હ્યુન્ડાઈ મોટર ઈન્ડિયા નાણાકીય વર્ષ 2030 સુધીમાં બજારમાં ઘણા નવા મોડલ લોન્ચ કરવાનું આયોજન કરી રહી છે. આ શ્રેણીમાં એક નવી સબ-4 મીટર ઇલેક્ટ્રિક SUV (HE1i) પણ સામેલ છે, જેને ખાસ કરીને ટાટા પંચ EVને ટક્કર આપવા માટે ડિઝાઇન કરવામાં આવી રહી છે. આ નવી કારના ટેસ્ટ મોડલને તાજેતરમાં જ દક્ષિણ કોરિયામાં ભારે કેમોફ્લાજ (કવર) સાથે ટેસ્ટિંગ દરમિયાન જોવામાં આવ્યું છે. જોકે કંપનીએ હજુ સુધી સત્તાવાર લોન્ચિંગ તારીખ જાહેર કરી નથી, પરંતુ માનવામાં આવી રહ્યું છે કે આ ગાડી 2026ના દિવાળી સીઝન અથવા 2027ની શરૂઆતમાં બજારમાં આવી શકે છે.
ઇન્સ્ટર EV પર આધારિત આકર્ષક ડિઝાઇન
રિપોર્ટ્સ અનુસાર, હ્યુન્ડાઈની આ નવી કોમ્પેક્ટ ઇલેક્ટ્રિક એસયુવી વૈશ્વિક બજારમાં ઉપલબ્ધ 'હ્યુન્ડાઈ ઇન્સ્ટર' પર આધારિત હોઈ શકે છે. ટેસ્ટિંગ દરમિયાન જોવા મળેલી કારનો બોક્સી અને સીધો લુક ઇન્સ્ટર જેવો જ દેખાય છે. આ નવી HE1i EV માં બંધ ગ્રીલ, આગળની તરફ ચાર્જિંગ પોર્ટ, સ્પોર્ટી સિલ્વર સ્કિડ પ્લેટ, ગોળાકાર પ્રોજેક્ટર હેડલાઇટ્સ, સ્પ્લિટ હેડલેમ્પ અને ઉપરની તરફ LED DRLs જોવા મળી શકે છે. તેમજ આ કારમાં બ્લેક બોડી ક્લેડિંગ, રૂફ રેલ્સ, પિક્સેલ-સ્ટાઇલ એલઇડી ટેલલાઇટ્સ, ચોરસ ટેલગેટ અને 17-ઇંચ સુધીના એલોય વ્હીલ્સ જેવા પ્રીમિયમ ફીચર્સ મળવાની આશા છે.
