હિંડનબર્ગના આરોપોની તપાસમાં સેબી દ્વારા અદાણી ગ્રુપને નિર્દોષ જાહેર કર્યાના એક દિવસ બાદ અદાણી ગ્રુપના ચેરમેન ગૌતમ અદાણીએ તેમની પત્ની પ્રીતિ અદાણીએ અમદાવાદના એક જૈન મંદિરમાં પૂજા કરી છે. ક્લીનચીટ મળ્યા પછી અદાણીએ ઉજવણી કરવાને બદલે મંદિરમાં દર્શન કરવાનું પસંદ કર્યું. ત્યારબાદ આ દંપતી મંદિરમાં ગયા, દીવો પ્રગટાવ્યો અને ભગવાનને પ્રાર્થના કરી.
પારદર્શિતા અને પ્રામાણિકતા હંમેશા અદાણી જૂથની ઓળખ: ગૌતમ અદાણી
મળતી માહિતી મુજબ અદાણી પરિવાર માટે આ માત્ર નિયમનકારી રાહત જ નહોતી, તે ખરાબ પર સારાના વિજય, ધીરજ અને વિશ્વાસના વિજયનું પ્રતીક છે. અદાણી ગ્રુપના ચેરમેને હિંડનબર્ગ રિસર્ચ રિપોર્ટના આધારે જૂઠાણા ફેલાવનારાઓ પાસે માફી માગવાની માગ કરી છે. સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (SEBI)એ અદાણી ગ્રુપને ક્લીનચીટ આપી છે, જેમાં ધોરણોનું ઉલ્લંઘન કરવાના અથવા છેતરપિંડી કરવાના આરોપોને પાયાવિહોણા ગણાવ્યા છે. આ અંગે અદાણીએ X પર લખ્યું કે સંપૂર્ણ તપાસ પછી, સેબીએ પુનરોચ્ચાર કર્યો છે કે હિંડનબર્ગના દાવાઓ પાયાવિહોણા હતા. પારદર્શિતા અને પ્રામાણિકતા હંમેશા અદાણી જૂથની ઓળખ રહી છે. આ કપટપૂર્ણ અને પ્રેરિત અહેવાલને કારણે નાણાં ગુમાવનારા રોકાણકારો પ્રત્યે અમે ઊંડી સહાનુભૂતિ ધરાવીએ છીએ. ખોટા સમાચાર ફેલાવનારાઓએ રાષ્ટ્રની માફી માગવી જોઈએ. ભારતની સંસ્થાઓ, તેના લોકો અને રાષ્ટ્ર નિર્માણ પ્રત્યેની અમારી પ્રતિબદ્ધતા અટલ છે.
સુપ્રીમ કોર્ટે અરજદારની અરજી ફગાવી દીધી
ઉલ્લેખનીય છે કે અમેરિકા સ્થિત એક શોર્ટ-સેલરે વ્યવહારો છુપાવવા માટે ફંડ રૂટિંગનો આરોપ લગાવ્યો હતો, જેના કારણે બજારમાં નોંધપાત્ર અસ્થિરતા આવી અને અદાણી ગ્રુપના બજાર મૂલ્ય પર અસર પડી હતી. આ ક્લીન ચીટ અદાણી ગ્રુપને નોંધપાત્ર રાહત આપે છે અને મહિનાઓથી ચાલી રહેલી તપાસનો અંત લાવે છે. તપાસ બાદ સેબીએ તારણ કાઢ્યું કે લિસ્ટિંગ કરાર અથવા સેબી લિસ્ટિંગ જવાબદારીઓનું કોઈ ઉલ્લંઘન થયું નથી. સેબીએ જણાવ્યું હતું કે સુપ્રીમ કોર્ટે અરજદારની અરજી ફગાવી દીધી હતી અને કહ્યું હતું કે વર્તમાન સ્વરૂપમાં નિયમો ઘડવાની પ્રક્રિયામાં કોઈ ગેરકાયદેસરતા નથી. સુપ્રીમ કોર્ટે એમ પણ કહ્યું હતું કે સેબી (LODR) નિયમોમાં કરવામાં આવેલા સુધારા પાછા ખેંચવા માટે સેબીને નિર્દેશ આપવા માટે કોઈ માન્ય આધાર પૂરો પાડવામાં આવ્યો નથી. સેબીએ તારણ કાઢ્યું હતું કે અદાણી ગ્રુપની સંસ્થાઓ અથવા વ્યક્તિઓ પર કોઈ જવાબદારી કે દંડ લાદવામાં આવ્યો નથી, અને કાર્યવાહી કોઈપણ નિર્દેશ વિના નિકાલ કરવામાં આવી હતી.
