પ્રખ્યાત અમેરિકન ક્રૂઝર બાઇક ઉત્પાદક કંપની હાર્લે-ડેવિડસન (Harley-Davidson) એ ભારતીય બજારમાં તેની લોકપ્રિય X440 બાઇક રેન્જની કિંમતોમાં વધારો કરી દીધો છે. કંપનીએ આ બાઇકના અલગ-અલગ વેરિઅન્ટ્સ પર રૂ.1,000 થી લઈને રૂ.5,000 સુધીનો વધારો ઝીંક્યો છે. આ નવો ભાવવધારો X440 ના તમામ વેરિઅન્ટ્સ (Vivid, S અને T) પર લાગુ કરવામાં આવ્યો છે.
પ્રીમિયમ રોડસ્ટર બાઇકની કિંમતમાં વધારો
ભારતીય બજારમાં પ્રીમિયમ રોડસ્ટર બાઇક તરીકે જાણીતી X440 માં કંપનીએ કોઈ નવા ફીચર્સ કે એન્જિન અપડેટ આપ્યા નથી, તેમ છતાં તેની કિંમતો વધારવામાં આવી છે. તેથી હવે આ બાઇક ખરીદવા ઈચ્છતા ગ્રાહકોએ પહેલા કરતાં વધુ ખિસ્સું હળવું કરવું પડશે.
લોન્ચ થયા બાદ કિંમતમાં પ્રથમ વધારો
નોંધનીય છે કે ભારતમાં હાર્લે-ડેવિડસનની મોટરસાઇકલનું મેન્યુફેક્ચરિંગ અને વેચાણ 'હીરો મોટોકોર્પ' (Hero MotoCorp) સાથેની ભાગીદારીમાં કરવામાં આવે છે. હીરો જ દેશમાં હાર્લેના સર્વિસ, સ્પેર પાર્ટ્સ અને મર્ચેન્ડાઇઝ નેટવર્કને સંભાળે છે. ગયા વર્ષે લોન્ચ થયા બાદ આ બાઇકની કિંમતમાં કરવામાં આવેલો આ પ્રથમ વધારો છે.
વેરિઅન્ટ પ્રમાણે કિંમતોમાં થયેલો ફેરફાર
કંપનીએ તેના ત્રણેય વેરિઅન્ટની કિંમતોમાં આ મુજબ ફેરફાર કર્યો છે:
- X440 Vivid (સૌથી સસ્તું મોડેલ): આ લાઇનઅપનું સૌથી કિફાયતી મોડેલ છે. પહેલા તેની એક્સ-શોરૂમ કિંમત રૂ.2.35 લાખ હતી, જેમાં રૂ.1,000 નો વધારો થતાં હવે નવી કિંમત રૂ.2.36 લાખ થઈ ગઈ છે.
- X440 S (મિડ-વેરિઅન્ટ): આ મિડ-વેરિઅન્ટની કિંમતમાં રૂ.4,000 નો વધારો કરાયો છે. પહેલા આ મોડેલ રૂ.2.55 લાખમાં મળતું હતું, જે હવે વધીને રૂ.2.59 લાખ (એક્સ-શોરૂમ) થયું છે.
- X440 T (ટોપ વેરિઅન્ટ): આ ટોપ વેરિઅન્ટ પર સૌથી વધુ રૂ.5,000 નો વધારો થયો છે. પહેલા તેની કિંમત રૂ.2.79 લાખ હતી, જે હવે વધીને રૂ.2.84 લાખ થઈ ગઈ છે.
એન્જિન અને ફીચર્સમાં કોઈ ફેરફાર નહીં
કિંમતો વધવા છતાં બાઇકમાં કોઈ મિકેનિકલ કે ટેકનિકલ બદલાવ કરવામાં આવ્યા નથી. આ બાઇકમાં પહેલાની જેમ જ 440cc નું સિંગલ-સિલિન્ડર, એર/ઓઈલ-કૂલ્ડ એન્જિન મળે છે, જે 26.6 bhp નો પાવર અને 38 Nm નો ટોર્ક જનરેટ કરે છે. આ એન્જિન 6-સ્પીડ ગિયરબોક્સ સાથે જોડાયેલું છે.
હરીફ બાઇક્સ કરતાં વધુ મોંઘી થઈ X440 T
આ ભાવવધારા બાદ X440 T પોતાના સેગમેન્ટની અન્ય લોકપ્રિય બાઇકો કરતાં ઘણી મોંઘી થઈ ગઈ છે, જેના કારણે હરીફ બાઇક્સ અને આ મોડેલ વચ્ચેનો કિંમતનો તફાવત હવે ઘણો વધી ગયો છે.
સેગમેન્ટની અન્ય લોકપ્રિય બાઇકોની શરૂઆતની કિંમત:
- Triumph 400 સિરીઝ: આશરે રૂ.2.53 લાખથી શરૂ
- Honda CB350 RS: આશરે રૂ.1.98 લાખથી શરૂ
- Royal Enfield Classic 350: આશરે રૂ.1.86 લાખથી શરૂ
વધુ સમાચાર વાંચવા માટે ક્લિક કરો
