ભારતીય ઇલેક્ટ્રિક ટુ-વ્હીલર માર્કેટમાં ક્રાંતિ લાવવા માટે Ola Electric એ તેના નવા #EndICEAge કેમ્પેઈનની જાહેરાત કરી છે. આ અભિયાન હેઠળ કંપનીએ પેટ્રોલ વાહનોના વપરાશને ઘટાડી ઇલેક્ટ્રિક વાહનોને પ્રોત્સાહન આપવા માટે કિંમતોમાં ધરખમ ઘટાડો કર્યો છે. ઓલાએ ગ્રાહકો માટે એન્ટ્રી-લેવલ મોડલ્સની શરૂઆતી કિંમત માત્ર રૂ.49,999 રાખી છે, જે સામાન્ય મધ્યમ વર્ગના પરિવારો માટે ખૂબ જ આકર્ષક કિંમત સાબિત થઈ શકે છે.
નવા મોડલ્સ અને પોસાય તેવી કિંમતો
કંપનીએ ખાસ કરીને ગ્રાહકોના બજેટને ધ્યાનમાં રાખીને Gen 3 Ola S1 X (2kWh) સ્કૂટર અને Ola Roadster X (2.5kWh) બાઇકને રજૂ કરી છે. આ બંને મોડલ્સની કિંમત રૂ.49,999 થી શરૂ થાય છે. આ ઓફરનો લાભ ગ્રાહકો 31 માર્ચ 2026 સુધી લઈ શકશે. આ પગલા દ્વારા ઓલાનો હેતુ ટુ-વ્હીલર માર્કેટમાં પેટ્રોલ એન્જિન (ICE) ધરાવતા વાહનોને સીધી ટક્કર આપવાનો છે.
રૂ.50,000 સુધીના બેનિફિટ્સ અને 8 વર્ષની વોરંટી
માત્ર ઓછી કિંમત જ નહીં, પરંતુ ઓલા તેના ગ્રાહકોને રૂ.50,000 સુધીના અન્ય ફાયદાઓ પણ આપી રહી છે. કંપનીએ તેના તમામ S1 સ્કૂટર અને રોડસ્ટર બાઇક પર 8 વર્ષની એક્સટેન્ડેડ વોરંટી જાહેર કરી છે, જે આ સેગમેન્ટમાં સૌથી વધુ છે. આ ઉપરાંત, ગ્રાહકોને 60% સુધીની એસ્યોર્ડ બાયબેક વેલ્યુ પણ મળશે, જેનો અર્થ છે કે ભવિષ્યમાં જો ગ્રાહક પોતાનું વાહન અપગ્રેડ કરવા માંગે, તો તેને સારી કિંમત પરત મળી શકશે.
ઝડપી સર્વિસ અને ગ્રાહક સુરક્ષા
સર્વિસ બાબતે ગ્રાહકોની ફરિયાદોને ધ્યાનમાં રાખીને ઓલાએ મોટો દાવો કર્યો છે. કંપનીના જણાવ્યા અનુસાર, હવે 80% થી વધુ કિસ્સાઓમાં તે જ દિવસે (Same-Day) સર્વિસ પૂરી પાડવામાં આવશે. જો કંપની નિર્ધારિત સમયમાં સર્વિસ પૂરી કરવામાં નિષ્ફળ જશે, તો ગ્રાહકને વળતર રૂપે મફત ઓલા કેબ વાઉચર આપવામાં આવશે. આ પગલાથી ગ્રાહકોનો ઇલેક્ટ્રિક વાહનો પ્રત્યેનો વિશ્વાસ વધવાની શક્યતા છે.
ઓલા ઇલેક્ટ્રિકનું વિસ્તૃત પોર્ટફોલિયો
કંપનીના પ્રીમિયમ અને બજેટ સેગમેન્ટમાં વિવિધ મોડલ્સ ઉપલબ્ધ છે. પ્રીમિયમ રેન્જ: S1 Pro+ (5.2kWh) ની કિંમત રૂ.1,44,999 અને S1 Pro (3kWh) ની કિંમત રૂ.1,02,499 છે. બજેટ રેન્જ: S1 X (2kWh) માત્ર રૂ.49,999 માં ઉપલબ્ધ છે. મોટરસાઇકલ રેન્જ: Roadster X+ (9.1kWh) ની કિંમત રૂ.1,89,999 છે, જ્યારે એન્ટ્રી-લેવલ Roadster X (2.5kWh) પણ રૂ.49,999 માં મળશે. કંપની દેશભરમાં પોતાના 'એક્સપિરિયન્સ સેન્ટર્સ'નું નેટવર્ક પણ ઝડપથી વધારી રહી છે, જેથી વધુમાં વધુ લોકો આ ટેકનોલોજીનો અનુભવ કરી શકે.
વધુ સમાચાર વાંચવા માટે ક્લિક કરો
