- દેશનું વિદેશી હૂંડિયામણ ઓલ ટાઈમ હાઈ પર પહોંચ્યું
- ચીન, જાપાન, સ્વિટર્ઝલેન્ડ અને રશિયા પછી ભારતમાં વિદેશી હૂંડિયામણ સૌથી વધુ છે
- દેશના વિદેશી હૂંડિયામણનો ઉપયોગ ઈન્ફ્રાસ્ટ્રકચર વિકાસમાં ઉપયોગ થાય છે
ભારતનો વિદેશી મુદ્રા ભંડાર તેની સર્વકાલીન ઉચ્ચતમ સપાટીએ પહોંચી ગયો છે. 5 એપ્રિલે પૂરા થયેલા સપ્તાહમાં વિદેશી મુદ્રા ભંડારમાં 2.98 બિલિયન ડોલરનો વધારો નોંધવામાં આવ્યો છે. આ વધારા સાથે, દેશની વિદેશી હૂંડિયામણ અનામત 648.56 બિલિયન ડોલરની નવી સર્વકાલીન ઉચ્ચતમ સપાટીએ પહોંચી ગઈ છે. ભારતીય રિઝર્વ બેંક (RBI) એ શુક્રવારે 12 એપ્રિલ, 2024 ના રોજ વિદેશી મુદ્રા ભંડારનો આ ડેટા જાહેર કર્યો છે.
ફોરેન એક્સચેન્જ રિઝર્વ અત્યાર સુધીની ઊંચી સપાટીએ છે
છેલ્લા ટ્રેડિંગ સપ્તાહમાં, દેશનો વિદેશી હૂંડિયામણ અનામત 2.95 બિલિયન ડોલર વધીને 645.58 બિલિયન ડોલર થઈ ગયો હતો, જે તે સમય સુધીનો સર્વોચ્ચ સ્તર હતો. અગાઉ સપ્ટેમ્બર 2021માં, દેશનું વિદેશી વિનિમય અનામત 642.45 બિલિયન ડોલર હતું, જે અત્યાર સુધીનું સર્વોચ્ચ સ્તર હતું.
રિઝર્વ બેંક ઓફ ઈન્ડિયાના ડેટા અનુસાર, 5 એપ્રિલના રોજ પૂરા થયેલા સપ્તાહમાં, કરન્સી રિઝર્વનો મહત્વપૂર્ણ ભાગ ગણાતી વિદેશી ચલણ સંપત્તિ 549 મિલિયન ડોલર વધીને 571.17 બિલિયન ડોલર થઈ ગઈ છે. ડૉલરના સંદર્ભમાં વિદેશી ચલણની અસ્કયામતોમાં વિદેશી હૂંડિયામણ અનામતમાં રાખવામાં આવેલ યુરો, પાઉન્ડ અને યેન જેવી બિન-યુએસ કરન્સીમાં ચાલની અસરનો સમાવેશ થાય છે.
રિઝર્વ બેંકે જણાવ્યું હતું કે સમીક્ષા હેઠળના સપ્તાહ દરમિયાન સોનાના ભંડારનું મૂલ્ય 2.39 બિલિયન ડોલર વધીને 54.56 ડોલર બિલિયન થયું છે. રિઝર્વ બેંકે કહ્યું કે સ્પેશિયલ ડ્રોઈંગ રાઈટ્સ (SDR) 24 મિલિયન ડોલર વધીને 18.17 ડોલર બિલિયન થઈ ગયા છે. રિઝર્વ બેંકના જણાવ્યા અનુસાર, ઈન્ટરનેશનલ મોનેટરી ફંડ (IMF)માં ભારતની અનામત થાપણો પણ સમીક્ષા હેઠળના સપ્તાહમાં 9 મિલિયન ડોલર વધીને 4.669 ડોલર બિલિયન થઈ ગઈ છે.
તરલતા વ્યવસ્થાપન દ્વારા બજાર હસ્તક્ષેપ
સામાન્ય રીતે ભારતીય રિઝર્વ બેંક રૂપિયામાં તીવ્ર ઘટાડો અટકાવવા ડોલરના વેચાણ સહિત તરલતા વ્યવસ્થાપન દ્વારા સમયાંતરે બજારમાં હસ્તક્ષેપ કરે છે. સેન્ટ્રલ બેંક વિદેશી વિનિમય બજારો પર નજીકથી દેખરેખ રાખે છે અને કોઈપણ પૂર્વ-નિર્ધારિત લક્ષ્ય સ્તર અથવા બેન્ડના સંદર્ભ વિના, વિનિમય દરમાં વધુ પડતી અસ્થિરતાને નિયંત્રિત કરીને માત્ર સુવ્યવસ્થિત બજારની સ્થિતિ જાળવવા દરમિયાનગીરી કરે છે.
