આજે સપ્તાહના છેલ્લા ટ્રેડિંગ સેશનમાં યુએસ ડોલર સામે ભારતીય રૂપિયો 18 પૈસા ઘટીને 85.45ની સપાટીએ બંધ રહ્યો હતો. ભારત અને પાકિસ્તાન વચ્ચે વધતાં તણાવ અને ભારતીય શેરબજારમાં મંદીના માહોલને પગલે આજે પ્રારંભિક સુધારા પછી રૂપિયામાં ધોવાણ જોવા મળ્યું હતું અને દિવસને અંતે તે નરમાશ સાથે બંધ રહ્યો હતો. આ સાથે સાપ્તાહિક ધોરણે રૂપિયામાં 0.1 ટકાનો ઘટાડો નોંધાયો છે.
આજે ઇન્ટર બેંક ફોરેન એક્સચેન્જમાં રૂપિયો ગુરુવારની 85.27ની બંધ સપાટીની તુલનાએ 10 પૈસા વધીને 85.17 પર ખુલ્યો હતો. તે પછી ઇન્ટ્રા ડેમાં રૂપિયાએ 85.08ની હાઇ અને 85.65ની લો સપાટી બનાવી હતી અને દિવસને અંતે 18 પૈસા ઘટીને 85.45ની સપાટીએ બંધ રહ્યો હતો. નિષ્ણાતોના મતે આજે પણ રૂપિયો 85.08ની સપાટીએ ગયો હતો પરંતુ સપ્તાહમાં અગાઉ જોવા મળ્યું છે એમ 85ની સપાટી નજીક આવે એમ રૂપિયો પ્રતિકારનો સામનો કરે છે અને આજે ભારત અને પાકિસ્તાન વચ્ચે વધતાં તણાવને પગલે રૂપિયા આ સપાટીને પાર કરીને ઉપર જઇ શક્યો ન હતો.
