વર્તમાન સમયમાં મધ્ય પૂર્વમાં વધતા તણાવ અને ક્રૂડ ઓઈલની કિંમતોમાં ઉછાળાને કારણે ભારતમાં પણ ઈંધણના ભાવમાં વધારો થવાની ભીતિ સેવાઈ રહી છે. તેલ કંપનીઓએ પ્રીમિયમ પેટ્રોલના ભાવમાં પ્રતિ લિટરે રૂ.2 થી રૂ.2.30 સુધીનો વધારો ઝીંકી દીધો છે. આવી સ્થિતિમાં, સામાન્ય નાગરિકો માટે કાર ચલાવવી આર્થિક રીતે બોજ બની રહી છે. જોકે, આ મોંઘવારીના યુગમાં હાઈબ્રિડ કાર એક શક્તિશાળી વિકલ્પ તરીકે ઉભરી આવી છે, જે ગ્રાહકોને પેટ્રોલના વધતા ભાવ સામે રક્ષણ આપી રહી છે.
27 કિમીથી વધુની માઈલેજ આપતી હાઈબ્રિડ કારો
ભારતીય બજારમાં અત્યારે એવી અનેક કાર ઉપલબ્ધ છે જે પ્રતિ લિટર પેટ્રોલમાં 27 કિલોમીટરથી વધુની અંતર કાપવાની ક્ષમતા ધરાવે છે. Toyota Urban Cruiser Hyryder અને Maruti Suzuki Grand Vitara જેવી એસયુવી કારો આ યાદીમાં મોખરે છે, જે અંદાજે 27.97 કિમી/લિટરે માઈલેજ આપે છે. આ કારોમાં પેટ્રોલ એન્જિનની સાથે ઇલેક્ટ્રિક મોટરનો પણ ઉપયોગ થાય છે, જે ફ્યુઅલના વપરાશને નોંધપાત્ર રીતે ઘટાડે છે. આ ઉપરાંત, સેડાન સેગમેન્ટમાં Honda City e:HEV પણ 27.26 કિમી/લિટરે ઉત્તમ પરફોર્મન્સ આપે છે.