ભારતીય બજારમાં ટૂંક સમયમાં લોન્ચ થવા જઈ રહેલી નવી SUV, MG Majestor એ પોતાની એન્ટ્રી પહેલા જ દુનિયાને ચોંકાવી દીધી છે. આ શક્તિશાળી વાહને સૌથી ભારે ટ્રેન ખેંચનારી SUV તરીકે પોતાનું નામ 'ગિનીસ બુક ઓફ વર્લ્ડ રેકોર્ડ્સ'માં નોંધાવ્યું છે. જમ્મુ-કાશ્મીરના કાકાપોરા અને અવંતીપોરા સ્ટેશનો વચ્ચે આ સાહસ ખેડવામાં આવ્યું હતું, જ્યાં SUVએ 406.4 ટન વજન ધરાવતી આખી ટ્રેનને 300 ફૂટ સુધી ખેંચીને નવો ઈતિહાસ રચ્યો હતો. આ પરાક્રમ સાથે જ મેજેસ્ટરે વૈશ્વિક સ્તરે ભારતની એન્જિનિયરિંગ ક્ષમતાનો પરચો આપ્યો છે.
સામાન્ય કાર અને અસામાન્ય પરાક્રમ
આ રેકોર્ડની સૌથી આશ્ચર્યજનક બાબત એ છે કે તેના માટે ઉપયોગમાં લેવાયેલી SUVમાં કોઈ ખાસ ટેકનિકલ સુધારા કરવામાં આવ્યા નહોતા. આ એક સ્ટાન્ડર્ડ મોડલ હતું, જેમાં કંપની દ્વારા આપવામાં આવતું સામાન્ય એન્જિન, ડ્રાઈવટ્રેન અને ટાયરનો જ ઉપયોગ થયો હતો. કારને પાટા પર ટ્રેક જાળવી રાખવા માટે ફક્ત વધારાના 'રેલ વ્હીલ્સ' લગાવાયા હતા. ગિનીસ વર્લ્ડ રેકોર્ડના કડક નિયમો હેઠળ થયેલી આ તપાસમાં સાબિત થયું કે આ વાહનનું મૂળભૂત માળખું અને ટ્રેક્શન સિસ્ટમ એટલી મજબૂત છે કે તે પોતાની ક્ષમતા કરતા અનેક ગણું વજન પણ આસાનીથી ખેંચી શકે છે.