ભારતીય ઓટોમોબાઈલ માર્કેટમાં સબ-4 મીટર એસયુવી સેગમેન્ટમાં ટૂંક સમયમાં મોટા ફેરફારો જોવા મળવાના છે. ગ્રાહકોની બદલાતી પસંદગીને ધ્યાનમાં રાખીને કંપનીઓ તેમના લોકપ્રિય મોડલ્સને નવા અવતારમાં લોન્ચ કરવાની તૈયારી કરી રહી છે. ખાસ કરીને Maruti Brezza, Hyundai Exter અને Maruti Fronx ના ફેસલિફ્ટ મોડલ તેમજ Kia Sonet, Tata Nexon અને Mahindra XUV 3XO ની નેક્સ્ટ જનરેશન લોન્ચ થવા માટે તૈયાર છે.
મારુતિ બ્રેઝા ફેસલિફ્ટ (2026)
નવી 2026 મારુતિ બ્રેઝા ફેસલિફ્ટના ટેસ્ટિંગ મોડલ્સ રસ્તાઓ પર જોવા મળ્યા છે, જે તેના ટૂંક સમયમાં લોન્ચિંગના સંકેત આપે છે. મીડિયા રિપોર્ટ્સ અનુસાર, આ અપડેટેડ મોડલમાં ડિઝાઇન અને ફીચર્સમાં મહત્વના ફેરફારો હશે. સૌથી મોટો ફેરફાર એન્જિનમાં હોઈ શકે છે; હાલના 1.5 લિટર પેટ્રોલ એન્જિન સાથે હવે ફ્રોન્ક્સ વાળું 1.0 લિટર ટર્બો પેટ્રોલ એન્જિન પણ મળી શકે છે. સાથે જ નવો 6-સ્પીડ મેન્યુઅલ ગિયરબોક્સ પણ આપવામાં આવશે.
