ઇલોન મસ્કની કંપની ટેસ્લા (Tesla) દ્વારા પોતાની નવી બીજી જનરેશનની Roadster સ્પોર્ટ્સ કાર રજૂ કરવામાં આવી છે. ટેક્સાસમાં સ્પેસએક્સ (SpaceX)ના રોકેટ ટેસ્ટ સેન્ટર ખાતે 15 ઓક્ટોબરની રાત્રે યોજાયેલા એક વિશેષ કાર્યક્રમ દરમિયાન આ કારનું અનાવરણ કરવામાં આવ્યું હતું. લેઝર લાઇટ્સ, ધુમાડા અને આશ્ચર્યજનક સ્ટંટ વચ્ચે આ કારે લોકોનું ધ્યાન ખેંચ્યું હતું. 

હવામાં ઉડવા માટે સ્પેસએક્સના ખાસ થ્રસ્ટર્સ

આ કારની સૌથી મોટી વિશેષતા તેમાં આપવામાં આવેલા રોકેટ જેવા થ્રસ્ટર્સ છે, જે સ્પેસએક્સ સાથે મળીને તૈયાર કરવામાં આવ્યા છે. આ થ્રસ્ટર્સની મદદથી કાર થોડા સમય માટે હવામાં ઊંચી થઈ શકે છે, બીજી ગાડીઓની ઉપરથી પસાર થઈ શકે છે અને હેલિકોપ્ટરની જેમ સુરક્ષિત રીતે જમીન પર ઉતરી પણ શકે છે.

રોકેટ જેવી ટેક્નોલોજી અને 600 લીટરની એર ટાંકી

કંપનીના એન્જિનિયરિંગ વાઇસ પ્રેસિડેન્ટ લાર્સ મોરાવી (Lars Moravy)ના જણાવ્યા મુજબ, કારમાં 10 ખાસ થ્રસ્ટર્સ અને 600 લીટર પ્રેશરાઇઝ્ડ એર (દબાણવાળી હવા) ધરાવતી ટાંકી આપવામાં આવી છે. આ સિસ્ટમ કારને હવામાં ફેરવવામાં અને નીચે ઉતરતી વખતે તેની ગતિ નિયંત્રિત કરવામાં મદદ કરે છે. આ ટાંકીને જરૂરિયાત મુજબ ફરીથી હવામાંથી ભરી પણ શકાય છે. 

અનોખા સ્ટંટ અને સેકન્ડથી પણ ઓછા સમયમાં સ્પીડ 

લોન્ચિંગ ઇવેન્ટ દરમિયાન કારને ઊંચા રેમ્પ પરથી હવામાં ઉડતી અને નીચે ઉતરતી દર્શાવવામાં આવી હતી. એક કમાલના ડેમોમાં આ કાર Cybercab, Cybertruck, Tesla Semi, Model Y અને Model 3 જેવી ટેસ્લાની અન્ય ગાડીઓની ઉપરથી પસાર થઈ હતી. કંપનીનો દાવો છે કે આ કાર માત્ર 0.81 સેકન્ડમાં 0 થી 97 કિમી/કલાકની ગતિ પકડી શકે છે. 

https://x.com/Tesla/status/2110913438293647789?ref_src=twsrc%5Etfw%7Ctwcamp%5Etweetembed%7Ctwterm%5E2110913438293647789%7Ctwgr%5E%7Ctwcon%5Es1_c10&ref_url=

9 વર્ષની લાંબી રાહ બાદ પ્રોડક્શનની જાહેરાત 

ટેસ્લાએ બીજી જનરેશનની Roadsterનો પ્રોટોટાઇપ સૌપ્રથમ 2017માં દર્શાવ્યો હતો અને 2020 સુધીમાં તેની ડિલિવરી શરૂ કરવાની યોજના હતી. જોકે, સતત વિલંબ બાદ 2024માં ઇલોન મસ્કે તેને નવી રીતે ડિઝાઇન કરવાની માહિતી આપી હતી. હવે કંપનીએ જાહેરાત કરી છે કે આ નવી કારનું પ્રોડક્શન 2028થી શરૂ કરવામાં આવશે. 

ટેસ્લા Roadsterના 3 ખાસ વેરિઅન્ટ્સ

કંપની આ કારને ત્રણ અલગ-અલગ વેરિઅન્ટમાં માર્કેટમાં ઉતારશે, (1) Performance: સામાન્ય રસ્તાઓ પર ચલાવવા માટેનું 2-સીટર મોડેલ, (2) Thrust: રેસિંગ માટે ખાસ તૈયાર કરાયેલ વેરિઅન્ટ, જેમાં પાછળના ભાગે વધારે થ્રસ્ટર્સ હશે અને (3) Rocket: સૌથી પ્રીમિયમ વેરિઅન્ટ, જેમાં 10 થ્રસ્ટર્સ હશે અને તે સિંગલ-સીટર (માત્ર એક વ્યક્તિ માટે) હશે. 

બુકિંગ અને કિંમત અંગેની સ્થિતિ

Performance વેરિઅન્ટને બુક કરવા માટે 50,000 ડોલર અને Thrust મોડેલ માટે 2,50,000 ડોલરની એડવાન્સ રકમ નક્કી કરવામાં આવી છે. જ્યારે Rocket વેરિઅન્ટ ફક્ત કંપનીના ખાસ આમંત્રણ (Invite-only) પર જ બુક કરી શકાશે. 

https://x.com/Tesla/status/2110926164306931860?ref_src=twsrc%5Etfw%7Ctwcamp%5Etweetembed%7Ctwterm%5E2110926164306931860%7Ctwgr%5E%7Ctwcon%5Es1_c10&ref_url=

ઇલોન મસ્કનું નિવેદન અને સુવિધાઓ સામેના સવાલો

ઇલોન મસ્કે ઇવેન્ટમાં દાવો કર્યો હતો કે "આ એ જ કાર છે જેને લોકો રસ્તા પર દોડતી જોશે". જોકે, સામાન્ય રસ્તાઓ પર આ પ્રકારની હવાઈ ક્ષમતાઓનો ઉપયોગ કરવા માટેની કાનૂની મંજૂરી અને સુરક્ષા અંગે હજુ પણ ઘણા પ્રશ્નો ઊભા થયેલા છે. Morningstarના એનાલિસ્ટ સેથ ગોલ્ડસ્ટીનના અંદાજ મુજબ ટેસ્લા દર વર્ષે આવી આશરે 2,000 ગાડીઓ વેચી શકે છે.

વધુ સમાચાર વાંચવા માટે ક્લિક કરો