દરેકનું સપનું હોય છે કે તેની પાસે પોતાની એક કાર હોય. ઘણીવાર બજેટના અભાવે લોકો ટુ-વ્હીલરથી કામ ચલાવતા હોય છે, પરંતુ હવે ભારતીય ઓટોમોબાઈલ માર્કેટમાં એવો બદલાવ આવ્યો છે કે બાઇકની કિંમતમાં થોડો વધારો કરીને તમે આખી ફેમિલી માટે કાર ખરીદી શકો છો. નવા જીએસટી રિફોર્મ્સ અને કંપનીઓના ડિસ્કાઉન્ટ બાદ કેટલીક લોકપ્રિય કારોની કિંમતમાં મોટો ઘટાડો જોવા મળ્યો છે. અહીં એવી 5 કાર વિશે માહિતી છે જે તમારા ખિસ્સાને પરવડે તેવી છે.

સૌથી સસ્તી એન્ટ્રી-લેવલ કાર

હાલમાં માર્કેટમાં સૌથી મોટો ધડાકો Maruti S-Presso એ કર્યો છે. આ કારના STD (O) વેરિઅન્ટની કિંમતમાં અંદાજે 18% નો ઘટાડો થયો છે. જે ગાડી પહેલા મોંઘી હતી તે હવે માત્ર રૂ.3.49 લાખની શરૂઆતની કિંમતે ઉપલબ્ધ છે. ગ્રાહકોને સીધો રૂ.76,600 જેવો મોટો ફાયદો મળી રહ્યો છે, જેને કારણે તે બજેટ સેગમેન્ટની સૌથી વધુ ડિમાન્ડ ધરાવતી કાર બની ગઈ છે.

મધ્યમ વર્ગની ફેવરિટ હેચબેક

લાંબા સમય સુધી દેશની સૌથી સસ્તી કાર રહેલી Maruti Alto K10 હવે બીજા ક્રમે છે. તેના STD (O) વેરિઅન્ટની કિંમત હવે રૂ.3.69 લાખ છે. જીએસટી ફેરફારોને કારણે ગ્રાહકોને આ ગાડી પર અંદાજે રૂ.53,100ની બચત થઈ રહી છે. ઓછું મેન્ટેનન્સ અને શાનદાર માઇલેજ તેને આજે પણ મધ્યમ વર્ગની પહેલી પસંદ બનાવે છે.

સ્ટાઇલિશ લુક અને સસ્તી કિંમત

જો તમે ઓછા બજેટમાં SUV જેવો લુક ઈચ્છતા હોવ તો Renault Kwid શ્રેષ્ઠ વિકલ્પ છે. તેના 1.0 RXE વેરિઅન્ટની કિંમત રૂ.4.69 લાખથી ઘટીને હવે રૂ.4.29 લાખ થઈ ગઈ છે. તેની બોલ્ડ ડિઝાઇન અને આધુનિક ફીચર્સ નવા ગ્રાહકોને આકર્ષી રહ્યા છે.

મજબૂતી અને સુરક્ષાનો સંગમ

ટાટા મોટર્સની Tata Tiago તેના સેગમેન્ટમાં સૌથી સુરક્ષિત કાર માનવામાં આવે છે. તેના XE વેરિઅન્ટની કિંમત હવે રૂ.4.57 લાખથી શરૂ થાય છે. અગાઉની સરખામણીએ ગ્રાહકોને રૂ.42,500નો સીધો ફાયદો મળી રહ્યો છે. મજબૂત બિલ્ડ ક્વોલિટીને કારણે જે લોકો સેફ્ટી સાથે બાંધછોડ કરવા માંગતા નથી તેમના માટે આ 'વેલ્યુ ફોર મની' કાર છે.

વધુ સ્પેસ અને આધુનિક એન્જિન

Maruti Celerio પણ હવે સસ્તી કારોની યાદીમાં સામેલ થઈ ગઈ છે. તેના LXI વેરિઅન્ટની કિંમતમાં રૂ.94,100 જેવો માતબર ઘટાડો થયો છે, જેનાથી તેની નવી કિંમત રૂ.4.69 લાખ થઈ ગઈ છે. અંદાજે 17% જેટલી કિંમત ઘટતા હવે તે વધુ લોકોના બજેટમાં ફિટ બેસી રહી છે. આમ, જો તમે બાઇક છોડીને કાર પર અપગ્રેડ થવા માંગતા હોવ, તો આ પાંચ વિકલ્પો તમારા માટે નાણાકીય રીતે બેસ્ટ સાબિત થઈ શકે તેમ છે.

વધુ સમાચાર વાંચવા માટે ક્લિક કરો