લિક્વિડિટી અને ધિરાણને મોટું ઇંજન આપવાના આશયથી એક મોટા નીતિવિષયક પગલાંમાં આરબીઆઇએ રેપો રેટમાં અપેક્ષાથી પણ વધારે 50 બેસિસ પોઇન્ટનો ઘટાડો કરતાં અને સાથે સાથે કેશ રિઝર્વ રેશિયોમાં પણ 100 બેસિસ પોઇન્ટનો ઘટાડો કરતાં બેકિંગ શેરોમાં આજે આગઝરતી તેજી જોવા મળી હતી.
તેને પગલે બેંક નિફ્ટીએ ઇન્ટ્રા ડેમાં 56,695ની નવી વિક્રમી ટોચ બનાવી હતી અને દિવસને અંતે પણ તે 817 પોઇન્ટ એટલે કે 1.47 ટકા વધીને 56,578ની સપાટીએ એટલે કે વિક્રમી ટોચથી માત્ર 117 પોઇન્ટ નીચે બંધ રહ્યો હતો. આરબીઆઇનું આ પગલું બેંકો માટે ભંડોળનો ખર્ચ ઓછો કરશે અને ધિરાણનો વૃદ્ધિદર વધારશે એવા આશાવાદે ખાનગી બેંકોના શેરો તો રોકેટની જેમ ઉપર ગયા હતા અને નિફ્ટી પ્રાઇવેટ બેંક ઇન્ડેક્સ 1.79 ટકા વધીને બંધ રહ્યો હતો. આવી જ રીતે નિફ્ટી ફાયનાન્સિયલ સર્વિસીસ ઇન્ડેક્સમાં 1.75 ટકાનો જ્યારે પીએસયુ બેંક ઇન્ડેક્સમાં 0.58 ટકાનો વધારો નોંધાયો હતો. બેકિંગ ક્ષેત્ર માટે આરબીઆઇનું આ પગલું એટલું બધું મહત્ત્વનું છે કે નિષ્ણાતોએ વ્યાજદરમાં અને કેશ રિઝર્વ રેશિયોમાં ઘટાડાને બ્રમોસ મિસાઇલ સમાન ગણાવ્યું હતું. આવી જ આગઝરતી તેજી રિઆલ્ટી શેરોમાં પણ જોવા મળી હતી અને નિફ્ટી રિઆલ્ટી દિવસને અંતે 4.68 ટકા વધીને બંધ રહ્યો હતો. વિવિધ રિઆલ્ટી શેરોમાં ઇન્ટ્રા ડેમાં 8 ટકા સુધીનો વધારો નોંધાયો હતો. આરબીઆઇએ લીધેલા મહત્ત્વપૂર્ણ પગલાંને લીધે દેશમાં રિઆલ્ટી ક્ષેત્રની માંગ વધશે અને ખાસ કરીને એફોર્ડેબલ હાઉસિંગની માંગમાં નોંધાપાત્ર વધારો થશે એવી આશાએ રિઆલ્ટી શેરોમાં તેજી જોવા મળી હતી. આરબીઆઇએ આજે સતત ત્રીજી વાર રેપો રેટમાં ઘટાડો કર્યો છે અને આ ત્રણ વારમાં વ્યાજદરમાં કુલ 100 બેસિસ પોઇન્ટનો ઘટાડો કરવામાં આવ્યો છે.
