તાજેતરમાં સોનાના ભાવમાં અભૂતપૂર્વ ઉછાળો જોવા મળ્યો છે અને વર્ષ 2025માં જ સોનાના ભાવમાં 27 ટકા જેટલો વધારો જોવા મળ્યો છે તેના કારણે ઘરેણાંની ખરીદીમાં નોંધપાત્ર ઘટાડો નોંધાયો છે.

જ્વેલરી માર્કેટ માટે મુખ્ય માંગ લગ્નસરાની ખરીદીને કારણે હોય છે પરંતુ આ વર્ષે લોકોએ ઘરેણાંની ઓછી ખરીદી કરવાનો અને ઓછું વજન ધરાવતી જ્વેલરી ખરીદવાનું જ પસંદ કર્યું હોવાથી વેચાણમાં તીવ્ર ઘટાડો નોંધાયો છે. સામાન્ય રીતે અખાત્રીજના દિવસે સોનાના ઘરેણાનું સૌથી વેચાણ થતું હોય છે, પરંતુ ભાવ અત્યંત ઊંચા ગયો હોવાથી આ વર્ષે અખાત્રીજના દિવસે પણ વેચાણમાં નોંધપાત્ર ઘટાડો જોવા મળે એવી શક્યતા છે. આ વર્ષે અખાત્રીજ 30 એપ્રિલે છે. સોમવારે અમદાવાદના સ્થાનિક બજારમાં સોનાનો ભાવ પ્રતિ 10 ગ્રામ દીઠ 99,500ની વિક્રમી ટોચે પહોંચ્યો હતો. હાલમાં સોનાના જેવા ભાવ છે તેને ધ્યાનમાં રાખતા આ વર્ષે અખાત્રીજે જથ્થાની દ્રષ્ટિએ સોનાનું વેચાણ પાછલા વર્ષ જેટલું થાય એવી શક્યતા સાવ ઓછી છે, પરંતુ સોનાના ઘરેણાનું વેચાણ તો નોંધપાત્ર પ્રમાણમાં થશે એવી આશા વ્યક્ત કરતાં નિષ્ણાતો જણાવે છે કે સોનાના ભાવ ઐતિહાસિક સ્તરે હોવાથી લોકોને હવે ખરીદી પોષાય એમ નથી અને એના કારણે હવે લગ્નસરાની ખરીદીમાં પણ લોકો ઓછું વજન ધરાવતા ઘરેણાંની ખરીદી કરી રહ્યા છે.

2024-25માં સોનામાં ચાર દસકાનું સૌથી વધુ વળતર

સોનાના ભાવમાં વર્ષ 2024-25માં 39.75 ટકાનો વધારો નોંધાયો હતો, જ્યારે વર્ષ 2025માં અત્યાર સુધીમાં આ ભાવ 27 ટકા જેટલા વધ્યા છે. 2024-25માં સોનાએ જે વળતર આપ્યું તે છેલ્લા ચાર દસકામાં કોઇ પણ એક વર્ષમાં સોનાએ આપેલું સૌથી વધારે વળતર હતું. અગ્રણી વૈશ્વિક બેંક ગોલ્ડમેન સાક્સે તો હાલમાં ઊભી થયેલી વૈશ્વિક અનિશ્ચીતતાઓ ચરમસીમાએ પહોંચે તો ચાલુ વર્ષના અંત સુધીમાં સોનાના ભાવ ઔંસ દીઠ 3,700 ડોલરે પહોંચે એવી શક્યતા વ્યક્ત કરી છે.

હવે તેજી ધીમી ગતિએ આગળ વધશે । નિષ્ણાતોના મતે હવે સોનામાં તેજી ધીમી ગતિએ આગળ વધશે અને એક વાર આંતરરાષ્ટ્રીય બજારમાં સોનાના ભાવ પ્રતિ ઔંસ 3,520 ડોલરને સ્પર્શ કરે તે પછી સોનામાં ઘટાડાતરફી ચાલ જોવા મળે એવી શક્યતા છે અને આ ભાવ પ્રતિ ઔંસ 2,700 ડોલરના સ્તર સુધી નીચા આવી શકે છે. ટેકનિકલ ચાર્ટના આધારે આવો મત વ્યક્ત કરવામાં આવી રહ્યો છે. જોકે આગામી સમયગાળામાં સોનાના ભાવની ચાલ કેવી રહેશે તે બાબત ટ્રેડ વોરને કારણે ઊભી થયેલી અનિશ્ચીતતાઓ, મિડલ ઇસ્ટના તણાવ અને રશિયા-યુક્રેનના યુદ્ધ વગેરે પરિબળો પર આધાર રાખે છે.