આર્થિક કટોકટીનો સામનો કરતી વોડાફોન આઇડિયાએ સરકારને એવી ચેતવણી આપી છે કે જો તેને સરકાર તરફથી આર્થિક ટેકો નહીં આપવામાં આવે તો તે ચાલુ નાણાકીય વર્ષ 2025-26 પછીના વર્ષમાં તેનો કારોબાર આગળ ચલાવી શકે એવી સ્થિતિમાં નથી અને આવા સંજોગોમાં તેને નાદારી માટે અરજી ફાઇલ કરવી પડશે. આમ થવાથી સરકાર આ કંપનીમાં જે 49 ટકા હિસ્સો ધરાવે છે તેનું મૂલ્ય ઝીરો થઇ જશે, એમ પણ કંપનીએ જણાવ્યું છે એવી માહિતી સૂત્રોએ આપી હતી. ઉલ્લેખનીય છે કે તાજેતરમાં જ સરકારે વોડાફોન આઇડિયા પાસેથી લેવાના નીકળતાં વ્યાજના પૈસા સામે પોતાનો ઈક્વિટી હિસ્સો વધાર્યો તે પછી પણ કંપનીને હજી સરકારને એજીઆર અને સ્પેક્ટ્રના બાકી લેણા પેટે કુલ રૂ. 1.95 લાખ કરોડ ચુકવવાના થાય છે. લેણાની રકમ પેટે સરકારનો ઇક્વિટી હિસ્સો વધીને 49 ટકા થતાં કંપનીમાં હવે બે પ્રમોટર્સ આદિત્ય બિરલા જુથ અને વોડાફોન ગ્રુપનો હિસ્સો ઘટીને અનુક્રમે 9.5 ટકા અને 16.07 ટકા થઇ ગયો છે.

વોડાફોન આઇડિયા ભારતના ટેલિકોમ ક્ષેત્રની ત્રણ અગ્રણી કંપની પૈકીની એક છે અને તેનો બજાર હિસ્સો 18 ટકા જેટલો છે. હાલમાં કંપની એવો દાવો કરી રહી છે કે કંપની દ્રારા નવું રોકાણ કરવામાં આવ્યું અને સરકારની વ્યાજની બાકી રકમ પેટે ઇક્વિટી શેર જારી કરવામાં આવ્યા તેમ છતાં લેન્ડર્સ કંપનીને વધુ ધિરાણ કરવા તૈયાર નથી. જો કંપનીએ આપેલી ચેતવણી મુજબ તે નાદારી નોંધાવવા માટે અરજી કરશે તો તેના કારણે કંપનીના 20 કરોડ જેટલા ગ્રાહકો અને 20,000 સક્રિય કર્મચારીઓ પર તેની વિપરીત અસર થશે. દરમિયાન કંપનીએ સુપ્રિમ કોર્ટમાં એક અરજી કરી સરકાર દ્રારા કંપની પાસે એડજસ્ટેડ ગ્રોસ રેવન્યુ (એજીઆર) પેટે જે રૂ. 30,000 કરોડની રકમ લેણી નીકળે છે તેને જતી કરવા માંગ કરી હતી. ગુરુવારે સુપ્રિમે આ અરજીને દાખલ કરી છે અને તેની સુનાવણી માટે તૈયાર થઇ છે. આ જે રૂ. 30,000 કરોડની રકમ કંપનીએ સરકારને ચુકવવાની થાય છે તેમાં વ્યાજ, દંડ અને એજીઆરની બાકી રકમમાં દંડની રકમ પર લાગનાર વ્યાજનો સમાવેશ થાય છે. આ અંગેની સુનાવણી 19 મેના રોજ હાથ ધરાશે.

અગાઉ સર્વોચ્ચ અદાલતે 2021માં પોતે આપેલા આદેશની સમીક્ષા કરવાનો અને ટેલિકોમ ક્ષેત્રની બે અગ્રણી કંપની વોડાફોન આઇડિયા અને ભારતી એરટેલની એજીઆરના બાકી લેણાની ગણતરીમાં થયેલી ભૂલ સુધારવા માટે કરવામાં આવેલી અરજી ફગાવી દીધી હતી. આ ઉપરાંત સુપ્રિમે એજીઆર પેટે રૂ. 93,250 કરોડની બાકી રકમની ચુકવણી માટે 10 વર્ષની સમયમર્યાદા પણ નક્કી કરી હતી.

અગાઉ 2020માં સુપ્રિમે આપેલા પોતાના આદેશમાં સુપ્રિમે ટેલિકોમ વિભાગને જે કુલ ચુકવણી કરવાની થાય છે તેની 10 ટકા રકમ 31 માર્ચ, 2021 સુધીમાં ચુકવી દેવાનો નિર્દેશ આપ્યો હતો. આ આદેશ મુજબ બાકીની રકમ 1 એપ્રિલ, 2021થી 31 માર્ચ, 2031ના દસ વર્ષના સમયગાળામાં વાર્ષિક હપ્તાથી ચુકવવાની હતી. આ આદેશમાં સુપ્રિમે ટેલિકોમ વિભાગ દ્રારા કંપની પાસે જે લેણાંની રકમ નક્કી કરવામાં આવી હતી તેને માન્ય રાખી હતી અને તેની સમીક્ષા માટે કોઇ અવકાશ નથી એમ જણાવ્યું હતું.