Automobile News: ટૂંક સમયમાં ભારતમાં લોન્ચ થશે CNG સ્કૂટર, જે આપશે 2 લિટર પેટ્રોલ સાથે 170 KMની રેન્જ

ગ્રીન ફ્યુઅલની વધતી માંગ વચ્ચે હવે માત્ર ઇલેક્ટ્રિક જ નહીં પરંતુ CNGથી ચાલતા વાહનો પણ રેસમાં આવી ગયા છે. આ જ કડીમાં ટુ-વ્હીલર બનાવતી અગ્રણી કંપની સુઝુકીએ પોતાનું CNGથી ચાલતું સ્કૂટર તૈયાર કરી દીધું છે. જે ટૂંક સમયમાં ભારતમાં લોન્ચ થઈ શકે છે.

ડ્યુઅલ-ફ્યુઅલ ટેકનોલોજી

જાપાન મોબિલિટી શો 2025માં સુઝુકીએ પોતાના લોકપ્રિય એક્સેસ સ્કૂટરનું CNG વર્ઝન રજૂ કર્યું છે. આ સ્કૂટર CNG અને CBG એમ બે પ્રકારની ગેસ પર ચાલી શકે છે. આ ડ્યુઅલ-ફ્યુઅલ ટેકનોલોજી સુઝુકીને ભારતીય બજારમાં પહેલું CNG/CBG સ્કૂટર બનાવશે. આ પહેલા TVS જ્યુપિટર CNG પણ આ રેસમાં હોવાના સમાચાર છે. પરંતુ સુઝુકી આ બંને ગેસ પર ચાલનારું પ્રથમ સ્કૂટર લાવી શકે છે.

જબરદસ્ત માઈલેજ અને રેન્જ

આ સ્કૂટરની સૌથી મોટી ખાસિયત તેની રેન્જ છે. તેમાં સીટની નીચે 6 લિટરની ક્ષમતાવાળો ગેસ ટેન્ક લગાવવામાં આવ્યો છે. આની સાથે જ સ્કૂટરમાં 2 લિટરનું પેટ્રોલ ટેન્ક પણ આપવામાં આવ્યું છે. જ્યારે ગેસ અને પેટ્રોલ બંને ટેન્ક સંપૂર્ણ ભરેલા હોય ત્યારે આ સ્કૂટર એક જ વારમાં અંદાજે 170 કિલોમીટર સુધીનું અંતર કાપી શકે છે. જે સામાન્ય સ્કૂટરોની સરખામણીમાં ઘણી મોટી રેન્જ છે.

ડિઝાઇન અને એન્જિન:

આ સ્કૂટરમાં CNG/CBGનો દેખાવ લગભગ પેટ્રોલ વાળા સ્કૂટર જેવો જ છે. પરંતુ તેમાં લીલા રંગની ડિઝાઈન અને સ્ટીકર્સ આપવામાં આવ્યા છે. જે દર્શાવે છે કે તે ગ્રીન ફ્યુઅલ પર ચાલે છે. CNG સિસ્ટમ ઉમેરવાને કારણે સ્કૂટરનું વજન પેટ્રોલ મોડેલ (106 કિલો) કરતાં લગભગ 10% વધી જશે. જોકે તેમાં 124ccનું એન્જિન જળવાઈ રહેશે. જે પેટ્રોલ મોડેલમાં 8.4 PS પાવર અને 10.2 Nm ટોર્ક આપે છે. વજન વધવાથી પાવર અને ટોર્કમાં થોડો ફેરફાર આવી શકે છે.