ભારતે ત્રાસવાદી હુમલાના જવાબમાં કરેલી ડિપ્લોમેટિક સ્ટ્રાઇકને પગલે જિયોપોલિટીકલ ટેન્શન ઊભું થતાં અને બેંકિગ તથા ફાયનાન્સિયલ શેરોમાં પ્રોફિટ બુકિંગ આવતા આજે ભારતીય શેરબજારમાં સતત સાત સેશનથી ચાલતી તેજી પર બ્રેક વાગી હતી અને સેન્સેક્સે 80,000નું સ્તર ગુમાવ્યું હતું, જ્યારે નિફ્ટી 24,250થી નીચે બંધ રહ્યો હતો. જોકે આજે ફાર્મા અને મેટલ શેરોમાં નોંધપાત્ર તેજી જોવા મળી હતી.

પ્રારંભે 58 પોઇન્ટ નીચામાં ખુલ્યા પછી સેન્સેક્સે ઇન્ટ્રા ડેમાં 80,173ની હાઇ અને 79,724ની લો સપાટી બનાવી હતી. આમ દિવસમાં કુલ 449 પોઇન્ટની વધઘટને અંતે સેન્સેક્સ 315 પોઇન્ટ એટલે કે 0.39 ઘટીને 79,801ની સપાટીએ બંધ રહ્યો હતો અને 80,000ની સપાટી પણ ગુમાવી હતી. નિફ્ટીએ પણ પ્રારંભમાં 51 પોઇન્ટ નીચામાં ખુલ્યા પછી ઇન્ટ્રા ડેમાં 24,347ની હાઇ અને 24,216ની લો સપાટી બનાવી હતી. આમ કુલ 131 પોઇન્ટની વધઘટને અંતે નિફ્ટી 82 પોઇન્ટ એટલે કે 0.34 ટકા ઘટીને 24,246ની સપાટીએ બંધ રહ્યો હતો. બીએસઇ મિડ કેપ ઇન્ડેક્સ પણ 69 પોઇન્ટ એટલે કે 0.16 ટકા ઘટીને 43,590ની સપાટીએ બંધ રહ્યો હતો, જ્યારે સ્મોલ કેપ ઇન્ડેક્સ 5 પોઇન્ટ એટલે કે 0.01 ટકા ઘટીને 49,267ની સપાટીએ બંધ રહ્યો હતો. એક માત્ર એસએમઇ આઇપીઓ શેરમાં તેજી જોવા મળી હતી અને બીએસઇ એસએમઇ આઇપીઓ ઇન્ડેક્સ 681 પોઇન્ટ એટલે કે 0.73 ટકા વધીને 94,403ની સપાટીએ બંધ રહ્યો હતો.

બીએસઇ પર આજે ટ્રેડ થયેલા કુલ 4,086 શેર પૈકી 1,920 વધીને, 2,015 ઘટીને અને 151 ફ્લેટ મથાળે બંધ રહ્યા હતા. બીએસઇનું એમ કેપ રૂ. રૂ. 429.63 લાખ કરોડ એટલે કે 5.02 ટ્રિલિયન ડોલર નોંધાયું હતું, જે ગઇકાલના રૂ. 430.47 લાખ કરોડથી રૂ. 84,000 કરોડનો ઘટાડો દર્શાવે છે. સેન્સેક્સના 30 પૈકી 13 શેર જ્યારે નિફ્ટીના 50 પૈકી 19 શેર વધીને બંધ રહ્યા હતા. સેન્સેક્સના શેરો પૈકી ઇન્ડસઇન્ડ બેંક 3.24 ટકા, અલ્ટ્રાટ્રેક સિમેન્ટ 1.77 ટકા અને ટાટા મોટર્સ 1.26 ટકા વધ્યો હતો, જ્યારે એચયુએલમાં 4 ટકાનો, ભારતી એરટેલમાં 1.96 ટકાનો, આઇસીઆઇસીઆઇ બેંકમાં 1.53 ટકાનો અને એટર્નલમાં 1.17 ટકાનો ઘટાડો નોંધાયો હતો. નિફ્ટીના શેરો પૈકી ગ્રાસીમ 1.67 ટકા, ડો, રેડ્ડીઝ લેબ 1.59 ટકા, સિપ્લા 1.32 ટકા અને સન ફાર્મા 1.01 ટકા વધ્યો હતો, જ્યારે આઇશર મોટર્સમાં 1.88 ટકાનો ઘટાડો નોંધાયો હતો. વોલેટાલિટી ઇન્ડેક્સ આજે 1.81 ટકા વધીને 16.25 થયો હતો. નિફ્ટી પરના 14 સેકટોરલ ઇન્ડેક્સ પૈકી 10 ઘટીને અને ચાર વધીને બંધ રહ્યા હતા. નિફ્ટી ફાર્મા 1.08 ટકા વધ્યો હતો, જ્યારે નિફ્ટી એફએમસીજીમાં 1.06 ટકાનો ઘટાડો નોંધાયો હતો.