અપોલો માઈક્રો સિસ્ટમ્સના શેરમાં 20 મેના રોજ બજાર ખુલતાં જ જોરદાર તેજી જોવા મળી. શેર લગભગ 7 ટકા સુધી ઉછળી નવી રેકોર્ડ સપાટીએ પહોંચ્યો હતો. બપોરે લગભગ 12:15 વાગ્યે શેર 5 ટકા જેટલો વધીને 357 રૂપિયાની આસપાસ ટ્રેડ થઈ રહ્યો હતો. સતત ત્રીજા દિવસે આ શેરમાં મજબૂત ખરીદી જોવા મળી રહી છે.
એક વર્ષમાં 165 ટકા રિટર્ન
અપોલો માઈક્રો સિસ્ટમ્સના શેરે છેલ્લા એક વર્ષમાં આશરે 165 ટકા રિટર્ન આપ્યું છે. કંપનીના માર્ચ ત્રિમાસિકના મજબૂત પરિણામો બાદ શેરમાં આ તેજી આવી છે. કંપનીના રેવન્યુ અને નફામાં જોરદાર વધારો નોંધાયો છે. માર્ચ ત્રિમાસિક દરમિયાન કંપનીનો કન્સોલિડેટેડ નફો 168.84 ટકા વધીને 37.61 કરોડ રૂપિયા રહ્યો હતો. ગયા વર્ષે આ જ સમયગાળામાં નફો 14 કરોડ રૂપિયા હતો. કંપનીનું કન્સોલિડેટેડ રેવન્યુ પણ 81.28 ટકા વધીને 293.25 કરોડ રૂપિયા થયું હતું, જ્યારે ગયા વર્ષે તે 161.76 કરોડ રૂપિયા હતું. EBITDAમાં પણ 88 ટકા વૃદ્ધિ થઈ અને તે 67.64 કરોડ રૂપિયા સુધી પહોંચ્યું. EBITDA માર્જિન 22 ટકાથી વધીને 23 ટકા થયું છે.