દક્ષિણ અમેરિકાના દેશ વેનેઝુએલામાં અમેરિકી સૈન્ય કાર્યવાહી બાદ સર્જાયેલી અસ્થિરતાને કારણે વૈશ્વિક બજારમાં ચિંતા વધી છે. રાષ્ટ્રપતિ નિકોલસ માદુરોની ધરપકડ બાદ ત્યાંના અર્થતંત્ર પર દબાણ વધ્યું છે. જોકે, વેનેઝુએલામાં નિકાસ કરતી અગ્રણી ભારતીય કંપની બજાજ ઓટો આ સ્થિતિથી બેફિકર જણાય છે.
પલ્સર અને બોક્સરની બોલબાલા
વેનેઝુએલામાં જાહેર પરિવહન વ્યવસ્થા નબળી હોવાને કારણે ખાનગી વાહનોની માંગ વધુ છે. ભારતીય બાઈક્સ, ખાસ કરીને બજાજની પલ્સર (Pulsar) અને બોક્સર (Boxer) ત્યાંના નાગરિકોમાં અત્યંત લોકપ્રિય છે. જોકે, કંપનીના એક્ઝિક્યુટિવ ડાયરેક્ટર રાકેશ શર્માએ સ્પષ્ટતા કરી છે કે વેનેઝુએલામાં થતી નિકાસ કંપનીના કુલ વિદેશી શિપમેન્ટના 1 ટકાથી પણ ઓછી છે, તેથી ત્યાંની અશાંતિથી કંપનીના કુલ વ્યવસાય પર કોઈ મોટી અસર પડશે નહીં.
બજાજ ઓટોના નિકાસના આંકડા
એપ્રિલથી ડિસેમ્બર દરમિયાન બજાજ ઓટોના નિકાસમાં નોંધપાત્ર વધારો જોવા મળ્યો છે; ચાલુ વર્ષ (એપ્રિલ-ડિસેમ્બર): 16,39,971 યુનિટ. ગયા વર્ષે (સમાન ગાળો): 13,73,595 યુનિટ. વધારો: 19 ટકા.
વેનેઝુએલાનું કથળતું ઓટો સેક્ટર
1990ના દાયકા સુધી મજબૂત ગણાતું વેનેઝુએલાનું ઓટોમોબાઇલ ઉદ્યોગ 2000ના આર્થિક સંકટ અને મોંઘવારીને કારણે લગભગ પડી ભાંગ્યું છે. જનરલ મોટર્સ અને ફોર્ડ જેવી દિગ્ગજ કંપનીઓએ પ્લાન્ટ બંધ કર્યા બાદ હવે આ દેશ ચીન અને ભારત જેવા દેશો પર નિર્ભર છે.
વધતું તણાવ
અમેરિકી રાષ્ટ્રપતિ ડોનાલ્ડ ટ્રમ્પે વેનેઝુએલાના વચગાળાના રાષ્ટ્રપતિ ડેલ્સી રોડ્રિગ્ઝને કડક ચેતવણી આપી છે કે જો તેઓ અમેરિકાની શરતો મુજબ પગલાં નહીં ભરે, તો પરિણામ ગંભીર આવશે. આ આંતરરાષ્ટ્રીય તણાવની વચ્ચે ભારતીય ઓટોમોબાઇલ સેક્ટર પરિસ્થિતિ પર નજર રાખી રહ્યું છે.
વધુ સમાચાર વાંચવા માટે ક્લિક કરો
