દેશભરના લાખો કેન્દ્ર સરકારના કર્મચારીઓ અને પેન્શનરો માટે 8મા પગાર પંચને લઈને એક અત્યંત મહત્વના સમાચાર સામે આવ્યા છે. કમિશને કર્મચારી સંગઠનો અને યુનિયનોની માંગણીઓને ધ્યાનમાં રાખીને મેમોરેન્ડમ સબમિટ કરવાની અંતિમ તારીખ લંબાવી છે. અગાઉ આ સમયમર્યાદા 31 મે હતી, જેને હવે વધારીને 15 જૂન, 2026 કરવામાં આવી છે. કમિશને સ્પષ્ટતા કરી છે કે આ છેલ્લી તક છે અને ત્યારબાદ કોઈ પણ સંજોગોમાં તારીખ લંબાવવામાં આવશે નહીં.
કોલકાતામાં બે દિવસીય મહત્વપૂર્ણ બેઠક
8મા પગાર પંચે આગામી 9 અને 10 જુલાઈ, 2026 ના રોજ પશ્ચિમ બંગાળના કોલકાતામાં એક ઉચ્ચ-સ્તરીય બેઠકનું આયોજન કર્યું છે. આ બેઠક દરમિયાન કમિશન સીધા જ વિવિધ કર્મચારી સંગઠનો અને યુનિયનો સાથે વાર્તાલાપ કરશે, જેથી તેમની માંગણીઓ અને સૂચનોને ગંભીરતાથી સમજી શકાય અને ભવિષ્યમાં તેને યોગ્ય રીતે અમલમાં મૂકી શકાય.
મેમોરેન્ડમ અને એપોઈન્ટમેન્ટ પ્રક્રિયા
કોલકાતા બેઠકમાં ભાગ લેવા માંગતી સંસ્થાઓ માટે કમિશને કેટલીક શરતો રાખી છે. જે સંસ્થાઓ કમિશનને મળીને પોતાના વિચારો રજૂ કરવા માંગે છે, તેમને અગાઉથી એપોઇન્ટમેન્ટ લેવી અનિવાર્ય છે. આ પ્રક્રિયામાં સૌથી મહત્વની બાબત એ છે કે મીટિંગ માટે અરજી કરતા પહેલા સંગઠને સત્તાવાર વેબસાઇટ પર પોતાનું મેમોરેન્ડમ સબમિટ કરવું પડશે. સબમિશન બાદ જે 'યુનિક મેમો આઈડી' (Unique Memo ID) મળશે, તે રજૂ કર્યા વગર મીટિંગમાં હાજરી મળવી અશક્ય છે.
ઓનલાઇન પોર્ટલનો જ ઉપયોગ કરો
કમિશને અરજી પ્રક્રિયામાં સંપૂર્ણ પારદર્શિતા અને ડેટા સુરક્ષા માટે કડક સૂચના આપી છે. મેમોરેન્ડમ માત્ર સત્તાવાર વેબસાઇટ 8cpc.gov.in પરના ઓનલાઇન પોર્ટલ દ્વારા જ સ્વીકારવામાં આવશે. ઈમેલ કે PDF ફોર્મેટમાં મોકલેલી અરજીઓ માન્ય ગણાશે નહીં. મીટિંગનું ચોક્કસ સ્થળ અને સમયપત્રક માત્ર શોર્ટલિસ્ટ કરાયેલા સંગઠનો સાથે જ શેર કરવામાં આવશે.
કમિશનનો આગામી પ્રવાસ
કર્મચારીઓની માંગણીઓ સમજવા માટે 8મું પગાર પંચ દેશભરમાં પ્રવાસ કરી રહ્યું છે. જૂન માસના કાર્યક્રમ મુજબ, કમિશન 1 થી 4 જૂન સુધી શ્રીનગરમાં, 8 જૂને લદ્દાખમાં, અને 22-23 જૂને લખનૌમાં ચર્ચાઓ કરશે. ત્યારબાદ કોલકાતા પહોંચતા પહેલા 6 અને 7 જુલાઈના રોજ ભુવનેશ્વરમાં પણ બેઠક યોજાશે. તમામ કર્મચારી સંગઠનોને આ તકોનો મહત્તમ લાભ લેવા અને નિર્ધારિત સમયમાં પ્રક્રિયા પૂર્ણ કરવા વિનંતી કરવામાં આવી છે.
આ પણ વાંચોઃ શું તમારી કારમાં નકલી એન્જિન ઓઇલ તો નથી ને? આ 3 સંકેત તમારી ગાડીને ખરાબ થવાથી બચાવી લેશે
