ભારતમાં એપલ ઈન્ક સામે ચાલી રહેલી એન્ટી ટ્રસ્ટ તપાસ હવે મહત્વના તબક્કામાં પહોંચી છે. કંપનીએ CCIને ભારત સંબંધિત પોતાની નાણાકીય માહિતી આપવા માટે સંમતિ દર્શાવી છે. આ તપાસ એપલની એપ સ્ટોર નીતિઓ અને ઈન-એપ પેમેન્ટ સિસ્ટમને લઈને ચાલી રહી છે. માનવામાં આવે છે કે આ માહિતીના આધારે ભવિષ્યમાં કંપની પર દંડ પણ ફટકારવામાં આવી શકે છે.
CCIને મળશે એપલનો ફાઈનાન્શિયલ ડેટા
એપલે CCIને પોતાની નાણાકીય વિગતો આપવા માટે મંજૂરી આપી છે. આ માહિતી એપ સ્ટોર સંબંધિત તપાસ માટે અત્યંત મહત્વપૂર્ણ માનવામાં આવે છે. CCIનું માનવું છે કે એપલે બજારમાં પોતાની મજબૂત સ્થિતિનો દુરુપયોગ કર્યો હોઈ શકે છે. 21 મેના રોજ યોજાયેલી સુનાવણી દરમિયાન કંપનીએ વધુ સમયની માંગણી કરી હતી, જેના પગલે તેને 25 જૂન સુધી ડેટા રજૂ કરવાની મંજૂરી આપવામાં આવી છે. આ માહિતી તપાસને આગળ વધારવા તેમજ સંભવિત દંડની રકમ નક્કી કરવામાં મદદરૂપ બનશે. નિષ્ણાતોના મતે, ભારતમાં એપલ માટે આ અત્યાર સુધીના સૌથી મોટા નિયમનકારી પડકારોમાંનું એક છે.
એપ સ્ટોર અને પેમેન્ટ સિસ્ટમને લઈને તપાસ
આ તપાસ મુખ્યત્વે એપલની એપ સ્ટોર નીતિઓ પર કેન્દ્રિત છે. આરોપ છે કે કંપનીએ આઈફોન એપ ઈકોસિસ્ટમમાં પોતાની પ્રભુત્વભરી સ્થિતિનો લાભ ઉઠાવ્યો છે. CCIના જણાવ્યા મુજબ એપલ એપ ડેવલપર્સને મર્યાદિત વિકલ્પો આપે છે, કારણ કે આઈફોન યુઝર્સ સુધી પહોંચવાનો મુખ્ય માર્ગ એપ સ્ટોર જ છે.
આ ઉપરાંત, કંપનીના ઈન-એપ પેમેન્ટ નિયમો પણ તપાસના કેન્દ્રમાં છે. આરોપ છે કે એપલ ડેવલપર્સને પોતાના પેમેન્ટ સિસ્ટમનો જ ઉપયોગ કરવા માટે પ્રોત્સાહિત અથવા મજબૂર કરે છે. આ તપાસની શરૂઆત 2021માં થઈ હતી, જ્યારે ટીંડર અને Alliance of Digital India Foundation સહિતની સંસ્થાઓએ ફરિયાદ નોંધાવી હતી. જોકે એપલ સતત આ તમામ આરોપોને નકારી રહ્યું છે.
ભારતના ડિજિટલ ઈકોસિસ્ટમ પર પડી શકે છે મોટી અસર
આ કેસનો પ્રભાવ ભારતના એપ ડેવલપમેન્ટ અને ડિજિટલ અર્થતંત્ર પર વ્યાપક રીતે પડી શકે છે. એપલ ભારતમાં ઝડપથી વિકાસ કરી રહ્યું છે અને સ્માર્ટફોન બજારમાં તેનો હિસ્સો અંદાજે 2 ટકાથી વધીને 9 ટકા સુધી પહોંચી ગયો છે. જો CCIનો નિર્ણય એપલ વિરુદ્ધ આવે છે તો એપ ડેવલપર્સ અને સ્ટાર્ટઅપ્સને વધુ સ્વતંત્રતા મળી શકે છે, ખાસ કરીને પેમેન્ટ સિસ્ટમ અને એપ વિતરણ સંબંધિત બાબતોમાં. સાથે જ આ નિર્ણય ભારતના ડિજિટલ નિયમન અને મોટી ટેક કંપનીઓની નીતિઓ પર પણ લાંબા ગાળાની અસર પેદા કરી શકે છે.
આ પણ વાંચો : US India Tariff: અમેરિકાએ ફરી લાદ્યો 12.5%નો ટેરિફ, બચવા માટે ભારતે શું કરવું? થિંક ટેંકે બતાવ્યો રસ્તો
