સ્ટાર બેટ્સમેન અને ભારતીય ક્રિકેટ ટીમના ભૂતપૂર્વ કેપ્ટન રોહિત શર્માએ ઇલેક્ટ્રિક કારની દુનિયામાં પ્રવેશ કર્યો છે અને પોતાના ગેરેજમાં Tesla Model Y માટે જગ્યા કરી દીધી છે. આ લક્ઝરી SUVની કિંમત રૂ.67.89 લાખ છે. ક્રિકેટના મેદાન પર પોતાના શક્તિશાળી શોટ્સથી ચાહકોના દિલ જીતી લેનાર રોહિત શર્મા હવે પોતાની નવી Tesla Model Y સાથે રસ્તાઓ પર જોવા મળશે. ભારતમાં ઇલેક્ટ્રિક કારની વધતી જતી લોકપ્રિયતા વચ્ચે ટીમ ઇન્ડિયાના હિટમેને હવે એક પગલું ભરીને આગળ વધ્યા છે. તેમણે તાજેતરમાં Tesla Model Y RWD સ્ટાન્ડર્ડ રેન્જ વેરિઅન્ટ ખરીદ્યું છે. જેની કિંમત રૂ.67.89 લાખ (એક્સ-શોરૂમ) છે.

Tesla Model Yનું શક્તિશાળી પ્રદર્શન અને શાનદાર સુવિધાઓ

રોહિતની નવી ઇલેક્ટ્રિક SUVમાં 75 kWh બેટરી પેક છે. જે એક જ ચાર્જ પર 622 કિલોમીટર સુધીની રેન્જ આપી શકે છે. આ મોડેલ રીઅર-વ્હીલ ડ્રાઇવ સિસ્ટમ પર આધારિત છે. આ ગાડીની મોટર 220 kW પાવર ઉત્પન્ન કરે છે. આ કાર 295 bhp અને 420 Nm ટોર્ક ઉત્પન્ન કરવાની ક્ષમતા ધરાવે છે. Tesla Model Y આકર્ષક આધુનિક ડિઝાઇન ધરાવે છે અને કોઈપણ લક્ઝરી બ્રાન્ડ કરતાં ટેકનોલોજીની દ્રષ્ટિએ ઓછી અદ્યતન નથી. તેમાં 15.4 ઇંચની ટચસ્ક્રીન ઇન્ફોટેનમેન્ટ સિસ્ટમ, પ્રીમિયમ ઇન્ટિરિયર, ઓલ-એલઇડી લાઇટ્સ, ગરમ અને વેન્ટિલેટેડ સીટો, એમ્બિયન્ટ લાઇટિંગ અને 9 સ્પીકર વાળુ પ્રીમિયમ સાઉન્ડ સિસ્ટમ છે. વધુમાં ઓટોમેટિક ઇમરજન્સી બ્રેકિંગ, બ્લાઇન્ડ કોલિઝન વોર્નિંગ અને ગ્લાસ રૂફ જેવી સુવિધાઓ તેની વિશિષ્ટતામાં વધારો કરે છે.

આ કારની નંબર પ્લેટ સાથે સંકળાયેલી એક ભાવનાત્મક વાર્તા

રોહિત શર્માની Teslaની નંબર પ્લેટ 3015 છે અને તેનો તેમના પરિવાર સાથે ઊંડો સંબંધ જોડાયેલો છે. હકીકતમાં 30 ડિસેમ્બરે તેમની પુત્રીનો જન્મદિવસ છે અને 15 નવેમ્બરે તેમના પુત્રનો જન્મદિવસ છે. આ જ કારણથી તેમણે તેમની નવી કાર Tesla Model Yની નંબર પ્લેટને આટલી ખાસ બનાવી. રોહિત શર્માની આ પહેલી લક્ઝરી કાર નથી. તેમનું ગેરેજ પહેલાથી જ સુપરકારોથી ભરેલું પડ્યું છે. ક્રિકેટર રોહિત શર્મા પાસે પહેલેથી જ લેમ્બોર્ગિની ઉરુસ SE, રેન્જ રોવર HSE લોંગ વ્હીલબેઝ, મર્સિડીઝ-બેન્ઝ એસ-ક્લાસ અને GLS 400D, BMW-M5, સ્કોડા ઓક્ટાવીયા અને ટોયોટા ફોર્ચ્યુનર જેવી કારોનું કલેક્શન છે.