બાળપણની યાદોમાં ઘણી વખત આપણે રમકડાઓને વસ્તુઓની જેમ નહીં પણ એક દોસ્તની રીતે રાખીયે છીએ. એક એવો મિત્ર જે આપણો સાથે આપે છે, આપણી દરેક વાત સાંભળે છે અને સપનાઓની દુનિયામાં આપણી સાથે ચાલે પણ છે. જરા વિચારજો, જો કોઈ રમકડું આજની દુનિયામાં કરોડો લોકોના દિલ જીતી લે, એ તેમના માટે સ્ટાઈલ સ્ટેમેન્ટ બની જાય, અને તેના કારણે જ કોઈને અબજોની કમાણી થઈ જાય તો શું તમને નવાઈ નહીં લાગે? અહીં આવું જ કંઈક થયું છે. ચીનની પ્રખ્યાત કંપની પોપ માર્ટ દ્વારા બનાવવામાં આવેલી નાની પરંતું યુનિક લાબુબૂ ડોલ, જે આજે દુનિયાભરમાં ખૂબ ટ્રેન્ડમાં ચાલી રહી છે. 

આ ઢીંગલી કોઈ સામાન્ય ઢીંગલી નથી. તેની નાની આંખો, તોફાની સ્મિત અને ગ્રેમલિન જેવા ચહેરાએ લોકોને એટલા દિવાના બનાવી દીધા છે કે ઘણા દેશોમાં દુકાનોમાં ભીડ જોવા મળી રહી છે. તેને મેળવવા માટે ઝઘડા પણ થાય છે. લાબુબુ ઢીંગલીઓને પણ આજની ફેશન એસેસરીઝ ગણવામાં આવે છે. બ્લેકપિંકની લિસા, રિહાન્ના, સિંગાપોરની સોશિયલાઈટ જેમી ચુઆ અને ભારતની અનન્યા પાંડે જેવી સેલિબ્રિટીઓ પણ તેમના બેગ પર તેમને લઈને ફરતી જોવા મળે છે.

તેની જબરદસ્ત ડિમાન્ડને જોઈને હાલમાં જ બ્રિટનમાં આ ડોલ્સ ખરીદવા માટે લોકોમાં ઝગડાઓ શરુ થયા હતા. જેને જોતા આ ડોલનું વેંચાણ રોકવું પડ્યું હતું. એક રિપોર્ટ પ્રમાણે આ પગલુ દુકાનદારો અને ગ્રાહકોની સુરક્ષાને લઈને ભરવામાં આવ્યું હતું. 

હવે વાત કરીયે આ માણસની જેણે આ ડોલ્સને બનાવી અને પોતાના દમ પર અબજોની કમાણી કરી. તે છે વાન નિંગ. વાંગ નિંગ પોપ માર્ટ ઈન્ટરનેશનલ ગૃપના ચેરમેન અને સીઈઓ છે. વાન નિંગની કંપનીની લોકપ્રિયતા અમેરિકામાં એટલી ઝડપથી વધી કે એક જ દિવસમાં તેની સંપતિ એક જ દિવસમાં 1.6 અરબ ડોલર વધી ગઈ. 

બધા જાણે છે કે ચીન અને અમેરિકા વચ્ચે વેપાર તણાવની સ્થિતિ છે. આમ છતાં, અમેરિકામાં લોકો લાબુબુ ઢીંગલી ખરીદવા માટે કલાકો સુધી લાઇનમાં ઉભા રહ્યા. આ બતાવે છે કે લાબુબુ માત્ર એક રમકડું નહીં પણ ભાવનાત્મક જોડાણ બની ગયું છે. ફોબ્સના રિપોર્ટ પ્રમાણે વાન નિંગની કુલ સંપત્તિ 18.7 અરબ ડોલર છે.