ટ્વિટર કર્મચારીઓ માટે કાળ બન્યા મસ્ક, હવે ફેમિલી પ્લાનિંગમાં દખલગીરી

• ટ્વિટરના માલિક એલોન મસ્કે વધુ એક મોટો ફેરફાર કર્યો
  
• મસ્કે કર્મચારીઓ માટે ઉપલબ્ધ પ્રજનન કવરમાં ઘટાડો કર્યો
• ફર્ટિલિટી ટ્રીટમેન્ટ માટે મળતી રકમ અડધી કરી દીધી

ટેસ્લા કંપનીના સીઈઓ અને વિશ્વના બીજા સૌથી ધનિક વ્યક્તિ એલોન મસ્ક ટ્વિટર ખરીદ્યા બાદથી સતત ખર્ચમાં ઘટાડો કરી રહ્યા છે. ટ્વિટર કર્મચારીઓને મળતી સુવિધાઓમાં ઘટાડો કરવામાં આવી રહ્યો છે. અગાઉ છટણી મોટા પાયે કરવામાં આવી હતી હવે ટ્વિટરના માલિક એલોન મસ્કે વધુ એક મોટો ફેરફાર કર્યો છે અને કર્મચારીઓ માટે ઉપલબ્ધ પ્રજનન કવરમાં ઘટાડો કર્યો છે. તમને જણાવી દઈએ કે, એલોન મસ્ક કે જેઓ પોતે 10 બાળકોના પિતા છે તેમણે ટ્વિટર કર્મચારીઓની ફર્ટિલિટી ટ્રીટમેન્ટ માટે મળતી રકમ અડધી કરી દીધી છે.

એલોન મસ્કે પોતાના ટ્વીટ, બિઝનેસ આઈડિયા ઉપરાંત અંગત જીવનને લઈને હંમેશા ચર્ચામાં રહે છે. 10 બાળકોના પિતા એલોન મસ્ક પોતે પિતા બનવા માટે IVF ટેક્નોલોજીનો ઉપયોગ કરી ચૂક્યા છે પરંતુ હવે તે ટ્વિટર કર્મચારીઓના પરિવાર નિયોજનમાં દખલ કરી રહ્યા છે. એલોન મસ્કે કર્મચારીઓને મળતી સુવિધાઓ ઓછી કરી દીધી છે. અહેવાલ અનુસાર, અત્યાર સુધી ટ્વિટરના કર્મચારીઓને $80,000નું આજીવન કવર મળતું હતું જેનો ઉપયોગ તેઓ ફર્ટિલિટી ટ્રીટમેન્ટ, એગ અને સ્પર્મ ફ્રીઝિંગ, સરોગસી, દત્તક લેવા માટે કરી શકે છે.

કર્મચારીઓના ફેમેલી પ્લાનિંગમાં દખલગીરી

એલોન મસ્ક ટ્વિટર કર્મચારીઓની સુવિધાઓમાં સતત ઘટાડો કરી રહ્યા છે. તેઓએ પ્રજનન કવચ 80,000 ડોલરથી ઘટાડીને 40,000 ડોલર કર્યું છે. કર્મચારીઓને થર્ડ પાર્ટી સર્વિસ પ્રોવાઈડર તરફથી ઈમેલ મોકલીને આ અંગે જાણ કરવામાં આવી છે. કેરોટ ફર્ટિલિટી નામની કંપની ટ્વિટરના કર્મચારીઓને આ કવરેજ આપે છે. હવે આ કંપની તરફથી ઈમેલ મોકલવામાં આવી રહ્યો છે. જેમાં એવું કહેવામાં આવી રહ્યું છે કે, કર્મચારીઓનું ફર્ટિલિટી કવર ઘટાડીને અડધુ કરી દેવામાં આવ્યું છે. 1 જાન્યુઆરી 2023થી તેમને માત્ર 40 હજાર ડોલરનું કવરેજ મળશે.

ટ્વિટર કર્મચારીઓ નારાજ

એલોન મસ્કના આ નિર્ણયથી કર્મચારી નારાજ છે. IVF જેવી પ્રજનન સેવા માટે તેનો ખર્ચ માત્ર એક બેઠકમાં 15થી 30 હજાર ડોલર થાય છે. આવી સ્થિતિમાં ફર્ટિલિટી કવરમાં ઘટાડાથી કર્મચારીઓ નારાજ છે. મસ્કની વાત કરીએ તો તેની પહેલી પત્ની જસ્ટિન વેલ્સને IVF ટેક્નોલોજીની મદદથી 5 બાળકોને જન્મ આપ્યો છે. તે જ સમયે, વર્ષ 2021માં, મસ્ક આ જ તકનીકથી ત્રીજી વખત જોડિયા બાળકોના પિતા બન્યા હતા. જ્યારે બીજી પત્નીએ મસ્કને પિતા બનાવવા માટે સરોગસીનો ઉપયોગ કર્યો હતો.