર 2017 ના રોજ લૉન્ચ થયેલી આ SUV એ તમામ એન્જિન વિકલ્પો (પેટ્રોલ, ડીઝલ, ઇલેક્ટ્રિક અને CNG) સાથે અત્યાર સુધીમાં 9,10,181 યુનિટ્સના વેચાણનો આંકડો પાર કરી લીધો છે. નેક્સૉને લૉન્ચના 8 વર્ષ અને 1 મહિના બાદ 9 લાખ યુનિટ્સનું વેચાણ પૂર્ણ કર્યું છે. ખાસ કરીને, સપ્ટેમ્બર 2025 માં 22,573 યુનિટ્સના વેચાણ સાથે નેક્સૉને અત્યાર સુધીનું સૌથી વધુ માસિક વેચાણ નોંધાવ્યું છે. આ પ્રદર્શનના કારણે નેક્સૉન FY2026 ના પ્રથમ છ માસિક ગાળામાં ભારતની નંબર 1 SUV બની રહી છે.
ટાટા પંચનો બરાબરનો સાથ, 6.26 લાખ યુનિટ્સના વેચાણ સાથે તહેલકો
ટાટા નેક્સૉનની સાથે જ તેની સિબ્લિંગ મૉડેલ ટાટા પંચ (Tata Punch) પણ વેચાણ વધારવામાં મોટો ફાળો આપી રહી છે. આ મિની SUV એ બજારમાં ઓછી કિંમતે એક શક્તિશાળી અને આકર્ષક મૉડેલ તરીકે પોતાની જગ્યા બનાવી છે, જેણે પ્રીમિયમ હૅચબૅક અને કૉમ્પેક્ટ સિડાન કારોને પણ પડકાર ફેંક્યો છે. પંચે અત્યાર સુધીમાં 6,26,000 યુનિટ્સનું જબરદસ્ત વેચાણ કર્યું છે. ગયા વર્ષે તે બેસ્ટ સેલિંગ કાર હતી અને તેનું વેચાણ ફરી એકવાર વધી રહ્યું છે. આ બંને કારોનું સંયુક્ત વેચાણ 15 લાખ યુનિટ્સને વટાવી ગયું છે, જે ટાટા મોટર્સને પેસેન્જર વ્હીકલ માર્કેટમાં ફરી મજબૂત બનાવવાની રણનીતિને સંપૂર્ણપણે સફળ સાબિત કરે છે.
