સપ્ટેમ્બર, 2024ના અંતે ભારતીય શેરબજારના મુખ્ય સુચકાંકોએ વિક્રમી ટોચ બનાવી તે પછી ઓક્ટોબરથી મંદીનો દૌર શરૂ થયો હતો.
આ મંદીનો દૌર માર્ચના પ્રથમ સપ્તાહમાં તેની ચરમસીમાએ હતો જેને કારણે એ સમયે મિડ કેપ અને સ્મોલ કેપ ઇન્ડેક્સ તેમની વિક્રમી ટોચથી 22થી 25 ટકા જેટલા ઘટીને બેર ફેઝમાં પ્રવેશ્યા હતા. જોકે તે પછી માર્ચના અંતિમ સપ્તાહમાં એફઆઇઆઇએ કરેલી જંગી લેવાલીને પગલે આ સુચકાંકો વધતાં હાલમાં તેઓ વિક્રમી ટોચથી 15 ટકા જેટલા નીચા છે, પરંતુ મિડ કેપ અને સ્મોલ કેપ શેરોમાં આવી મંદીના કારણે આ કક્ષામાં આવતી કેટલીક કંપનીઓના પ્રમોટરોની મુશ્કેલી વધી છે અને તેમણે કંપનીના શેરો પ્લેજ કરીને લીધેલી લોનનું ચુકવણું કરવામાં નિષ્ફળ જતા લોન આપનારી સંસ્થાઓએ તેમના પ્લેજ કરેલા શેરોમાંથી કેટલોક હિસ્સો જપ્ત કર્યો હોવાના પણ અહેવાલ છે.
