Stock News: કારોબારના છેલ્લા દિવસે સેન્સેક્સ અને નિફ્ટી તેજી સાથે ખુલ્યા

• સેન્સેક્સમાં 0.18 ટકાનો વધારો નોંધાયો
  
• નિફ્ટીમાં 0.067 ટકાનો વધારો 
• એફએમસીજી અને બેંકિંગ સેકટર છોડી બધા શેરમાં તેજી

ભારતીય શેરબજાર આજે એટલે કે, 26 જુલાઈ શુક્રવારે કારોબારના છેલ્લા દિવસે ગ્રીન ઝોનમાં ખુલ્યું છે. ગઈકાલે ગુરુવારે શેરબજાર ઘટાડા સાથે બંધ થયું હતું. અગાઉ ગઈકાલે એટલે કે 25મી જુલાઈએ શેરબજારમાં ઘટાડો અને પછી રિકવરી જોવા મળી હતી. સેન્સેક્સ દિવસના તળિયેથી 562 પોઈન્ટ સુધર્યો હતો અને 109 પોઈન્ટ ઘટીને 80,039 પર બંધ થયો હતો.

આ દરમિયાન નિફ્ટીમાં પણ 196 પોઈન્ટની રિકવરી જોવા મળી હતી, તો વળી 7 પોઈન્ટના ઘટાડા સાથે 24,406ના સ્તરે બંધ થયો હતો. સેન્સેક્સના 30 શેરોમાંથી 16 ઘટ્યા અને 14 વધ્યા. નિફ્ટીના 50 શેરોમાંથી 25 ઘટ્યા અને 25 વધ્યા હતા. 23 જુલાઈના રોજ રજૂ કરાયેલા કેન્દ્રીય બજેટ બાદ બજારમાં સતત ઘટાડો જોવા મળી રહ્યો છે. મેટલ અને ફાર્મામાં ફાયદો સૌથી વધુ હતો. 

સૌથી વધુ ફાયદા અને ગેરફાયદા સાથેનો સ્ટોક

એનએસઈ પર શુક્રવારે સૌથી વધુ ફાયદો ભારતી એરટેલ, હિન્દાલ્કો, કોલ ઈન્ડિયા, ટાટા સ્ટીલ અને કોટક મહિન્દ્રા બેન્કનો હતો, જ્યારે સૌથી વધુ નુકસાન ટેક મહિન્દ્રા, ઈન્ડસઈન્ડ બેન્ક, ટાટા કન્ઝ્યુમર, મારુતિ સુઝુકી અને એક્સિસ બેન્ક હતા.

રોકાણકારોનું સેન્ટિમેન્ટ અને ક્રૂડ ઓઈલ

એનએસઈ પર ઉપલબ્ધ કામચલાઉ ડેટા અનુસાર, વિદેશી સંસ્થાકીય રોકાણકારો એ 25 જુલાઈ, 2024ના રોજ રૂ. 2,605.49 કરોડના શેરનું વેચાણ કર્યું હતું, જ્યારે સ્થાનિક સંસ્થાકીય રોકાણકારો (DIIs) એ રૂ. 2,431.69 કરોડના શેર ખરીદ્યા હતા. આ સિવાય શુક્રવારે સવારે WTI ક્રૂડની કિંમત 0.08% વધીને 78.34 ડોલર પર ટ્રેડ થઈ રહી છે, જ્યારે બ્રેન્ટ ક્રૂડની કિંમત 0.06% વધીને 82.42 ડોલર પર ટ્રેડ થઈ રહી છે.