- માઈક્રોસોફ્ટના સર્વરમાં ખામીની અસર ભારતીય માર્કેટમાં જોવા મળી
- ઓલટાઈમ હાઈની સપાટી બનાવીને સેન્સેક્સ તૂટયો
- સેન્સેકસ 738 પોઈન્ટના મસમોટા ગાબડાં સાથે બંધ થયો
માઈક્રોસોફ્ટના સર્વરમાં આવેલી ટેક્નિકલ ક્ષતિની આજે ભારતીય શેરબજાર પર અસર જોવા મળી હતી. ભારતીય શેરબજાર આજે કારોબારના છેલ્લા દિવસે શુક્રવારે 19મી જુલાઈએ મસમોટા ગાબડાં સાથે બંધ થયું હતુ. જ્યારે સવારે પણ માર્કેટ રેડઝોનમાં ઓપન થઈ કારોબાર કરી રહ્યું હતું. સતત ત્રીજા ટ્રેડિંગ દિવસે ઓલ ટાઈમ હાઈ બનાવી હતી.
ટ્રેડિંગ દરમિયાન સેન્સેક્સ 81,587ના સ્તરને સ્પર્શ્યો હતો અને નિફ્ટી 24,853ના સ્તરને સ્પર્શ્યો હતો. જોકે આ પછી બજારમાં ઘટાડો જોવા મળ્યો હતો. સેન્સેક્સ 738 પોઈન્ટના ઘટાડા સાથે 80,604 પર બંધ રહ્યો હતો. તે જ સમયે, નિફ્ટી પણ 269 પોઈન્ટ ઘટીને 24,530 ના સ્તર પર બંધ થયો હતો. સેન્સેક્સના 30 શેરોમાંથી 26માં ઘટાડો અને 4માં વધારો જોવા મળ્યો હતો.
આ શેરોમાં સૌથી વધુ ઘટાડો થયો હતો
નિફ્ટી પેક શેર્સમાં આજે સૌથી મોટો ઘટાડો ટાટા સ્ટીલમાં 4.97 ટકા, જેએસડબલ્યુ સ્ટીલમાં 4.68 ટકા, બીપીસીએલમાં 3.98 ટકા, હિન્દાલ્કોમાં 3.91 ટકા, ઓએનજીસીમાં 3.44 ટકાનો ઘટાડો નોંધાયો હતો. તે જ સમયે, ઇન્ફોસિસ, ITC, એશિયન પેઇન્ટ અને બ્રિટાનિયાના શેરમાં વધારો નોંધાયો હતો.
ગઈકાલે બજારે ઓલટાઈમ હાઈ સપાટી બનાવી હતી
અગાઉ ગઈકાલે એટલે કે 18 જુલાઈના રોજ, શેરબજારે સતત બીજા ટ્રેડિંગ દિવસે ઓલટાઈમ હાઈ સપાટીનું સ્તર બનાવ્યું હતું. ટ્રેડિંગ દરમિયાન સેન્સેક્સ 81,522ના સ્તરને સ્પર્શ્યો અને નિફ્ટી 24,829ના સ્તરને સ્પર્શ્યો. જોકે, બાદમાં બજાર થોડું નીચે આવ્યું અને સેન્સેક્સ 626 પોઈન્ટના વધારા સાથે 81,343 પર બંધ થયો. તે જ સમયે, નિફ્ટીમાં 187 પોઈન્ટનો ઉછાળો નોંધાયો હતો, તે 24,800 ના સ્તર પર બંધ થયો હતો. આ પહેલા મંગળવારે પણ બજારે ઓલટાઈમ ઊંચાઈ સપાટી બનાવી હતી. તે જ સમયે, બુધવારે એટલે કે 17મી જુલાઈએ, મોહર્રમની રજાના કારણે બજાર બંધ હતું.
