નવરાત્રિ 2025ના સમયગાળા દરમિયાન પેસેન્જર વાહનોના છૂટક વેચાણમાં વાર્ષિક ધોરણે 35 ટકાનો વધારો થયો છે, જેના કારણે ગયા મહિને થયેલી કુલ નોંધણીમાં 6 ટકાનો વધારો થયો છે, એમ વાહન ડીલરો સંગઠન FADAએ જણાવ્યું છે. ફેડરેશન ઓફ ઓટોમોબાઈલ ડીલર્સ એસોસિએશન (FADA) અનુસાર, સપ્ટેમ્બરના પહેલા 21 દિવસમાં વેચાણ ધીમું હતું અને 22 સપ્ટેમ્બરે નવા ગુડ્સ એન્ડ સર્વિસ ટેક્સ (GST) દરો લાગુ થયા પછી તેમાં વધારો થયો છે. નવરાત્રિ દરમિયાન પેસેન્જર વાહનોનું કુલ છૂટક વેચાણ 2,17,744 યુનિટ રહ્યું, જે ગયા વર્ષે નવરાત્રિના સમયગાળા દરમિયાન 1,61,443 યુનિટ હતું.

ગ્રાહકો GST 2.0 સુધારાની અપેક્ષામાં રોકાયા હતા

અહેવાલ મુજબ સપ્ટેમ્બરમાં પેસેન્જર વાહનોનું છૂટક વેચાણ વાર્ષિક ધોરણે 6 ટકા વધીને 2,99,369 યુનિટ થયું છે, જે પાછલા વર્ષના 2,82,945 યુનિટ હતું, જેનું મુખ્ય કારણ વેચાણમાં વધારો છે. 22 સપ્ટેમ્બરથી નવા GST દરના અમલ પછી ભાવ ઘટાડાની અપેક્ષા રાખતા ગ્રાહકોએ મહિનાના પહેલા ભાગમાં ખરીદી બંધ રાખી હતી. "સપ્ટેમ્બર 2025 દેશના ઓટોમોટિવ રિટેલ ઉદ્યોગ માટે એક અનોખો મહિનો હતો. પ્રથમ ત્રણ અઠવાડિયા મોટાભાગે શાંત રહ્યા કારણ કે ગ્રાહકો GST 2.0 સુધારાની અપેક્ષામાં રોકાયા હતા, જોકે, છેલ્લા અઠવાડિયામાં પરિસ્થિતિ નાટકીય રીતે બદલાઈ ગઈ કારણ કે નવરાત્રિનો તહેવાર નીચા GST દરોના અમલીકરણ સાથે સુસંગત હતો.

જેના કારણે ગ્રાહકોની ભાવનામાં સુધારો થયો અને મોટાભાગના વાહન વેચાણમાં વધારો થયો," FADAના ઉપપ્રમુખ સાઈ ગિરધરે એક નિવેદનમાં જણાવ્યું હતું. પરિણામે, મહિનાનો અંત 5 ટકાના એકંદર વાર્ષિક વૃદ્ધિ સાથે થયો, જેમાં ત્રણ પૈડાંવાળા વાહનો અને બાંધકામ સાધનો સિવાયના તમામ સેગમેન્ટમાં સકારાત્મક ગતિ જોવા મળી, એમ તેમણે જણાવ્યું હતું. FADA મુજબ સપ્ટેમ્બરના છેલ્લા દિવસે જોવા મળી રહેલી તેજી દિવાળી સુધી ચાલુ રહેવાની અપેક્ષા છે, આમ 42 દિવસના તહેવારના સમયગાળાનો સકારાત્મક અંત આવ્યો છે.

નવરાત્રિ દરમિયાન છૂટક વેચાણ 19 ટકા વધ્યું

ડેટા અનુસાર, ગયા મહિને ટુ-વ્હીલરનું છૂટક વેચાણ 12,87,735 યુનિટ થયું હતું, જે સપ્ટેમ્બર 2024માં 12,08,996 યુનિટથી 7 ટકા વધુ છે. નવરાત્રિ સમયગાળા દરમિયાન વેચાણ 36 ટકા વધીને 8,35,364 યુનિટ થયું હતું, જે ગયા વર્ષના સમાન સમયગાળામાં 6,14,460 યુનિટ હતું. સપ્ટેમ્બર 2025માં થ્રી-વ્હીલરનું છૂટક વેચાણ 98,866 યુનિટ થયું હતું, જે સપ્ટેમ્બર 2024માં 1,06,534 યુનિટ હતું તેની સરખામણીમાં 7 ટકા ઓછું છે. નવરાત્રિ દરમિયાન છૂટક વેચાણ 46,204 યુનિટ થયું હતું, જે ગયા વર્ષના સમાન સમયગાળામાં 37,097 યુનિટ હતું, તેની સરખામણીમાં 25 ટકા વધુ છે. ગયા મહિને વાણિજ્યિક વાહનોનું વેચાણ 3 ટકા વધીને 72,124 યુનિટ થયું હતું, જે ગયા વર્ષના સમાન મહિનામાં 70,254 યુનિટ હતું.

નવરાત્રિ દરમિયાન આ સેગમેન્ટમાં વેચાણ વાર્ષિક ધોરણે 15 ટકા વધીને 33,856 યુનિટ થયું હતું. સપ્ટેમ્બરમાં ટ્રેક્ટરનું છૂટક વેચાણ વાર્ષિક ધોરણે 4 ટકા વધીને 64,785 યુનિટ થયું. નવરાત્રિ દરમિયાન છૂટક વેચાણ 19 ટકા વધીને 21,604 યુનિટ થયું, જે ગયા વર્ષના સમાન સમયગાળામાં 18,203 યુનિટ હતું. ગયા મહિને તમામ સિરિઝમાં કુલ વેચાણ 18,27,337 યુનિટ થયું હતું, જે સપ્ટેમ્બર 2024માં 17,36,760 યુનિટથી 5 ટકા વધુ છે. તેવી જ રીતે, નવરાત્રિમાં કુલ વેચાણ ગયા વર્ષના 8,63,327 યુનિટથી 34 ટકા વધીને 11,56, 935 યુનિટ થયું હતું. FADAએ જણાવ્યું હતું કે દેશ તેના અત્યાર સુધીના સૌથી શાનદાર 42 દિવસના તહેવારના સમયગાળાના આરે છે.