ટ્રેન અકસ્માતમાં મૃત્યુ પામ્યા પણ ટિકિટ નથી, તો શું મળી શકે વળતર?

છેલ્લા કેટલાક મહિનામાં અનેક ટ્રેન અકસ્માતો થયા છે. કેટલાક ટ્રેન અકસ્માતોમાં મુસાફરોના મોત પણ થયા છે. આવા સંજોગોમાં સરકાર અને રેલવે વિભાગ વારંવાર મૃતકોના પરિવારજનો માટે વળતરની જાહેરાત કરે છે. હવે સવાલ એ થાય છે કે જો કોઈ વ્યક્તિ ટિકિટ વગર ટ્રેનમાં મુસાફરી કરી રહ્યો હોય અને ટ્રેન અકસ્માતમાં પેસેન્જરનું મૃત્યુ થાય તો શું તેના પરિવારના સભ્યોને પણ વળતર મળશે? આવો તમને જણાવીએ કે આ સંબંધમાં નિયમો શું કહે છે.

સૌથી પહેલા જાણો દેશના મોટા ટ્રેન અકસ્માતો અંગે

આ વર્ષની શરૂઆતમાં એટલે કે જાન્યુઆરી 2024માં જ બેંગલુરુ-હાવડા સુપરફાસ્ટ એક્સપ્રેસ કર્ણાટક નજીક માલસામાન ટ્રેન સાથે અથડાઈ હતી. આ અકસ્માતમાં લગભગ 50 લોકો ઘાયલ થયા હતા અને 15થી વધુ લોકોએ જીવ ગુમાવ્યા હતા. આ પછી આવે છે બાલાસોર ટ્રેન દુર્ઘટના. 2 જૂન 2023ના રોજ ઓડિશાના બાલાસોર જિલ્લામાં એક મોટો ટ્રેન અકસ્માત થયો હતો. આ અકસ્માતમાં કોરોમંડલ એક્સપ્રેસ, યશવંતપુર-હાવડા સુપરફાસ્ટ એક્સપ્રેસ અને માલગાડી વચ્ચે ટક્કર થઈ હતી.

આ અકસ્માતમાં 300થી વધુ લોકોએ જીવ ગુમાવ્યા અને 1000થી વધુ લોકો ઘાયલ થયા હતા. વર્ષ 2022માં મુંબઈ-હાવડા લોકમાન્ય તિલક એક્સપ્રેસના ત્રણ ડબ્બા પશ્ચિમ બંગાળના બીરભૂમ જિલ્લા નજીક પાટા પરથી ઉતરી ગયા હતા. આ અકસ્માતમાં અનેક મુસાફરો ઘાયલ થયા હતા. આ સિવાય દેશમાં અનેક મોટા રેલ્વે અકસ્માતો થયા છે, જેમાં હજારો લોકોના મોત થયા છે.

ટિકિટ વિનાની મુસાફરી અને વળતરનો નિયમ

રેલવે ક્લેમ ટ્રિબ્યુનલઃ ઘણી વખત જ્યારે રેલવે અકસ્માતમાં માર્યા ગયેલા લોકોના પરિવારજનોને આપવામાં આવતા વળતરમાં કોઈ સમસ્યા હોય ત્યારે અહીં સુનાવણી કરવામાં આવે છે. વર્ષ 2014માં દીપક ઠાકરે નામના વ્યક્તિનું ચાલતી ટ્રેનમાંથી લપસીને પડી જવાથી મોત થયું હતું. મૃત્યુ બાદ જ્યારે પરિવારે રેલવે પાસેથી વળતરની માંગ કરી ત્યારે રેલવે ક્લેમ ટ્રિબ્યુનલ (RCT)એ વળતર આપવાનો ઇનકાર કરી દીધો કે મૃતક દીપક ઠાકરે પાસે મુસાફરીની ટિકિટ નથી.

પરિવારે તેનો વિરોધ કર્યો અને મામલો બોમ્બે હાઈકોર્ટમાં પહોંચ્યો. જોકે, બોમ્બે હાઈકોર્ટે પણ આ મામલામાં આરસીટીના નિર્ણયને યથાવત રાખ્યો હતો અને કહ્યું હતું કે રેલવે ટિકિટ વિનાના પેસેન્જરને વળતર આપશે નહીં. એટલે કે, તે સ્પષ્ટ છે કે જો તમારી પાસે ટ્રેન અકસ્માત દરમિયાન ટિકિટ નથી તો તમે રેલવે દ્વારા આપવામાં આવતા વળતરના હકદાર નથી.