મહિન્દ્રા એન્ડ મહિન્દ્રા પોતાની લોકપ્રિય 3-ડોર થારને એક નવો લુક આપવાની તૈયારી કરી રહી છે. તાજેતરમાં સામે આવેલી તસવીરો પરથી સ્પષ્ટ થાય છે કે આગામી થાર ફેસલિફ્ટમાં 'થાર રોક્સ' (Thar Roxx) જેવી સ્ટાઈલિંગ અને આધુનિક ઈક્વિપમેન્ટ જોવા મળશે. આ અપડેટ સાથે કંપની એસયુવી પ્રેમીઓની અપેક્ષાઓ પર ફરી એકવાર ખરી ઉતરવા માંગે છે.
ડિઝાઇન અને બાહ્ય દેખાવમાં મોટા ફેરફારો
નવી અપડેટેડ થારમાં તેનો પરિચિત બોક્સી આકાર જાળવી રાખવામાં આવ્યો છે, પરંતુ તેના આગળના ભાગમાં મોટા ફેરફારો જોવા મળશે. સૌથી મોટું આકર્ષણ તેની નવી ગ્રીલ છે, જે સાત-સ્લોટને બદલે હવે ડબલ-સ્ટેક્ડ છ-સ્લોટ સાથે આવશે. આ સિવાય, તેમાં ગોળાકાર LED પ્રોજેક્ટર હેડલાઇટ્સ અને C-શેપની LED ડે-ટાઇમ રનિંગ લેમ્પ્સ (DRLs) હશે, જે તેને રોક્સ જેવો જ પ્રીમિયમ લુક આપે છે.
નવા એલોય વ્હીલ્સ અને રિયર પ્રોફાઇલ
મહિન્દ્રાએ આ વખતે ટાયર અને વ્હીલ્સ પર પણ ખાસ ધ્યાન આપ્યું છે. નવી થારમાં 19-ઇંચના નવા ડિઝાઇન કરેલા એલોય વ્હીલ્સ જોવા મળી શકે છે, જે ગાડીને વધુ મજબૂત અને સ્પોર્ટી લુક આપે છે. પાછળના ભાગમાં ફેરફારો મર્યાદિત છે, પરંતુ ત્યાં નવી LED ટેલ-લાઇટ ડિઝાઇન અને સ્પેર વ્હીલ સાથેના ટેલગેટ લેઆઉટમાં થોડો સુધારો જોવા મળી શકે છે.
પ્રીમિયમ ઇન્ટિરિયર અને હાઈ-ટેક ફીચર્સ
કેબિનની અંદર ગ્રાહકોને મોટું અપગ્રેડ મળવાની આશા છે. અહેવાલો અનુસાર, 2026 થાર ફેસલિફ્ટમાં રોક્સ જેવી જ ફિટિંગ અને ફિનિશિંગ જોવા મળશે. સુવિધાઓની વાત કરીએ તો, તેમાં વેન્ટિલેટેડ ફ્રન્ટ સીટ્સ, ઓટો-ડિમિંગ ઇન્ટિરિયર રિયર-વ્યુ મિરર, વાયરલેસ ચાર્જિંગ પેડ અને પુશ-બટન સ્ટાર્ટ સાથે કીલેસ એન્ટ્રી જેવા ફીચર્સ સામેલ હશે. આ ઉપરાંત, તેમાં મોટી ટચસ્ક્રીન સાથે વધુ અદ્યતન ઇન્ફોટેનમેન્ટ સિસ્ટમ પણ આપવામાં આવશે.
એન્જિન અને પર્ફોર્મન્સ
એન્જિનના મામલે કોઈ મોટા ફેરફારોની શક્યતા નથી, કારણ કે વર્તમાન એન્જિન પહેલેથી જ પાવરફુલ છે. તેમાં 2.2-લિટર ડીઝલ અને 2.0-લિટર ટર્બો પેટ્રોલ એન્જિનના વિકલ્પો ચાલુ રહેશે. આ એન્જિન મેન્યુઅલ અને ઓટોમેટિક ટ્રાન્સમિશન બંને સાથે ઉપલબ્ધ હશે. ગ્રાહકો પોતાની જરૂરિયાત મુજબ 4x4 અથવા રિયર વ્હીલ ડ્રાઇવ (RWD) માંથી પસંદગી કરી શકશે.
વધુ સમાચાર વાંચવા માટે ક્લિક કરો
