વધતા વીજળીના બિલને કારણે હવે ઘણા લોકો પોતાના ઘરમાં સોલર પેનલ લગાવવાનું વિચારી રહ્યા છે. આ સ્થિતિમાં લોકોના મનમાં સોલર પેનલને લઈને અનેક સવાલો હોય છે કે તેમના ઘર માટે કઈ સોલર પેનલ વધુ સારી રહેશે અને તેનાથી કેટલી બચત થશે? જો તમારા ઘરમાં સામાન્ય ઘરવપરાશ માટે જ વીજળીનો ઉપયોગ થાય છે, તો 2KWની સોલર પેનલ તમારા માટે સારો વિકલ્પ બની શકે છે. જોકે, સોલર પેનલ લગાવતા પહેલાં એ જાણવું જરૂરી છે કે તે કેટલી વીજળી બનાવે છે અને તેનાથી કેટલી બચત થઈ શકે છે.
મહિનામાં કેટલી વીજળી બનાવે છે?
2KW સોલર સિસ્ટમથી બનતી વીજળી તમારા શહેરમાં મળતા સૂર્યપ્રકાશ અને હવામાન પર આધાર રાખે છે. ભારતના મોટા ભાગના વિસ્તારોમાં 2KWની ઓન-ગ્રિડ સોલર સિસ્ટમ સામાન્ય સ્થિતિમાં દરરોજ લગભગ 7થી 9 યુનિટ વીજળી બનાવી શકે છે. આ પ્રમાણે 1 મહિનામાં લગભગ 210થી 270 યુનિટ વીજળી બની શકે છે.
વીજળીના બિલમાં કેટલી બચત થઈ શકે?
વીજળીના બિલમાં થતી બચત તમારા કુલ વીજ વપરાશ પર આધાર રાખે છે. જોકે, એવું માનવામાં આવે છે કે ભારતમાં કોઈ ઘરમાં 2KWની સોલર સિસ્ટમ લગાવવામાં આવે તો વાર્ષિક વીજળીના બિલમાં લગભગ ₹20,000 સુધીની બચત થઈ શકે છે.
ઓન-ગ્રિડ સિસ્ટમમાં બચત કેવી રીતે થાય છે?
જો તમે ઓન-ગ્રિડ સોલર સિસ્ટમ લગાવો છો, તો દિવસ દરમિયાન સોલર પેનલથી બનતી વીજળીનો ઉપયોગ પહેલાં ઘરના ઉપકરણો માટે થાય છે. જરૂરિયાત કરતાં વધારે વીજળી બને તો નેટ બિલિંગના નિયમો પ્રમાણે વધારાની વીજળી ગ્રીડમાં મોકલવામાં આવે છે. રાત્રે જ્યારે સોલર પેનલ વીજળી બનાવતી નથી, ત્યારે ઘર ગ્રીડમાંથી વીજળી લે છે. આ કારણે સામાન્ય ઘરવપરાશ માટે ઓન-ગ્રિડ સિસ્ટમ ખૂબ લોકપ્રિય છે.
2KW સોલર સિસ્ટમ કોના માટે યોગ્ય છે?
2KW સિસ્ટમ ઓછા અથવા સામાન્ય વીજ વપરાશવાળા ઘરો માટે ઉપયોગી બની શકે છે. જો તમારા ઘરમાં પંખા, લાઇટ, ટીવી, ફ્રિજ, કૂલર, કમ્પ્યુટર અને અન્ય સામાન્ય ઉપકરણો ચાલે છે, તો આ સિસ્ટમ તમારા વીજળીના ખર્ચને ઘણો ઘટાડવામાં મદદ કરી શકે છે. પરંતુ જો ઘરમાં એર કન્ડિશનર, ગીઝર, ઇલેક્ટ્રિક કાર ચાર્જર અથવા વધુ વીજળી વાપરતા અન્ય ઉપકરણો નિયમિત રીતે ચાલતા હોય, તો 2KW સિસ્ટમ પૂરતી ન પણ હોય.
